Valje na početku, da ne pozabin – jutra je na HTV-u polufinale šoa »Zvjezde pjevaju«, a ča to znači? E, pa urdin je – jutra si na telefon ale mobitel i brzo dat glas našemi dečkimi. Ni da ja sumnjan da će Robi i Mario finit va finalu, ma će njin bit lagje ako ih malo porivamo. Ekola, sad moremo dalje, a to znači da gremo najprvo na lokalno aš stara poslovica govori – najprvo posnaži na svomu privratu, a onput se, ako baš moraš pačaj va tuji. Ov drugi del san ja nadoštukala. A na našemu privratu, bolje j’ reć na sjednice rečkoga gradskoga parlamenta bilo j’ joh i kataloh. I sopeta HNK Ivana pl. Zajca i Titov Galeb, koda niš drugo v Rike ne postoji. Najme, oni ke smo zibrali pokosmali su se okol toga komu će va žep tri milijun kun od spomeničke renti. Gradonačelnik bi jih dal Galebu, a oporba – HDZ, Most, Nezavisna lista od Davora Štimca, Akcija mladeh i Unija Kvarnera bi ih pospravili va žep od Kazališta. Kako j’ gradonačelnikova zadnja, ovi drugi su se stali i prošli ća. Ča će bit dalje, gljedajte va idućoj epizode. Niš to mane ni iznenadilo, aš bolje je da se karaju leh da kod va ingleškomu Parlamentu ne abadaju ki ča govori leh gljedaju porno filmi na mobitel.

A ča bin ja z tun sakramenskun spomeničkun rentun, z ti tri milijuni? Pa, ja bin ju spravila va škrabicu na koj bi bilo se osin Galeb i Kazalište, pa bin, recimo šparala da bar temelji od lansirne rampi torpeda sačuvan, da va Hartere bar jednu zgradu renoviran i dan ju mlademi umjetnikimi za ateljei i stani, da operen rečki spomeniki na keh je dreka još od oneh galebi z bivše državi, da na Molo Longu dan šansu grafiterimi ki bi konačno na onomu zidu narisali povijest Rike… Ma mane se niš ne pita, pa ča mi j’ bolje tambaškat za bez veze.

Sopeta kad malo razmislin, bolje j’ i ovo karanje va vjećnice leh da nan se, ne daj Bog, pripeti se ono ča se j’ ovi dani Zadru. Najprvo san pročitala da j’ vuk došal na privrat oneh ki bivaju va Poljicah i da su janjčići postali jako ugrožena vrst, ma ne leh oni nego i si ki gredu pobirat šparogi. Onput san pročitala da j’ oven va Poljicah mila majka, aš pu njih je vuk ruvinal sedan janjac, a čoviku va Posedarju pol stada koz. Kuliko se domišljan, sedavnajst jarčić. Prč da j’ živ. Ala bar neš aš jadno ti je stado ko prča nima. Tu ni kraj, to j’ načinilo divo blago, a blago od ljudi je načinilo i huje. Zač huje? Pa zato aš vuk je rojen da to dela, ma čovik ni. Tako mane ni ćaro, i nikada mi bit neće, ča čoviku, a k tomu još i plovanu mora doć va glavu da zabije matafun koludrice. Zjedno da se ja izjasnin – ja san piknula koludricu kad mi j’ zalepila ćepu i potirala me z vjeronauka, ma ja san bila dite ko se ni dalo tuć nikomu osin matere, aš jedna je mama, i ja nisan plovan. Zbilja ne znan ča j’ tomu velečasnomu, komu zbilja titula paše kod mane taki, a još manje mi je ćaro ča j’ toj koludrice ka j’ rekla da niš ni velečasni – se je ona. Naglo j’ prignula pa digla glavu, zavrtelo njoj se je i našla se po tloh. Drek je tlo krivo, bit će da j’ kacot od velečasnoga sveta stvar pa se to ne računa. Kad san čitala ta tekst, nisan mogla verovat aš za nasilje va familje i mobing na delu san čula magari ga, srića od Boga, nikada nisan na svojoj kože osjetila, ma za on va crikve do sada nisan. I znate koga mi je sada najveć žal – tu nesnagu od plovana najmanje, tu bedastu koludricu ka ga štiti isto tako, ma sih onih dobrih plovani je, a takoveh vagun poznan. Znate i sami kakovi su ljudi, se spravljaju va isti koš. Najveći, nazovimo mobing, za koga san ja čula va našoj županije je bil on kad je jedan plovan koludrican namjerno pokvaril televiziju da ne gljedaju Santa Barbaru aš pokle toga je imel kumediju š njimi. Morda je bilo i pu nas nečesa jačega, ma ja ne znan za takovoga ča. Intanto, ni pu koludric ni »mir i dobro«.

I opet Zadar – Slovenac da j’ pucal po trajektnoj luke Gaženica. Policijot je nastradal, a toga nemoga slovenskoga pistoljera su lovili od deset večer do šest juro. Celo to vrime trajekti ni simo, ni tamo. Baš malo mislin kuliko bi va Teksasu lovili takovoga.

Va Ukrajine rat dura, pu mane doma primirje. Niki z nikin ne poveda aš smo dokončali da j’ tako najbolje. Sad baš mislin ka će od nas dve progovorit na rit ako ne na usta. Avah je tretemu.