Sobotu j’ Rika doživela još jednu ćepu. Ča da se baš va njoj silovane ženi i divojčice, aš nažalost zver ne gleda na leta, nazove ubojicami leh zato ča nisu otele rodit to stvorenje začeto va mržnje, a ne va ljubavi? Ni va komu delu ovoga svita ča se Zemljun zove to ne bi bilo ni lipo, ni va redu, a v Rike, ma kuliko govoreli kako vavek moraš gljedat ki ti govori, a ne ča ti govori, to ima još veću težinu. Me par da su saki kamik, i saki listić, saki trg i saki kantunić rekli – avah je nan.

Rika ne pozna, zaspraven, da se ispravin – ni poznala ovakov govor. More bit grešin. A i bit će da san noj, da san glavu rinula va pesak, da san kod oni ki se grdo pospravljaju spod tepiha pa to grdo jednoga dana eksplodira. Ne znan ča van reć osin da san tužna. I jadna san, a za iskreno ne znan na koga bin bila prvo. Krivci za ovakovo ča iman vagun. Sažet ću to i reć – kad i domaći misle da se velo dohaja z velegrada, onput od velegrada načine selendru. To se Rike dogaja zadnjeh let i to va sakomu pogledu, pa sad ki se prepozna, na njegovu dušu.

Ono ča njoj se nikada ni smelo dogodit je da njoj huji od njejih kroje sudbinu va sakomu segmentu – ćeš kultura, ćeš zabava, ćeš sport. Pulitiku namjerno nisan spomenula aš ona stoji zad sega nabrojanoga.

Nikada niš ni leh belo, nikada niš ni leh crno. Postoji i sivo, tako da ovo ča j’ rečeno sobotu va Hodu za život ni kraj svita. Znate da mišljenje i rit ima saki čovik, pa se po tomu i ravnajte. Ne pojida mane ta gospa ča stavlja on znak jednako zmed silovanja i prava na odabir sake silovane i nesilovane ženske će rodit ale ne, mane pojida ta govor mržnje ki mi va uši dohaja i z desna, i z leva.

Naravno da j’ ta izjava ka glasi – naše poruke su da život počinje začećem, a završava prirodnom smrću. Silovane žene koje žele pobaciti su za mene ubojice. Silovatelj je osoba koja je počinila kazneno djelo. Majka koja počini pobačaj je sebe stavila u poziciju ubojice. Ne treba jedan zločin završiti drugim – neš ča normalan mozak ne more probavit, pojida me to ča se mnogi spuštaju na njeji livel i odgovaraju istin bezumljen potkovanim mržnjun, a nisu takovi. Je, i mane je ženskica svojemi besedami hitila van škvare, ma san onda samoj sebe rekla – stani, to j’ njeji greh, tvoj će bit ako budeš kod ča je ona, ako budeš govorila z riti, a ne z glavi. Ako budeš njeji ubojica.

I fermala san. Ona j’ samoj sebe najveća kazna, ne rabin njoj ja. To ča njoj se krovna udruga ogradila od nje, ča njoj je zabranila korištenje loga i vizualnoga identiteta Udrugi, to su štorije za malu decu. I niš novoga. To je današnjica ka govori – kad mi rabiš, dobar, ale dobra si, kad zatafljaš, nisi moja ili moj, rod ni bitan. Tako je i z oven siroten gradon koga već stoljećimi si iskorištavaju za svoje ki put sitne, ki put vele političke igre. Hodili su po Rike mnogi ki je nisu bili vredni i ona j’ preživela pa će i sada. Jedino to me va celoj ovoj situacije tješi.

A ono ća me veseli je kolega Ranko Stojanac z N1 ki j’ svojin javljanjen pokrenul celu ovu priču. Ranko, moj naklon do poda aš ono z slušalicun va levomu uhu me je nasmelo, a ono »mislite vi to ozbiljno« mi je potvrda kuliki si ti zaspraven profesionalac. Nisan sigurna da ja na njeje besedi ne bin rekla »ovo mane ne rabi«, obrnula se i prošla. Intanto, generacijo – daj pet! To ča su pokla rekli političari, ovi ili oni ne lovi mi se uha niti me pojida.

Va kampanje smo pa kako i inače baš ne verujen, sad dan još manje. Ne zanimaju me ni fejsi, tviteri, jutjubi i slično aš to se skupa, pogotovo va ovo predizborno vrime sliči na lošu kanalizaciju koj bi rabila hitna sanacija i jedan kolektor. Ono ča me j’ va celomu ovomu korona maršu ale hodu, kako van drago, osin Ranka razveselilo su oni »Čunjići« ale skupina umjetniki ka j’ na sebe spodoban način umjetničken dogajanjen provala javnoste poslat poruku da su za slobodan život.

Finili su na policije, ma su i Tito, i Tuđman, i Mesić puno puti pa ča njin je falelo. Ove ki su kašnje ne spominjen aš ni njimi falilo leh nan. Poanta celoga ovoga moga današnjega lamantiranja je da j’ bilo žensko, muško, ale neopredjeljeno saki svoga tela gospodar.