Ma, kako j’ lipo kad samoj sebe rečeš da si vizionar. Neki bi rekli i štriga ale vešća, a mane jušto sedno ča bi neki real ale ne. Da san se na to obazirala već me davno ne bi bilo. Zač sad to povedan? Zato aš smo, moja prijatelica Gordana i ja pred čuda let zamislele da on kraj Krasice kade mi bivamo, a to su Vetrnjak i Randiška Višnjevica postanu sportsko-rekreaciono-zabavna zona.

Povedale smo kako bi rabilo od Hroljeva nazgoru načinit panoramsku žičaru i to na dva kraki – jedan da gre na Vetrnjak, a drugi na Višnjevicu. Onput da bi trebelo skopat i bazen negdere na Dugomu kusu, a kako j’ mini golf bil popularan zamislele smo i da njega nekamo zarivamo. Nogometno igralište smo već imeli, leh je rabilo još spod ceste va Hroljeven načinit jednu pozornicu, a kako ravnice lipo padaju, gledališće na škalini ne bi bilo problem. Zamislile smo mi još va Dražine i pejntbol, turističku rutu od bunkera do bunkera kod i speleološke akcije va Prazdanoj jame.

Čuda toga još smo smislele, ma se ja sega ne domišljan. Intanto, neš od onoga ča smo mislele pomalo dohaja na se, pa će tako njeji Vetrnjak i moja Višnjevica konačno postat VIP zone Grada Bakra aš, kuliko san imela čut, jušto va Hroljeven će ovo leto kantat vele hrvacke glazbene zvezdi. Najme, sa veća glazbena dogajanja z Bakra sele na Krasicu, pa ću lipo sedet na privratu, va VIP lože i naslihat Danijelu Martinović, Željka Bebeka i ča ti ja znan koga se ne. Ako mi se gre va kino, neću se morat poć patit v Riku, leh ću se kalat va Hroljevo i se četire vajer.

Ako me zanima sport, pod noson mi je. Ako bin na golf, istina ne na mini leh na veli, i to moren. Ako bin na jog, ki mi brani. Ma, prelipo i naredno. Naravno da j’ semu tomu va pozadine to ča j’ pol Bakra raskopano, i ni da ja sad mislin kako j’ Hroljevo zelo prednost Žalu ribari, ma čoviku se se to skupa lipo vidi. Iskreno, bila bin kuntenta i da su neki drugi sadržaji preseljeni na Hreljin, Škrljevo, Kukuljanovo, ma va ko god mesto prelipog bakarskoga prstena aš mislin da sako mesto to zaslužuje i ima potencijal za znest bilo ča od programa Margaretinog leta. A program je zanimljiv, za sagoga po neš i ki god reče da za njega ni niš ali je zvicijan do pakla ale je zločest.

Ma, vrnimo se mi nazada va Hroljevo. Sad malo mislin kade će ljudići ki dojdu na koncerti parkirat i domislin se da moru kade god okolo kapelice i okolo igrališća i da to neće bit problem. Onput mi napamet pade on zapis z fejsa va komu su posložili ča se turisti delaju po centru Splita i mislin si – ma to su tuji ljudi, nakramaju se i delaju kažin. Ni da mi ne pijemo, ma kuliko god da popili nikada takove šporkarije kakove su na toj snimke ne bi načinili. Ne govorin sad da smo mi rožice, ma još vavek znamo kad i kade se ča dela. Mislite da san va krivu? Pa, ako je i ka iznimka, to j’ leh da potvrdi pravilo. Intanto, vrime će pokazat, a ja san i dalje kuntenta i komać čekan da se z onoga davno zamišljenoga imaginarnoga projekta još ka stavka realizira.

Pitan mater, ča ona govori na to da će njoj spod kući kantat te vele zvezdi. Nezainteresirano se j’ obrnula, pitala – ke i kad san njoj rekla leh frknula z noson i va svomu stilu zabrontulala da ča ona ča mjavče, ča on ča j’ za va starački dom, a on treti da more pasat. Naravno, ona bi da njoj Thompson svira, ma ni ona ne more se ča poželi. Zaspraven je va depresije okol sega ovoga ča njoj se z Lukicun dogaja. Govori da namesto da mu dignu spomenik, da će ga još i vrešt klast.

Kad san njoj odgovorila da se Luka za to ne pojida aš zna da ako do toga dojde, da će se branit slobodi aš da će mu ona jamčevinu platit zakramala je krpu va me i kod i vavek zazijala – takova telica se j’ leh pu mane mogla rodit. Tu smo fermale.

Kada će fermat ovi radovi kraj Novoga lista, ne znan, ma ako poduraju ne samo ča će skopat do središta zemlji leh i se ono brižno drveće ko j’ još ostalo.

Tuliko trese i buči da mi nogi vibriraju još uru pokle leh dojden doma. Kad malo bolje promislin, morda to i ni tako loše aš ne rabi plaćat masažu, a za uši vavek postoje čepići.

Strpljen-spašen i ne pozabite da j’ novo in mesto ovoga leta – Hroljevo.