Moja prijatelica Gordana već puneh četrdeset let, a i ko preko, za saki Prvi maj dobije – maj. Za one ki ne znaju, a mislin da to si znaju, maj klada mladić divojke na dimnjak ale kočul, a ako j’ malo stareji pa ga škina prekida i ni baš siguran na visine, onput ga zapiči kamo god – ma ga klade. Tako se j’ i mojoj Gordane ta maj zadnjeh let pomalo kalival pa j’ najkraj finil zagnjeten va kvaku na vrateh od garaži. Ma, koga briga kade je maj, bitno je da postoji, a ono najbitneje je da j’ ta isti ča ga sa ta leta donaša – živ. Moran bit iskrena i reć da san ovo leto pozabila pratit ta slučaj, ma kada san videla njeju objavu na sakramenskomu fejzbuku – prelipe rožice na garažneh vrateh – bila san kuntenta koda mi j’ neki dal ki zna ča. Lipo mi se j’ videlo i radi nje, i radi čovičića, i radi same užance ka opstaje. Ne znan ako j’ još ka divojka na Krasice dobila maj, ma znan sigurno da j’ moja Gordana rekorderka. A, zamislite, mi sa ta leta ne znamo ki j’ ta tajni obožavatelj. Sumnjamo na neki, ma dokazi nimamo. Intanto, ki je da je, saka mu čast i neka još puno maji poživi i kruni kuću od moje prijatelice.

Kada smo već pu krunidbi, moran reć da nisan nikakov fan od takoveh ceremonij, ma da san kurijoža i volin znat – to san. Fora mi je ona snimka od engleskeh želježnic kade Čarls i Kamila, ale kako bi moja mat rekla – Kamamila, seh pozivaju da prate njihovo krunjenje, žele njin lip vikend, a onput Čarls još i upozorava ljudići da obavezno drže razmak zmed sebe i vlaka. Razmak zmed sebe i onoga najvećega dijamanta su mogli držat Englezi pa sad ne bi imeli problema z onimi kemin su ga, ako ćemo pravo – ukrali. Ma, pušćajmo sada to, vrnimo se mi Čarlsu i Kamamile. Ne znan kako se oni ćute kad vide na ča su ih se namontirali. Gljedaju nas z kikaric, lončići, haklaneh pupic, privjesak i seh oneh kič vranići ki inače prate ovakove kič priredbi. A to ča su 1953. leta kada se j’ krunila pokojna kraljica klali premalo harti za rit otrt, dobra je škola za ovo krunjenje. Dakle, harti i kondoti ne sme falet aš ljudići od silnoga uzbuđenja često gredu na stran. Ne bin rad bila va kože onemi ki budu morali čistit okol Westminstera. One dve Merikanki ča već par dan kampiraju tamo, zgljedaju jušto koda najveć dolari troše na tu spominjanu hartu. Ma, neka i to pasa, neka se ljudi vesele i neka Bog čuva i kralja, i kraljicu, i seh nas.

Ono ča moraju čuvat, odnosno ono na ča moraju pazit si oni ki zadnjeh dan putuju z Hreljina ale Praputnjaka v Riku su živci. Gljedan malo ovu malu Cibićku, našu lektoricu ka saki dan za doć na delo i z dela doma potroši već vrimena nego da biva va Senju i dohaja v Riku. To j’ okolo kole pa na mića vrata, ale kako bi stari ljudi rekli – od Poncija do Pilata, mada mane nikada ni bilo, nit će mi bit ćaro zač od Poncija do Pilata kad je to jedan čovik. Intanto, Cibićka putuje, putuje i nikako doć aš najprvo dojde do Krasice, pa gre nazada na Škrljevo da bi se spušćala na obahajalnicu, pa na Meje vanka, i tek onda doma. Ako gre zadnjen buson, onput još posjeti i Kukuljanovo. Mala j’ prava landravica, ma se pasa pa će i to, a kako j’ za boljitak cele zajednice aš cestu preko Praputnjaka koristimo si, onput se brižno dite potrpi i niš ne njurga. Moren mislet ča bin ja zdelila i ceste, i zajedničkomu dobru i sen skupa, a ona leh zdigne ramena i govori – a, dobro je, pasat će i to. Ča su van ti mladi. Rad bin ju videla kad bude imela let kod ja, će i onda bit tako debeleh živci.

Debeli živci rabe i našemu presjedniku aš ja ne znan kako bin ja reagirala da mi se j’ šundral avion, a ja moran poć na krunidbu. Ki zna ako ima kasko i ki zna ako će sad poć, a ako će š čen će poć. Ne bin mu rado bila va kože kada mu prva dama počne brojit okol uha, aš ako j’ ženskica već haljicu za krunjenje kupila, mora poć. Ako ne gre to njoj je strošak za bez veze. Uostalon, ki će se već krunit da bi ju mogla obuć. Jedino morda kad presjednik i premijer okrune svoju svađu odlukun da se već neće karat i da j’ stend ap šou finjen. Moran priznat da bi mnogi takovun odlukun bili zadovoljni, ma ne i ja aš mane niš ne more nasmet kuliko njihova prepucavanja. Mat mi uža reć da se okol njih smejen kod rit na nove gaći. A kako ona zna kako se rit smeje novemi gaćami, to zbilja ne znan. Ako vi znate – povejte mi.