Ako niste znali, za zapiranje naše mlekari kriva j’ država. Tako tvrdi naš gradonačelnik, a ako ki zna, onput gradonačelnik zna. Uostalon, pu nas, ako nisan ja kriva, sto posto je država.

Tako j’ država kriva za se rečke poduzeća ka su nekada bila na vrhu pa su najedanput nestala. Ne moren van reć kuliko mi j’ drago ča sad baren znan ki j’ potaracal još jedan rečki brend.

Valje mi j’ jedan sled lagje. Za pravo reć, ni da država ni pripomogla va semu tomu, ma da j’ jedini krivac, to sigurno ni. Intanto, bil kriv ov ale on, mlekare više ni.

Živela j’ 75 let, je mogla još ale ni, to neka neki drugi misli, a da san žalosna ča j’ nestal još jedan del moga življenja – san. Ala, domislite se kuliko j’ generacij to mleko pilo, jogurt jilo, a o posnomu siru ki j’ bil najbolji va svemiru, da ni ne govorin.

Ma, tako je, kako je i tu ni povratka. Ono ča me jako zanima je ča će zniknut na njejemu mestu. A da neš će, to j’ sigurno. Niki me ne more uvjerit va suprotno. I tako, usahnula j’ rečka mlečna staza, a ča bude – bit će.

Gradonačelnik je rekal i da kreću se pripremne radnje za novi autobusni kolodvor. Fala dragomu Bogu. Ono ča ja sad delan je – skupljan 66 milijun kun da od grada kupin zemljište, načinin novi kolodvor i garažu, pa da konačno va životu neš ostvarin.

Od koga ću posudit, kako ću skupit ti soldi ne znan aš niman baš jako ča prodat, ma nada umire zadnja. Uglavnon, ako ki ima soldi viška, neka mi se javi.

Kada smo već pu umiranja, baš mi j’ bilo grdo čut da Hrvacka, od zadnjega popisa stanovništva ima dvajset hiljad ljudi manje. To su dva grada veličine Opatije.

Nažalost, ni deca se već ne rajaju va broju ki bi bil zadovoljavajući pa dugoročne prognozi nisu ni malo dobre. Na to kad će ki umret niki ne more utjecat, ma na natalitet, e to se more.

Da mladi imeju delo, da imeju kade bivat, da njin deca imeju mesta va vrtiću, e pa onda bi se morda i brojčano stanje promenilo aš, ruku na srce zmed ženskeh i muškeh se isto gre od kada je svita, ove druge, ča bi se po domaću reklo »egzistencijalne stvari« su vrite.

Oni ki su jako zabrinuti za opstanak svoga otoka su Ilovčani. Slučaj Mrtvaška je svoj del imel i va Opatije. Slučajno san pasala i videla da spred Rojala va komu j’ bila županijska skupština stoji se pokretno stanovništvo Ilovika, trumbeta, govori, pjeva i protestira.

Pitala san jednu od njih ako j’ opće ki na otoku ostal, a ona mi j’ rekla jušto ovo – jedna starica od 95 let, njeja svekrva ka ima već od sto komadi blaga, dva od keh neki ima šundranu, me par nogu, a drugi mora skrbit o njimi i oštari.

Na to san se našalila da j’ tatimi, da su šegavi bilo poć na Ilovik, pa bi morda našli i dolari z 19. stoljeća. Intanto, ne pačan se va ta slučaj aš nisan pratila, ma da su ovi z Ilovika našpanani i glasni da njin ni razglas ne rabi, to j’ istina.

Će uspjet ale ne, će Mrtvaška od Ilovika načinit mrtvačnicu, ne znan – vrime će pukazat.

I da ne bi se bilo vrite, još ćemo malo potambaškat o proslave Prvoga maja ka se j’ z Ronjgi preselila na Trsat. Majčice mila, da san mogla čut mišljenje Frankopani o tomu da njin puk fešta spred kući.

Evo, vidite da si ki reču da ja nisan normalna zaspraven imaju pravo, aš namesto da mislin o fažolu i slično, ja mislin o tomu kako bi se Frankopanon se to videlo da su se mogli stat.

Oni ki su bili na proslave govore da j’ bilo baš dobro i lipo, da fažola ni falelo i da j’ odluka o preseljenju slavlja, odnosno zibrano mesto već leh dobro pogojeno. A ča ne bi bilo – elita va kafić na Gradinu, a puk na jog i si kuntenti.

Proslave Đurđevdana ni aš Ciganon, ja iman dozvolu da jih tako zoven zato se ne dižite valje na zadnje nogi, ni do slavlja.

A ako najveselejemu narodu z najtužnejemi očijami ni do slavlja onda j’ zaspraven se šlo mater ženit, da ne rečen on huji oblik ove uzrečice. Sedno, sen njin srićan Đurđevdan ale Ederlezi uz želju da bude bolje.

Kako će bit onemi našemi na finalu šoa »Zvjezde pjevaju«? Bit će njin super ako si mi obavimo lokalpatriotsku dužnost ka glasi – zovi, šalji poruki, goluba ma ča god… I baš malo mislin kako su trebali za finalni nastup zibrat pjesmu »Tonka, reci…«, nažalost ne cvrčak, leh zbogom.