Čera san došla na delo ono ča bismo rekli – ni vrit, ni mimo. Va glavine mi j’ fanj bilo mutno, ča sopeta i ni niš novoga, aš retki su dani kada mi j’ se ćaro. Nisan bila od veloga govora i najraje bin da me si puste na miru i da kljucan po tastature bez da me ki ča pita i bez da ja koga ča pitan. Ni va živo, ni na telefon ale bolje reć telefonin kako j’ mobitel odvavek zval Franci Blašković z Gori uši Winnetou. Se domislite te legende hrvacke alternativne glazbe z Pule i mnogeh dječjeh emisij z HTV-a, a i z izvlačenja nagradnih igar Novoga lista? A da ča leh se domislite. Nego da se mi vrnemo na ta moj čerašnji dan zvan pust me z miron. Šla san po obed – sengvić i po čašu mrzle vodi, posela se, poobedvala i važgala makinu. Već doma san videla ča j’ va hrvackoj sabornice, da j’ Bulj sopeta bil vragolast pa mu j’ Jandroković iskopčal mikrofon i klal ga »va kantun«. Videla san i da j’ oporba ka j’, kod i Bulj, iskala izvanredno zasjedanje radi štrajka pravosuđa i plinske aferi demonstrativno prošla ća, a pročitala san i da su pokle toga komentirali da njin je to dobra skuža aš da njin se preši na ferije, a i da j’ gnjeta na A1 pa da ča prvo krenu će prvo i doć do mora. Intanto, sabornici žele i će poć na more, a me par da blagajnica z onoga filma ni ovo leto mora neće videt. Ma, kad se domislin na on kažin va kosovskomu saboru kade su se polevali i bubetali onput je naš z izvarednun sjednicun i bez nje – mila majka.

Dakle, se san to prvo leh san došla na delo pročitala, a va teh desetak minuti kuliko mi rabi od Kastva do Novoga lista, mreža seh mrež mi je pukazala da se niš jako bitno ni dogodilo. Onput san oprla mejli. A njih vagun, pohitala ća oni ki me se ne tiču, spravila oni ki mi rabe i va celoj toj hrpe videla jedan ki j’ zaslužan da mi j’ čerašnji dan od onoga »ni vrit, ni mimo« postal jako lip. Ta mejl van glasi ovako:

– Dragi moji NOVOLISTOVCI! Iskrene čestitke povodom 25-tisućitog broja i želja da takvi i ostanete još toliko! Kao što sam već više puta rekla – za mene dan bez Novog lista ne postoji. Prvo što sam napravila, poslije izlaska s dugotrajnog liječenja, bio je odlazak u prvu trgovinu i po onom sloganu bilo je: KRUH, MLIJEKO I NOVI LIST! Srdačan pozdrav

Miroslava Mira Vlacich s Kantride

Teta Mira me je jako razveselila i dala znat da to ča delan, već više od četrdeset let, ni bez veze delo, da ga ipak neki cijeni i poštuje. Ako već ne i moja mat. Najme, lipo j’ znat da neki čeka i voli to ča napišeš aš jedino tako sa ova besmisal ka se va zadnje vrime tače po celomu svitu postaje smisal. Tako, hvala teta Mira z Kantridi, ča ste nas se domisleli.

A ča se tiče drugeh stvari od kada smo se zadnji put čuli ale čitali va ovomu kantuniću – ma, niš baš jako novoga. Leto je, sako mesto ima svoje zabavi, svoja dogajanja i si su nekako našpanani koda nikad do sada leta ni bilo. Gnjeti su po cestah, po plažah, po kafićih… Delavci va turizmu broje i zbrajaju turisti i po sen sudeć, si imaju rekordnu posjećenost tako da mi baš i ni ćaro kad pročitan da tomu baš i ni tako. Intanto, ni me jako ni briga je al ni, ma kuliko moren videt na Korzu je već straneh leh je domaćeh ljudi pa će bit da smo mi va rekordu, a ča j’ dalje na jugu – niman pojma.

Večeras Danijela Martinović ne da kanta va Hroljeven leh i rođendan slavi, a ja ne morem bit tamo aš iman nekakovu neodgodivu obavezu, ma ne pojidajte se – iman ja svoji ljudi ki će mi povedat i ono ča me zanima, i ono ča me ne. Nisan dospela pogljedat ni ti sakramenski »Duhi« na Kastafskemu kulturnomu letu. A dve predstavi su bile. Kako bin mogla kad delan do devet, a predstavi na devet počinju. Sedno san šla na kafe va Art pa san malo gljedala si ti ljudi ki su se spušćevali kada j’ finilo. Zaključak je da ljuden fale amaterske predstavi na čakavskomu aš san imela dojam da se z vrha brega ka dnu tače cela Kastafšćina. Tako j’ bilo i drugu večer. A ljudići si veseli, nacifrani koda na rendes gredu, dobro raspoloženi i kuntenti. Magari i na nevijeno, čestitke sen ki su va tomu projektu sudjelovali.

A ča se tiče moje materi i pu nje se po staromu – klima dela, a oprt i balkon i poneštra aš mora bit zraka. Ki bi rekal da Antuntun ima tuliko svojini.