Bila san na ferijah. A ja, i blago ima vrime za počinut pa zač bin ja bila zakinuta. Kad san se vrnula si me pitaju – kade si bila, ča si delala, si se zabavila, si kamo šla, si ovo, si ono… I ča da njin ja sad rečen – istinu ka glasi da se prveh šest dan nisam mogla navadit da ne delan, zadnjeh šest dan da se moran vrnut na delo, a ona dva zmed teh faz san lovila vlastiti rep, ale da zmislin čagod. Recimo da san šla na put okol svita va petnajst dan, morda da san te dve šetemani peglala i snažila po kuće pa da se si znatiželjni zbate od šoka i vjeverice ale da se leh tajnovito smijuljin pa neka si misle ča god će. Finilo je tako da san rekla kako san komać doškala da se vrnen na delo aš da mi ni nigdere tako lipo i takov mir kakov je va Zvonimirovoj 20a. I rekla san istinu aš nigdere mira kakov iman kad se zabijen va svoja slova i mlatin po tastature. Sukladno z maloprvo napisanen mane ni malo ne pači ono ča mnogemi pači, a to je računica našega premijera ka ne štima.

Najme, šjor AP je rekal da će pomoć poslodavcen okol povećanja minimalca tako ča će dva radna dana va šetemane financirat država, a tri poslodavac pa su se mnogi zapitali ča će bit z onemi ki imaju šestodnevnu ale sedmodnevnu šetemanu. A ča će bit, pa volontirat će. Tr va ovoj zemlje više manje saki od nas na svoj način volontira. Mislin na običan puk, on neobičan nima potrebe za ten, a nima baš ni razvijenu tu socijalnu empatiju. Volonter se zna ki je – on ki se daje nesebično kad god rabi, a ne onaj ki se zima sebično kad god dospene.

Ma, dosti filozofije, gremo mi malo pomest na vlastitomu privratu pa ću van ja zajedno reć da j’ ki’vo dan moja mat obznanila da j’ počel Treti svjetski rat. Zač? Pa ovako j’ to bilo – jedno jutro mi je doletela va kamaru i zazijala, ča se ne staneš, ča ne čuješ da lete avioni. Prekinula me je va najdubljemu snu aš mane j’ devet jutro sred noći, a njoj je debelo počel dan. Pitan ju ki avioni, kade lete, kamo, ča…

– Da ki avioni, tuliko su nisko preleteli da su nan skoro i dimnjak zrušili, a ti ne čuješ. Avah je mane ka te iman, odgovorila je.

Za to vrime ja san se već z ležećega položaja prehitila va sedeći, a i mozak mi je z lera hitil va prvu pa san odgovorila:

– A, ti avioni! Ma ne pojidaj se, to provevaju ovi rafali ča su jih kupili. Ni to počel treti svjetski rat.

Frknula j’ znoson, zanjurgala na prvoga čovika od vojske aš da ni red provevat avioni, a ne obavjestit svekoliko pučanstvo aš da j’ njoj skoro srce stalo od straha. Mada i dandanas ne znan su ti avioni opće postojali, sad znan š čen ću ju strašit kad počne zijat na me – znet ću z interneta zvuk borbeneh avioni i dočin počne zijat ću ga pušćat pa ću ostatak dana bit na miru.

Ono ča ju još jako pojida je to klizište na Pantovčaku, aš telica kakova san ja, ne razume da nan more otklizat cela država aš tamo je predsjednik, a kad projde glava kući, ode i kuća, govori ona.

– Mama, ne pojidaj se, saki predsjednik pa i ovaj more otklizat leh na izborih ale nedaj Bog mu ča bude, a onput narod bira novoga i finjena štorija, a ča se tiče predsjedničkeh dvori, kako bi rekal jedan naš pokojni general – načinit ćemo još stareje i lipše, govorin njoj ja.

Leh je spomenula opet Majku Božju od sedan žalosti i nje osme aš ima ovakovu kod ča san ja i počela navrezat o tomu malčiću radi koga cela škola ne gre va školu. Pita ona mane va čemu je zaspraven problem va celoj toj priče. Iskreno njoj govorin da ne znan preveć o semu tomu ma da mi se čini da su institucije kasno počele djelovat. Vrti z glavun i odgovara – mane se čini da su tu si kasno počeli djelovat aš ako san ja takovu kod ča si ti klala na pravi put onput se more sakoga.

I tako san dobila još jednu uvredu, ni kriva ni dužna. Malo san se ofendila, ma ona to ni ni primjetila leh je nastavila mašit i o tomu kako san se i ja volela potuć va škole, ma kada bi ona čula za to da bi mi bila rit črljena, altroke ona od majmuna, pa bi naredno leto dan bila na miru i ona i ja. Kako se decu od maleh nog mora navadit lipomu ponašanju i ča se sme, ča ne, a ne mu pušćat da dela ča će i čuda toga još je rekla, a onput i onu ključnu ka j’ glasila – se gre od familje, a mat je ključna va odgoju diteta. Sad znate ki j’ zaslužan ča san telica, nesnaga, lenoba i na metle pometena.