Tramp je dobil izbori. Mat je zadovoljna aš je još na početku kampanji rekla da će tomu bit tako. Kad san ju pitala da zač misli da će Tramp bit precjednik odgovorila je – zato aš je ova ista stara. Dobro da nisan na rit pala aš kuliko znan Tramp je već ohoho žen imel, ohoho toga pojil i popil, vagun solad zaslužil doklen se Kamala, ku ona zove Kamila, još ni ni rodila.

Pitan ju da kako ona to misli da j’ Kamala stara, a Tramp je od nje stareji 28 let. Ona odgovara – to j’ drugo, on je muško. Eto, tako da se zna da nisu leh »neobrazovani mladi muškarci« Trampu donesli pobjedu leh va Merike živeje milijun ovakoveh kod ča j’ moja mat i jušto takove su za njega glasale.

Intanto, mat je zadovoljna Trampom, a ako j’ ona, onput san i ja aš ćemo se imet okol česa kosmat i to na svjetskoj razine. Ča se tiče lokalne, tu smo si već se rekle pa nan Kamala i Tramp dojdu kod naručeni.

Leh da van još rečen kako san njoj rekla da j’ Tramp z Trampova brega po ocu, a ona me vrit poslala i da j’ Melanija poslala velu tortu svojemi va Sloveniju pa san još jedanput finila vrite. Aš da nismo nas dve skupa ovci na pašu peljale i da se mora znat ki j’ koga rodil i zgojil i koga se mora poštivat, a ne ga delat bedastin. Moj odgovor je bil – razumen.

Onput san njoj rekla da počinju serije i da proglašavan primirje, a ona odgovorila da su te serije za blaga, a ne za normalni ljudi aš da se va njimi ne zna ki s ken spi, ki komu o glave dela, a to da neki ima dve ženi, a ni z Arabije, to da ni pas z maslon ne bi pojil. Intanto, stalno njurga, a smiron gljeda kod i on Masteršef, a tamo njoj niki ne zna kuhat.

Naravno, osin nje – masteršefice od rojenja. Kad se to odgljeda i, naravno, sega njin zdeli, lipo projde mirna i spokojna spat. Ne rabi njoj, citiran ju – nikakova ta sranja za smirenje ča po televizije reklamiraju.

Ne bi dohtori za glavu od nje nikada soldi videli. Ča se pak tiče ostatka svita, moran priznat da mi se j’ jako zapijažal osvrt od kolegi Igora Duvnjaka o rečkoj žile kucavice ale Korzu nekada i sada. Znan da sako vreme nosi svoje breme, ma da j’ baš sila na celomu Korzu imet leh butigi od oćali, dolnje robi i one za lokilo i žerilo, e, pa zbilja mislin da ni.

I slažen se z Igoron da bi neki slučajni prolaznik, kada bi to videl, lahko mogal zaključit kako va ovomu gradu bivaju oni ki slabo vide, imaju šupe dolnje gaći i lačni su i žejni. Ma ono ča mane puno više pojida je to ča će mi Kontinental dobit i prezime – i to »Handwritten Collection hotel«.

Oprostite, ma mane to »hendvriten« zajedno asocira na rit, a sad je bolje da ne gren dalje i ne povedan kako mi j’ zajedno palo napamet »ličko rukovanje«, a malo kašnje i kolonoskopija. Uglavnon, ča j’ falelo imenu Kontinental?

Ča su mu morali bilo ča dodavat? To ni leh ime, to j’ komadić sušačkoga i rečkoga identiteta, kako bi se po modernu reklo – brend! Mesto na komu san provela celu svoju mladost, okol koga kad i danas pasan mi srce poskoči, mesto va komu i okol koga su već od stoljeća nastajale štorije, domišljanja – povijest.

I zač opće ime na tujen zajiku kad je naš zajik tako lip, i va standardu i va dijalektu. Pa moja roditeljica to va sto životi ne bi uspjela reć. Njoj i mnogemi će to bit hotel »Vrite«, pa komu pravo, komu krivo.

Ma, pušćajmo sad i hoteli i imena, gre nan otakalnica. Bit će veselo. Va Grižah je već počelo i čujen da je bilo lipo. I dobro za popit i dobro za zabavit se. Pokle toga dohaja Mikula, pa Božić i Novo leto, onput Tri kralji i moje vrime – maškari. Veselje!

Istina, va ku god butigu da zajdeš pomisliš kako si prespal mesec dan i da j’ ta drugi dan Božić, ma se to j’ već normalno i bit će se doklen se jednoga dana va izlogu ne pomešaju uskrsni zeci, bade kostimi, okrunjeni jelvići, bundeve i karnevalski kostimi.

A i to će onda bit normalno. Ono ča mnogemi ni normalno je da se karte za Orašara čekaju od četire jutro do pet zapolne i da na črnomu tržištu koštaju i do 500 eurih. Ma, mane to veseli aš to znači da va ovoj zemlje ima još oneh ki mare za kulturu. Mada tako ne zgljeda.

Leh još da pozdravin šjor Slavka Maleševića va Sidneju i gren vriten.