Još se ni rodil, on ki bi sen ugodil. Tako nekako gre poslovica. Priznan da mane ni lahko po volje načinit aš vavek mi neš pači i vavek najden neš nač ću zanjurgat. Mat mi uža reć da ni od mane ne trebe jaricu držat, ma ča njoj to značilo, a dočin je ona rekla, ćaro mi je da ni nikakov kompliment. Intanto, već danimi vodin tihi rat z kolegami na delu ki su zimogrozni – vane osamsto stupnji, a oni mi zagase klimu aš da njin pači, da njin je zima i ča ja znan ča njin je još. Pa ča mi ni dosti da iman doma jednu ka kad ja takan klimu širon opre i vrata i poneštri leh moran i na delu zijat. Ma, jasno j’ mane da nismo si isti, ma oni kemin je mrzlo moru se obuć, a ja ne moren sebe kožu suć. Užan zijat da neka na delo ne dohajaju polugoli i bosi leh da kladu čarapice i tenesice i bit će se OK. Jedna ima tenesice va ladice pa kad nogi počnu zest, lipo zuje šlapice i klade tenesice. Ona j’ savladala gradivo, ma ostatak susedstva na delu još ni pa sad imamo, ča bi političari rekli – kohabitaciju. Poneštri su trdo zaprte, klima je na jedan, a kad ja gren pušit na balkon, onput je kladu na nulu. Morate priznat da smo bolji leh su oni dva z vrha državi ki kohabitiraju – nikada.

Kad već spominjen vrh državi onput ne moren da ne spomenen izvanrednu sjednicu z kun je presjednik dobro zapapril sabornikon aš još se takoreć nisu sukli va kupaći, ni njin rit mora okusila, a već su morali nazad va veštid. Seh ih je vrnul va sabornicu, a onput rekal da on neće doć aš da nima ča tamo delat, odnosno da njegov dolazak nima nikakove svrhi – da bi ionako na početku pročital ono ča j’ napisal i poslal i da to nima smisla. Kad malo bolje promislin tr čovik dobro govori. Ako inače pljuska ov put mu je saka na mestu. Ma da se ne bi prestrašili da se j’ za skroz odrekal zabavljačke profesije leh ću vas domislet kako j’ prokomentiral nekidanje nevrime va Zagrebu. Rekal je da ni ni znal da j’ nevrime doklen ga parona ni zazvala i dala urdin da gre robu pokupit z balkona. Iskreno, sad me malo i pojida aš ako ni čul ča se vane zbiva onput bi pod hitno trebel poć dohtoru od ušij, a more bit da se i on, kod i ja pravi da ga ni, odnosno igra se one »ne vidin, ne čujen, ne komentiran«. Va ovo zadnje čisto sumnjan aš teško i mane gre ta igra, a mislin da njemu još teže.

Nego, vrnimo se mi sopeta va Sabor. Moran priznat da me j’ sam početak sjednice nasmel. Mislin na on pogovor o Jandrokoviću, njegovemi mišićimi i kupaćemi gaćami. Ki bi rekal da j’ naš Jandroković tako smešan čovičić. Čovik bi se va njen prevaril. A more bit i ne bi, more bit je humorističan leh va izvanrednemi situacijami. Morat ću pitat susestvo na Krku. Ono ča mi opće ni smešno su napadi na klimatologi i prognostičari. Si sad najedanput govore kako niš ne znaju, kako bi baba Vanga i vidoviti Milan bolje prognozirali kakovo će bit vrime i slično. Ljudi moji, pa nisu ti klimatolozi i prognostičari krivi ča vetar obrne oblak i preseli frontu na levo, a najprvo j’ se govorilo da će poć desno. Pa nimaju oni direktnu vezu z Svevišnjen, Svemiron, Prirodun ale ča ja znan s ken se ne. Ljudići delaju svoje delo korektno i stručno, a to ča smo mi si skupa načinili kažin od sega ča nas okružuje, e, pa za to nisu oni krivi. Krivi smo si sami i zato nan je tako kako nan je. Recimo, si mi malo stareji, da ne rečen stari, i bez prognoze znamo kada će daž. Recimo ja to znan po tlaku koga niman aš kada san skroz potloh, ni šanse da bar dve kapi dažja ne padu, a ako mi još i kosti zaškriplju i bole, e, to j’ već znak da bi moglo malo jače nevrime. Uza se to ako i glavina boli i dela mi on osjet koda san cela va balonu, e onput će bit prava šoprnada. Tako ja osluškujen svoje telo i čekan – ča bude, bit će. Moje »prognostičke karti« retko kada zakažu.

Moja mat, ka gljeda se vijesti i nasliše saku prognozu na sam spomen mogućnosti grmljavine zapire se poneštri, sa vrata, zima stolčić i gre sest va špajz. Ta se ne boji ničesa, ma ako neki leh reče – grmljavina, ona j’ već va svomu skloništu i ne zihaja doklen ni sto posto sigurna da j’ prepasalo. Zaspraven, ni ni bedasta ča j’ baš špajz zibrala za sklonište. Tamo vavek je ča za pojist ako nevrime podura – i čokoladica, i keksić, i bombončić i sok i se ča ona inače voli. Ča će reć slatko. Rekla san njoj da jedino slatko va kuće ko j’ sigurno da neće pačat san ja. Znate i sami da j’ njeji odgovor glasil – telice! Do idućeg dažja budite mi suhi i veseli.