Seh oneh ki komać čekaju čut ča j’ novoga pu gospe Ane, njejih kokoš ale šjora Mladena i njegovoga prča, moran razočarat aš ni od jednoga, ni od drugoga pasanu šetemanu ni bilo ni pisma, ni razglednice, a ni niki drugi ni našal za zgodno zazvat me. Če će reć da je, ča se južine tiče, bilo mir i dobro.

Mir i dobro ni bilo po pitanju kršćenja deci aš je jedan rečki plovan rekal svoje odlučno ne kad je trebelo krstit dite istospolnih roditelji, ko je pritom začeto umjetnun oplodnjun.

Cela j’ nacija o tomu povedala, se oštarije i si ćakuloni. I oni ki imaju ča za reć, a još već oni ki nimaju pojma ča govore. Intanto, zdignula se vela prašina, a ja san leh naslišala i čudon se čudila okol nekeh ljudi za ke san mislila da su normalni, a ispalo je da baš i nisu.

Jedan kolega je rekal da ako se dohtori moru pozivat na priziv savjesti, da se more i plovan. Jedan drugi je rekal da j’ on bil na mestu od roditelji toga diteta da bi mu zatukal takovu ćepu da bi se još i sad vrtel. A ta inače ni nasilan.

Ja san leh rekla da bin se ja obrnula na pete i prošla u miru aš ako neće ta plovan, našal bi se neki ki će. Usput bin napisala prosvjedna pisma semin crkvenemi institucijami, ale kako bi jedna pokojna s Krasice rekla – šla bin do papi.

Intanto, žal mi je ča se takove stvari dogajaju aš dite ne bira ni kako će se začet, ni pu koga će se rodit, kod ča ni ti roditelji nisu zibrali da budu to ča su. Uza se dogmi, si smo mi Božja deca. Bar bi tako trebelo bit.

I doklen ovo dite plovan, za koga j’ moja mat leh pitala – kade će mu duša, ni otel krstit, pedofili, ki pogotovo va crikve nisu retkost, bez ikakovoga problema moru poć delat za opće dobro ni manje, ni već leh va dečju ustanovu.

I onput se na se to javi ministar rada, socijalne skrbi i ča ja znan česa još i šegavo zaključi da se dogodil propust. Ma, srića da se ni dogodila katastrofa, to ja odgovaran.

Intanto, ministar govori da su va procedure neke izmjene Zakona, ma mane j’ zajedno napamet pala ona o magarcu ki j’ čekal da detelina naraste, a kada j’ narasla, magarac je krepal.

Mišljenja san da pedofili moraju bit va ustanove, a ne na radu za opće dobro. More bit i ja sad nekomu zvučin kod fašist, ma jednostavno mislin to ča mislin, aš mi ni hujega leh kad neki maltretira i zlostavlja slabejega od sebe.

Jako san osjetljiva na decu i starci. Onput me je šokiralo, a i razjadilo to ča se j’ dogodilo va Novskoj. I opet su zakazale institucije, i nikada niki neće odgovarat za nečigov život koga j’, da j’ delal svoje delo, more bit i mogal spasit.

Namesto da gremo naprvo, mi se vraćamo va ona mračna vrimena srednjega vijeka va kemi j’ žena bila tretirana huje leh blago.

I opet on isti ministar od rada, socijalne skrbi i još nečesa poveda kako j’ šokiran aš da j’ poznal i žrtvu i ubojicu, spominje sigurnu kuću ku mora imet svaka županija, a va šest jih još ni, namesto da za uši potegne se one ki su mogli, a nisu – sprečit ovu katastrofu.

Naravno da si peru ruki i prehićuju odgovornost na drugoga, ča ni niš novoga.

Sad ću van još povedat zač san srićna ča nisan ruski oligarh. E, pa zato aš oni va zadnje vrime masovno umiru. Si govore da se dela o prirodnoj smrte, pa mi se čini da j’ med njimi zavladala nekakova čudna epidemija.

Nemojte mi zamerit ma kada san čula da j’ ov zadnji, ako va međuvremenu još neki ne umre, umrl »prirodnom smrću pri padu z balkona« na vas glas san se počela smet. Brzo san se posramila, ma morate priznat da j’ formulacija više leh nema.

I sada ću finit z črnemi stvarimi i hitit se na valcer.

Neću, kod Vučić, poć na samanj vina i zijat da san popila sto čaš i da mi niš ni, a usput nakramana rivat ljudi okolo sebe, leh ću van reć da su Ožbolti dopeljali osan metar drv, da su dečki z kvarta već pol posložili da se prosuše, a za drugu polovicu nisu imeli lazno i da j’ metar drv va dva meseca z 450 kun krešil na 550.

A i dečki z kvarta su digli svoju cenu pa me ta drva koštaju kod svetoga Petra kajgana. Ča mat govori na se to?

– Ki se će teplit, mora i platit.

Eto to govori i smiron namalja kako smo trebeli naručit deset metri aš da ča ne naslišen kako j’ nestašica sega pa i drv, pa da j’ najbolje da nakrcamo drvarnicu. Baš malo mislin kuliko mi j’ balkon dugo od poda. Bože mi oprosti.