Neki se j domislel na Fejse opret kot neku grupu »Grezo po domaći«. Kot i judi i zajiki su jena vela zmeša i trebe fanj okol teh i oneh malo dajeh zajiki navadit, čuda knjig od te struki pročitat, i, onda morda neš zaključit.

Sreća naša imamo mi ovdeka doma fanj jako obrazovaneh lingvisti, i akademkinju, imamo i gramatiku i rječnik. Smiljane, hvala ti! Ono ča me je navadilo, ale od kega san najviše navadil, naš lepi, fini i jedini naš domaći zajik su judi prez neke vele školi, dugo od blesave televizije, ale fejsa. Na fakultete to mi je bil glavni putokaz i ni me bilo sran polagat se na domaćen staroslavenski zajik, povijest jezika, dijalektologiju, stariju hrvatsku književnost, slovenski, češki, bugarski i bil san silno ponosan, gord dapače, od tega da spadamo i mi domaći z našen čakavsken zajikon va najstareju grupu slavenskeh zajiki, da sagdere i z saken moren govorit domaći zajik. Razumen da se ne moremo si va se razumet. Iskreno, sakakoveh nas je, ma važno da judi malo misle i drže do tujega, a najveć do svojga.

Nažalost, pravilo je da se vaveki najde neki i pošne nan govorit ča je ča, ki smo i ča smo. I ča manje zna, više zija i prči se z svojen neznanjen. Da je samo malo pošpijal va talijanski rječnik, aš imamo fanj njiheh besed, bi videl da »grezzo« na talijansken znači neuglađeno, grubo, sirovina ča bimo mi rekli!

Jedan od prveh zajiki

Ni mi krivo kad mi neki otalen, doklaćenac, govori da moran govorit »knjževno«, a ne zna da je naš čakavski bil jedan od prveh zajiki na keh se hrvaska književnost pisala.

Ča ćemo z srednjovjekovnun čakavskun književnošćun, ča ćemo z čuda suvremenh pjesnikinj i pjesniki ki spadaju va vrh nacionalne kulturi? Ča morda je i ovista Beseda z NL ča već let promovira su sortu našeh govori greza? Ča je grez Vladimir Nazor, Mate Balota, aš su pisali na našen domaćen zajike, ča su greze naše narodne pjesmi Marina kruna, Vrbniče nad moren i hiljadu drugeh? Ča je i novljanski pusni Žitak i njihe pisme Novljanskega kola grezo? Ča je i Čansonfest grez? Morda i ova zadnja predstava Duhi z kastavske Crekvini? A da ne govorimo za naši prvi domaći glumci, primadonu i se one za njun, Irenu Grdinić i Marijota Batifjaku?

A trebe malo i ča pročitat, a ne prasarit. Zajik je naša najveća, najfineja bogatija!

Zato, judi, pišite čin više, saka beseda otkudar god prišla naš je dragulj. A je i najviše našeh stareh ke smo sa stoletja sačuvali va knjigah, va kantanje, va govore.To je ono ča smo MI!

Je va našen Grade, va Kastve, va staroj jezgre, ostalo još nekoliko kuć ke nimaju črjene, narančaste, žute fasadi, leh su onako »greze«, samo se pozna stara melta i kamiki. Ča ne bi reć da su zapušćene, I to su najlepče kuće ke davaju sliku starega grada. Bi neki šegavi rekli da je to grdo.

Naše noni… / Foto B. KUKURIN

Ni najboji, ni najhuji

Ča bi bilo lepo i moderno da naši noni al nonoti napituramo, ki imaju preko osandeset let ken su ruki i lice namržjeni, a vlasi beli. Ale morda grezi? Tr bi bilo lahko none napumpat z silikonon usta i još ča, storit njoj črjeni i plavi prameni i našminkat ju kot malicu od 20 let?

I to ča je se neš staro ne more bit grdo, nedajboh grezo. Kot i naše besedi, naš zajik. Neki šegavi raji će zet neku talijansku besedu, magar imamo svoju, aš lepče zgjeda. Rekal bi Nušić »nobles«. Ma ni se baš tako grdo, razumen i znan zač je tako. Va našen zajike je čuda teh talijanskeh besed. Je i njemačkeh, turskeh, ki zna od kudar još, i pul je njih isto tako našeh. A sada je najveć moderneh engleskeh, aš je to »in«. Nekakovi »visiti« ale »Crekvina eventi« i još čuda bedastoć ča ni sami ki to zmišjaju ne razumeju. Čini mi se, da je nekeh jako sran svojga zajika, svojga porijekla, zarivuju se z gušton vrit takozvanen većen kulturan, da bi i oni mićihni i neuki narasli va svojeh očijah, (i va tujoj rite) a drugde njin se samo smeju i za bulini jih drže.

Nismo mi ni najboji ni najhuji, ma moramo ostat svoji, čuvat ča imamo i ča su naši stari za nas sačuvali, a ne se tujice vrit gnjest. Ako mi sebe ne poštujemo, kako će nas neki drugi poštovat?

Neka ti grezi, sami za sebe govore da su takovi, a našu stoletnu kulturu i se ča je dosada storeno, i ča će bit storeno neka puste na mire.