Gljedan na mobitel i vidin – već je tri ure zapolnoćun, a mane nikako san na oči. Provevan i ovu i onu za zaspat metodu i niš ne pali. Pobrojila san si susedi na Višnjevice od kada san se rodila do sada. Mnogeh već skoro pozabljeneh se domislela i mislela – Bog zna kade su sada ti ljudi, su živi, ča njin deca delaju i slično. Kada to ni pomoglo, šla san brojit ko j’ se blago moj sused imel i kako su se se te kravi zvale. Za telice znan – saka ka bi se otelila bi se zvala kod i ja. Ako j’ bilo muško se j’ zvalo kako god, ma telica je vavek bila Slavica. Vranić zel i rimu i ki ju je zmislel. A od kupljeneh se domislin da j’ Ive imel Jagodu, Zlatu, Srnu i jednoj, soj vražjoj, nikako da se nisan mogla domislet imena, ma sad doklen pišen znan da se j’ zvala Ruma. Od konj – Sivca, Riđana i Sokola san se domislela, a onput mi je sega toga silnoga blaga bilo dosti pa san šla mislet čigove su lehe po Višnjevice i brojit drva črešanj i višanj. Dokončala san da ni črešnji z ke nisan pala pa zato ne zamerite kad ča bubnen aš ki zna kuliko put san pala ne na rit leh na glavu. Moja bi mat rekla – prvi put kad si se rodila.

I tako vrtin se ja kod kobasica na čobanskomu ognju i čujen parona kako govori da neka umirin aš da mu j’ već slabo od toga moga roštiljanja i da koga vranića ne spin. Odgovaran kako ne moren zaspat pa da brojin. I povedan ča san već se pobrojila. Rekal mi je da san šla skrozin na ocat i da bi mi bilo bolje da prebrajan susedi na kastavsku bandu, a ne oni na Višnjevice i da malo vidin ki kade dela pa da po saznanjimi parkiran auto, pa se j’ bez daljnjega pojašnjenja obrnul i nastavil spat. Na prvu mi opće ni bilo ćaro ča to on govori, a onput san se spametila da misli na si oni silni auti ki su važgani va zadnje vrime. I šla san brzo brojit i prebrajat oni ke poznan, a kako baš jako puno ne poznan susedi na kastavsku bandu, brzo san finila sa zaključkon kako moren parkirat kade god ću aš, bar ča ja znan, va susedstvu ni ni političari, ni gansteri, ni policijoti, ni suci. Tuliko dosadno susestvo da ne poveruješ. Leh penzići i umjetnici.

A kada smo već pu sudci, ov z Krka me je oduševil. Ma, znate on krčki sudac ki j’ otkazal raspravu kada j’ videl buštu. Štorija gre ovako – sudac je prvo raspravi gljedal buštu i dokončal da j’ se poskupelo, a da on ima manju plaću leh ju je imel 2009. leta i zajedno j’ pal va depresiju. Eto, zato ja nikada ne gljedan buštu leh ju rinen va ladicu. Ma, nisan ja bitna, leh ov čovik. Tuliko se zabrinul za svoju egzistenciju da mu j’ mrak pal na oči i lipo j’ odgodil nekakovu raspravu ka j’ trebala bit za ki dan, a bit će va jedanajstomu mesecu. Razlog odgodi glasil je – zlovolja i dodal da »od rješavatelja koji je opterećen vlastitom egzistencijom ne može se očekivati da će se s primjerenom pažnjom i stručnošću posvetiti odlučivanju o tuđim pravima i obavezama«. Znan da to se skupa ni smešno, ma ja san se od srca nasmela. Ne znan ča će na se to reć presjednik Vrhovnog suda Radovan Dobronić ki j’ pokrenul postupak provjere činjenic, ma dočin doznan – javit ću van. Intanto, ne govori krčki sudac z trbuha, tr vidite i sami kako ti auti od sudac gore, a čovik, valjda van je ćaro, kod ni većina nas drugeh, novoga nima ščen kupit. I sad naslišen kolegi kako govore da suci nimaju miću plaću, ja va ničigov takujin ne zabadan nos, ma mislin da saki mora dobit onuliko kuliko mu je poslodavac dal, a ako ni zadovoljan, zna se ča mu je delat – poć iskat onoga ki bolje plaća.

Oni ki me već jade aš su mi štufi su naš presjednik i premijer. Za majčicu milu, huji su od najvećeh selskeh ćakulonki. Nikakova Pepica i Mičica njin ni ravna aš to ča njih dva moru jedan drugomu zdelit, to pas z maslon ne bi pojil. Najnoveje je ovo od šmrcanja i skleki. Premijeru j’ čudno ča presjednik stalno šmrca pa namesto da se pojida da j’ ne daj Bog stalno prehlajen, on ki zna ča misli, a presjednik namesto da bude kuntenat ča se premijer pojida za njegovo šmrcanje, govori kako on ima leh alergiju i da ča ovaj, da ne rečen ča, kad ne more ni dva skleka načinit. Vranić zel i šmrcanje i skleki i Mičicu i Pepicu. I njih bi se dve već dogovorile, a ovi dva su kod najhuja i najdulja turska sapunjača. Ja, ča mislite ki j’ od njih dva Mičica, a ki Pepica?

I se ovo zato aš ne moren spat.