Danaska ga iman z prometon. Ne znan ča j’ razlog ma mane se čini kako retko ki još ima, ča bi se reklo – kulturu va prometu. To j’ za ponemet. Već moraš pazit na one okolo sebe – spreda, zada, iz suprotnog pravca, leh na samoga sebe i cestu. Nekada još nekako, ma uža se potrefit dan kada mislin da već niki ne ume vozit. To nekako najveć do izražaja dojde po vikendu kada valjda voze oni ča auto pale jedanput na leto, eventualno jedanput na mesec. Kad na ceste, na koj ne moreš preteć dojdeš zad jednoga takovoga, e, pa to j’ čoviku za vlasi spukat. Dakako i sebe i onomu ale onoj spred sebe.

Tako san jedanput nemila, sovala i puhala na dotičnoga čovika ki j’ spred mane vozil tulikun brzinun da san mislela da će se fermat, pa kad san ga konačno na punoj crte, aš nisan već mogla guslat zad njega pretekla, paron mi je rekal – vidiš kako si bezobrazna, pa čovik ima sto let ne more brže od kuliko vozi. Bezobrazno san mu odgovorila – tr nima auto sto let leh on i onput me je svemir kaznil aš me j’ fermala policija radi preticanja na punoj trake. Srićon, bili su neki normalni pa mi nisu kaznu naplatili aš su shvatili va keh mukah san bila. Nisu ni barbiću za sporu vožnju, mada ja i dandanaska mislin da on još ni došal tamo kamo se j’ toga dana bil zaputil.

A kad uza se naše šofere pod navodnikimi dojdu i oni strani, e, to j’ onput pravi kažin. Jedni ne znaju bi naprvo ale nazada pa na obilaznice gredu va rikverc aš su namesto za Pulu krenuli za Riku. Talijani ne znaju čemu služi riga, najveć njih misli da njin mora bit, ne z bandi, leh da njin mora sić auto po sredine. I kad se najdeš zad takovoga i ne moreš ga preteć ni z leva, ni z desna, shvatiš da uza se okol crti, ta nacija ima i jako slab vid i sluh. Oni anke abado i na trubu, i na blendanje. Leh gljedaju kade j’ kakova dobra oštarija ale restoran i briga ih, tr su na ferijah. Kad ti se neki z njemačkun tabelicun rine spred tebe, a leh ča te ni očešal, zajedno znaš da j’ to dugo od Švabi. Da j’ to nekakov gastarbajter, ni važno s ke republiki ondašnje državi. Jako volin i oni ča blendaju da njin se makneš, a spred tebe kolona od sto metri. Temi, znan da ni lipo, ma moran priznat da to načinin – pokažen srednji prst va retrovizor. A najdraži su mi oni ki na semaforu krenu jušto sekund prvo leh se sopeta ne važga črljeno. Ti su mi huji od seh oneh ki komać čekaju da njin doklen čekaju zeleno neki dojde va ravninu pa da moru blejat va njega. Kad se to dogodi, onput, ovisno od raspoloženja ili počnen kopat nos da mu se zagadi ale pokažen zajik. Naravno da mojen suvozačon ni lahko peljat se z manun, ma ako njin je lagje poć hodeć, ja niman niš protiv.

Obožavan i si oni ki staju na pješačken, a čovik je sto metri dalje. Da se razumemo, ja ferman na saken pješačken kad vidin da bi neki šal preko, ma ne fermivan ako j’ čovik va Kastvu, a pješački pu Kauflanda na Zametu. Jako su mi dragi i si šoferi od busi ki nikako da dokončaju zač služi ugibalište na stanicah. Ne zato da ga j’ lipo videt, leh zato da bus gre nutar kad rabi ukrcat i skrcat ljudi, a da za to vrime promet normalno teče. Čera san malo manje od pet minuti stala na bivšen okretištu dvojki na Zametu aš je bus imel nutar-van, ma ne na ugibalištu leh na sred cesti pa se j’ kolona načinila se do pokla Diračja. A najbolje mi je kad škovacini va špice gredu po smeti. To ti j’ brat – bratu od Kastva do Novoga lista pol uri vožnje, a inače dojden za manje od deset minuti. Još ako j’ srići pa buden prvi auto do smetlarskoga, tako se lipo nadišin sega i sačesa da mi dojde za hitat van. Ma tako je, kako je, leto je, teplo je i si su nervozni, pa i ja.

Kada smo već pu leta, zadnji put san van pisala okol šporkarij ke turisti delaju po Splitu. Danaska j’ pak na postamentu osvanul veli plakat na komu lipo na ingleškomu piše da će se sako vršenje vele nuždi i povraćanje va starogradskoj jezgre kaznit z 300 eurih. Tuliko j’ vela nužda, a kuliko j’ mala, e, to nisu napisali. Mislin da će si ovi ki gredu na Ultru dobro pazit ča delaju. Bonđorno! A ča se drugoga tiče – niš novoga. Oni dva na vrhu se i dalje karaju, Lursen i dalje kupuje po Rike i okolo, ča se mane jako pijaža aš kad mi se gospođa mama poprti na vrh glavi leh rečen – ako me ne pušćaš na miru prodat ću te Lursenu i rešin se mašenja.