Ne znan kako vi, ma ja komać čekan pundeljak. Ne čekan ferije, ako ste to pomisleli – čekan tu sakramensku frontu ka bi, govore mi kolegi, trebela doć z Đenove i rashladit seh nas skupa. Će ale neće, teško mi j’ reć, kod i prognostičaron, aš nit ja, nit oni ne dirigiramo z frontami. Jedino ča sigurno znan je da ako ova teplina potraje, ja ću za sen sega ponemet. Teplo po danu, teplo po noće. Nalevan se z vodun i sama sebe zoven protočnin bojleron. Mat ne da ukopčat klimu aš da je njoj zima, na delu gase klimu aš da je i njimi zima i onda ja samu sebe dopeljen va situaciju va koj se pitan – si ti nema, a oni normalni ale je obrnuto. Jedino kade mi niki ne dirigira z klimun je auto aš se sama peljen i popeljujen pa san pomislela kako bi mi najbolje bilo da z toga autića ni ne zihajan. Kako to ni moguće, badave mi j’ mislet.

A najveć volin kad dojden va butigu stat kraj onoga dela z frižiderimi i, verujte, napamet znan ke se vrsti pudinga, majonezi, mleka, jogurti i sličnoga imeju va ponude. Ne zato ča me to zanima leh kad se već hladin va tomu rajonu onput je red i da neš navadin. Jedino ča nisan zapamtila je kuliko ča košta aš to j’ preveć broji za moj mići mozak. Saki dan san va temi butigami, aš ki će ako neću ja, a da me ki pita kuliko j’ pinka kruha ne bin znala. Tr znate kakova san z brojimi.

Ne samo ča se tiče koštanja leh i sega drugoga. Na, ki’vo dan san, ne znajuć ča već na se klast, a da mi bude hladneje, našla nekakovu halju ku san bila lane matere kupila, a njoj se, morete i sami dokončat – ni pijažala, i obukla san ju. Jedan sled mi je bila vela, ma ča komotneje, po ovoj tepline, to bolje. I pitan ja mamu – kako mi to stoji, ona, začudo, govori – lipo i pristojno, a kad ona tako reče, gren zajedno provjerit aš njeji i moji parametri lipoga i pristojnoga nisu isti. Pogljedan se va zrcalo i sa prestrašena govorin – jooj, pa va njoj zgljedan kod nekakova gospa od šeždeset let. A onda čujen – pa kako bi trebela zgljedat, tr ćeš sad na imet šeždeset. Srce Isusovo i Majko Božja od seh sedan žalosti i mane osme, ča već! Kako, kad brže? Kod pokisal miš san va toj istoj halje prošla na delo. I povedan ča mi se j’ dogodilo z temi letimi, a si me va čudu gljedaju aš njin ni ćaro va čemu j’ problem. Ljudi moji problem je va tomu ča ću ja zaspraven za pet meseci, ako Bog da, imet šeždeset let, a to telo shvaća, ma mozak ne. I ča j’ najhuje, nakon ove zgodi ne moren već matere kad reče – leta su, a pameti ni, proturječit. Moran priznat, jedno dve-tri ure bila san va depresije, a onda san samoj sebe rekla da j’ čovik mlad kuliko se mladin ćuti.

I ako j’ mane va mozgu pet let, a na hrbatu šezdeset, znači da iman negdere napol i si zadovoljni. Ona ka nikad neće bit zadovoljna je moja mat aš neovisno ča njoj hćer načinila i postigla va životu i z pet i z 59 let, i se ono va sredine njoj nikada ne valja aš hćer ne ume kuhat, ne voli snažit, ne pitura se – osin vlasi va boje ke ona ne tolerira, ne nosi peti, ne sluša stareji i pametneji tj. nju i ni sin. Ki’vo dan me je zapilila zimnicun. Celu večer san morala poslihat kako sad normalne ženske gredu na placu, kupuju kumari, papriki, kapuz, slivi, marelice i slično i delaju zimnicu aš va ovo ludo vrime mora špajz bit pun.

Rekla san njoj da j’ zaostala va razvoju aš da j’ tomu nekada bilo tako, a danaska da se to apsolutno ne splati. Nabrojila san njoj kuliko ča košta (naravno napamet, aš od kud bin ja to znala), rekla da j’ se kod suho zlato i provala njoj na se moguće načini pojasnit kako j’ cenjeje poć va butigu aš ne trošiš ni plin, ni letriku, ni vrime, ne nakuhevaš, ne potiš se i ča ja znan ča san sega rekla, a ona j’ leh odgovorila – tebe j’ se teško i nikada niš nećeš imet aš ti ruke stoje poznopak, a osin ča nimaš va glavine, ako tako nastaviš ni va takujinu nećeš imet niš. Tuliko me j’ razjadila da san valje drugi dan z butigi donesla tuliko teglic da va špajzu nisu mogle stat i pitala ju – si sad zadovoljna. Leh je frknula z noson i rekla da nikada ni isto ono ča sam načiniš i ta industrija ku san ja va špajzu nakrcala, ma da j’ njoj ionako sedno aš ona sa ta sranja (ovo j’ citat, pa oprostite) ionako ne ji.

Eko, ča san van rekla, prvo će predsjednik i premijer na zelenu gran leh nas dve. Mada njoj sled i opraštan aš kad pasa fronta morda bude bolje. Klasa optimist!