Opatijci i njegova Vasanska, s tugom i poštovanjem prisjetili su se na svog opatijskog Mikulu budući da je 6. prosinca 2022. prvi ovaj prosinački blagdan bez legendarnog Emila Jeletića.

– Tamo kade j’ svojni bilo selo i finjevala Opatija, tamo kade se j’ živelo od furešt, anke i od artižanskeh i delavskeh ruk puneh žuji, rodil se j’ pred čuda let, jedan otrok.

Emila, kako su mu otac i mat Jeletić onputa dali ime, život je za vajkada vezal za Vasansku i Opatiju, za njihove kuće i judi. Z iste kući va koj’ je pred već od osandeset let arival na ov svet, on je pred dva i pol meseca zavavek partil na »spoved Bogu«.

Mesta va srce

Va oveh dneveh kada nan arivuje štajun od Svetega Mikuli, Emil je čovek kega se si, i mići i veli, radi spamete. On je jušto takov i bil, i velik i mići, morda nizak rastun al velik po fin srca ko ga j’ kroz život vuklo i pejalo naprvo.

Va ten velen srce bilo j’ mesta, kako za njigovi tri sini ki j’ arival zgojit i pripravit za živjenje, tako i za su opatijsku decu. Sakemu ki ga j’ poznal, zajedno j’ bilo ćaro da j’ Emil bil prava kalamita za decu.

Govoril je da za decu rabi skrbet anke i odgajat jih igrajuć se šnjimi. Ki put njin rabi i ča regalat. I tu j’ Emil bil pravi meštar kega još dugo vremena niki neće arivat doseć. Još va pasanoj države, on je kot vasanski Mikula hodil od kući do kući i delil dečine karamele i mandarini.

Kako j’ dece bilo se više i više, aš su neki prihajali i z Opatije, pokle j’ tisti Mikula počel prihajat i regali prnašat na škalini pred njemačkun crekvun.

A nakon nekega vremena, po fin tega da j’ Mikula crkveni svetac, počel je prihajat i z decun se družit i va samoj crekve. Dečina su mu se vavek veselila aš su na škalineh ki pejaju prema oltaru bili poštivani, va celofan zamotani, regali ki su skroz celo leto zameritali.

A ako bi neki od njih još bil toliko srećan, da bi ga vasanski Mikula zel va krilo i svojen ugodnen glasun mu ča šerijo rekal, dečjen veselju ni bilo kraja. Zato ta Mikula ni nosil šibe, aš je se mogal rešit z lepemi besedami.

Samo jedan Mikula

Generacije judi z Vasanske su se menjale, a Mikula je vavek bil samo jedan, i niki ga ni mogal ni umel zamenit. Kako j’ vreme pasevalo, deca su odrastala, a Mikule su prihajala njihova deca, na kraje i vnuki. I si oni danas sega imaju aš prišla su takova vremena.

Ma zgledaju kako da njin neš fali. Još do pred malo, po vasanskeh je stazah i puteh hodil njihov »dobri duh«, čovečić ki j’ svaken znal lepo poćakulat, kemu su si bili prijateli i ki se nikemu ni zameral.

I ki j’ mogal bit, kad je rabilo, i Mikula i Djed Božićnjak i klaun, anke o puste i plovan, samo zato aš je va sen ten zaspraven užival.

I na kraje, ako j’ do pravice i po onen ča misli većina judi z Vasanske, ki j’ po sen sega zamerital da se po njemu magari nazove i kakov put va njigovoj Vasanskoj.

Aš takov čovek morda se još dugo vremena neće opet rodit – napisao je Opatijac Roberto Žigulić, »čovek od pera« koji se uime svih koji su ga »imeli rada« još jednom prisjetio na vasanskega Mikulu.