Ćakula pul Pobar: Miće novitadi za velu sreću - da se ne pozabi

Foto Sergej Drechsler

Ča je Marija Česen zapisala va srcu i podelila sen juden.

povezane vijesti

Va današnjoj Besede smo malo poćakulali z Marinun Česen ka je kuma od Opatijskeh kukali i poetesa ka je vavek pripravna za kakovu novu pjesmu parićat.

Voli svoji Pobri kade biva i to je otela podelit sen juden. Da se ne pozabi. Sprotu nas je nazvala i opatijska književnica Marija Trinajstić ka je ki ta dan prežentala svoju novu knjigu za ku si pitaju, ča bi reć da živeje svoji »dni od zvezdi«.

Inspiraciji njoj ne fali, pak nan je poslala svoj najnoveji »kantunić ot mizeriji«, kega morete pročitat i malo se nasmet. Pak, homo pomalo naprvo…

Se ča daje lepše

– Novitadi pul Pobar – kad to pročita moj kunjado Aldo Česen će reć, opet ona piše tako, mi nismo tako govorili. On je više od 50 let va Kanade.

Sa gornja sela i mesta drugačije govore leh v Opatije, dan danas, a nekad da ne spominjen. Jedan dan san trefila Vladimira, pa smo šli na kafe. Va ćakulah smo peštali od sega i sačesa i on, na jenu priliku je rekal »to su se novitadi«.

Prekinula san ga va govore i rekla »i ti tako rečeš kot i ja«. A on će nato »nego kako, mi v Opatije tako govorimo«. Imaš pravo Vlado, mi Opatijci rečemo jušto tako. Morala san to spomenut, da se Aldo ne bi jadil – povedela nan je Marina Česen.

Govori nan da su Pobri kade biva se ča daje lepši i lepši, pak korisneji za oneh ki gredu hodeć, bilo da planinare, ale njin je to kratica za poć v Opatiju.

– Kako se uredil stari put, ki peja od Carmen Sylve na Pužev Breg, nisan ga zajno šla obać, aš nisan nanke znala da postoji. Jeno jutro šla san na fatapoštu pronać tisti put.

Šla san zada oštarije Osojnak i se do Fortice se nisan fermala. Krenula san daje po pute Carmen Sylve i hodila, pa hodila.

Urejeni »otok«

Kako je Pužev Breg gore od šetnice, znala san da je put na desnoj strane i tega san se držala. Kad san prišla na dva škalina, nastavila san po lepen široken pute, kega su očistili od graji, grani posekli, a celi put nasuli peskon, ki je skoro belega kolora.

Prvi put san šla ovuda i jako san bila vesela, kako je se lepo i šesno. Prišla san skoro do kraja. Jena staza gre direktno zgorun na Pužev Breg, a druga na Evićev put, ki je del Puževega Brega.

Sad znan jenu više. Pomalo se rešavaju problemi pul Pobar, kot ča se rešila i lokva na ceste kad daž pada i to na dele Puta za Forticu – dožontala je Marina Česen.

Imela nan je još neš za povedet za kraj…

– Otela bin još pohvalit delavice i delavci opatijskeh »Parkovi«, ki su uredili »otok« pul stanice od korjeri za Kastav. Pokosili su travu, zorali zemju i posadili črjene i bele begonije.

Ko veselje za oči i lepota – zadovojna je Marina Česen. Povedela nan je ono ča njoj je bilo na srcu i ča je zapisano va njemu, pak su tako na svet prišle miće novitadi za velo zadovojstvo oneh ki bivaju, al pridu va ov del Opatiji, pul Pobar…