Kolinda Grabar-Kitarović / Foto Igor Kralj/PIXSEL
Va borši nosin orihi i cizibe, pa po malo zobjen, ali ovdi ne znaju parićat ni dobru maneštru, poručuje Kolinda Grabar-Kitarović
povezane vijesti
Kolinda Grabar-Kitarović odgovorila je našoj Slavici Mrkić Modrić na njenu kolumnu S kamika i mora, u kojoj je je zaključila da je bivša predsjednica pravo gromiško dite.
“Kako bi mat rekla – vidi se da j’ to gromiško dite, ne pači toj i sunce, ni daž, a da ima srca – ima”, napisala je Slavica Mrkić Modrić, a evo kako joj je na te riječi odgovorila bivša predsjednica:
“Draga Slavice, nisan mogla zdurat da Van se ne javin aš mi se j’ zapijažalo ča j’ rekla Vaša mat. Ma ni mi mogla dat boji kompliment leh da san pravo gromiško dite.
Molin Vas da joj sporučate da joj vela fala, ma ću joj morat kakove rožice donest. Sin bi nan ovdi altroke rabila aš ni ki za nas bacilat.
Trda ko črni kamik na kon san zrasla, voju iman, ni mi se teško ni spotit, ni zmočit, ali neboga kraman sakamo i obahajan sih i se po celomu Parizu lačna aš mi ni lazno ni obedvat.
Mat je lipo rekla da nijedna prazna vrića na stoji – tr mi si berhani i brageše padaju. Ima mat pravo i da brižnen sportašon triba puno jist aš kad čovik ne ji nanke force nima.
Va borši nosin orihi i cizibe, pa po malo zobjen, ali ovdi ne znaju parićat ni dobru maneštru, a bome ni palentu kompiricu. A dobro kanta klapa Grobnik da niš ni boje od palente kompirice, ča ju znaju skuhat stare Grobnišćice.
Ne bin tela preveć njurgat, aš ni se šlo va ocat. Va Parizu smo se i nadelali i nafeštali, a se j’ dobro kad je dobra kumpanija. Ča ne? Još ćemo ovu šetemanu zdurat pa se gremo doma malo rekuperat.
Lip pozdrav z Pariza!”, napisala je Kolinda Grabar-Kitarović.
Stigao joj je odgovor Slavice Mrkić Modrić.
“Fala Van na javljanju, se ča j’ mat rekla – potpišujen, ča j” veli kompliment aš se retko kada okol bilo česa složimo😀. Intanto, Vi ste njoj načinili današnji dan najlipsin na svitu, pa hvala Van. Zdurajte tu šetemanu si skupa. Kuraja i lip pozdrav”, odgovorila je Mrva.
