Velika glazbena koalicija, a nije politika u pitanju, upravo se oformila uz novu pjesmu jednog od najpoznatijih domaćih glazbenih sastava na Liburniji – popularnih Koktelsa.

Kako je otkrio Nikola Peršić iz Koktelsa, pjesma koja je upravo izašla se zove “Bura z Učki”, snimljena je u suradnji s najvećim zvijezdama Istre i Kvarnera i posvećena je planini koju u ovim krajevima svi nose u srcu.

Jubav za naš lepi kraj

– Kad je tema jubav za naš lepi kraj i lokalpatriotizam onda ni teško skupit judi da kantaju, nego je pitanje imamo li dovoljno teksta za seh ki su prišli i pridružili se da budu dio ove naše velike kumpanije prijatelja i najvećeh zvijezdi domaće estrade pod ovin našin nebon.

Ovo je pjesma za naši nonići ki su nan pustili ovaj lepi kraj, sve užanci i vrednosti ke ne smemo pozabit. Ovo je pjesma o bure, vetru ki zrak očisti od negativneh misli, ki su maglu i blato raspuše, da budemo zdravi i rumeni, a i na bure se najboje pršuti suše.

Ovo je pjesma o Učke, velemu bregu i plavemu Kvarneru, o moru i ribe ča z ognjišća diši i vinu čije su zlatne kapi i potaknule inspiraciju da ovi stihovi najdu melodiju pa da se rodi ova pjesma.

I na kraje ovo je pjesma za nas, našu kompaniju i našu decu, da i kada nas ne bude bilo imaju ča zakantat va konobe da ih srhi pasaju.

Uglavnom, dok se svi diče i poštuju se svoje, mi smo često preskromni i sramežljivi i ne štimamo dosta to ča imamo pa onda ispada ko da tega ni ili da to ne vredi!

Zato je ova pjesma i okupila kvarnersko-istarski glazbeni All Stars, da pokažemu svu raskoš talenta, ki smo i ča smo. Kako bi Thompson rekal, neka vide da nas ima – rekao je Nikola Peršić.

Ni baš preko noći nastala

Pojasnio je i da je trebalo dosta vremena da bi pjesma koju upravo predstavljaju publici bila “jušto kako rabi”.

– Ova pjesma ni baš preko noći nastala, i fanj je tega pasala dokle ni finalnu verziju ugledala. Se j’ počelo 2020., ma kako je krenula korona ideja je malo šla na godišnji, a onda kad je bura uspjela raspuhat ti virusi mi smo okupirali studio Roberta Grubišića ki je ujedno i storil aranžman, i pomalo stih po stih pjesma je počela dobivat sve elemente.

Doduše nekeh smo snimali i po terene (razneh konobah i uredeh), izvodili sve egzibicije da bi na kraju sve to skupa spojili va ovu finalnu pjesmu.

Ako dobro brojin, dvadesetak ljudi je aktivno soplo i kantalo, tako da uz Koktelsi ki su baza pjesme, semi jedno velo hvala na trudu i vremenu, a to su Dražen Turina Šajeta, Alen Vitasović, Serđo Valić i Pere Banko, Mario Battifiaca, Martina Majerle, Duško Jeličić, Sergio Pavat, Klapa Kastav, Joso Butorac, Robert Ferlin i Zoran Kinkela – Mežnjar – naveo je Peršić koji potpisuje tekst i glazbu, dok je autor aranžmana Robert Grubišić, mix master Studio Adria Records, a izdavač Music Star Records.

Dih domaćega kraja

– Parićujemo se i na dobren pute smo da snimimo i video spot, tako da se i temu nadamo do kraja leta. Uglavnom, voleli bimo z ovun pjesmun da osjetite taj dih domaćega kraja, da van zbudi lepu emociju i uspomenu, i ča je najbitneje da ostanete tu živet.

Ki mora prodat neka proda, nisu neka bajna vremena, ali škoda bi bilo da ovaj kus raja, kega su nan naši stari pustili neki drugi uživa – poručili su iz Koktelsa i All Stars.