Precjednik je prisegnul. I moja roditeljica skupa š njin. Pol ure prvo, za vrime prisegi i pol ure kašnje, niki ni smel ni dihat, a kamo ča reć. Narvno, osin nje. Još večer prvo je rekla da ćemo ta prenos pratit na državnoj televizije aš da ove druge leh matače i povedaju ki kakove dolnje gaći ima. Kako j’ ostatku familje bilo jušto svedno, a i da ni – pogovora ni bilo.

Ne znan ako j’ opće tu noć spala aš to van je bilo koda ona postaje precjednik. I konačno je ta šušur počel – ona na trosjedu, gljedan, tuliko se j’ nagnula naprvo da san mislela kako će z noson va ekran prasnut. A televizija, i to dosti veloga ekrana, na metar od nje. Imela san dojam da bi se najraje zavukla nutar, odnosno da bi ne znan ča dala da more bit tamo na tomu Pantovčaku. Za soldati je rekla da su prelipi leh da njin on glavni ima žuti zubi. Kad san njoj rekla da se leh konjimi gleda va zubi, otresla me je i rekla da su jedino moji još huji, ča znači da i on fuma manje leh ja. Pokle toga san odlučila mučat. Onput su zišli On i parona mu. Zajedno j’ pohvalila gospu i rekla kako se j’ sopeta šesno obukla i kako ga lipo spod ruki drži, a on, e, on koda je Apolon. Tu san shvatila da zbilja mora poć znet mrenu i to z obadva oka. Ne mislin reć niš grdo na račun Njega leh samo konstatiran da j’ Apolon leh jedan.

Kad je vanjski del finil sa se j’ tresla da se Prva dama nedaj Bog popikne doklen se po škalah spušća, a glavni komentar njoj je bil da bi On mogal i malo pomanje hodit aš da ga ona ne more dosagnat. Kad san rekla da j’ to tako va Zagore – muško naprvo, žensko odozada, bolje da van ne rečen ča mi j’ odgovorila. Kad je bila zakletva, ni dihala ni. Kad je držal govor, dihala je još manje, a kada smo mi oteli čut te klapi, ta Lado i tu malicu z Međimurja – ni se gasila. I ki j’ ovo, i ki j’ ono, i ča ovaj z oven poveda i zač ovaj kraj ovoga sedi, a ne kraj onoga, i kade j’ od mat od precjednika, i kako mu se sini zovu, ki j’ od njih dva stareji ki mlaji, je mu punica došla… Nasmeli smo se do suz kad je va sen ten mašenju va ken pita ma ne nasliša odgovor rekla – ja san mislela da precjednik ima dva sina, nisan znala da ima tri. Naravno da j’ čula tri imena i da njoj ni na kraj pameti ni bilo da morda jedan od dva sina ima dva imena. Kad smo njoj rekli da su dva sina ma da su tri imena leh je odmahnula z rukun i odgovorila – brižno dite, nikad ne zna ki je od ta dva. A ča bi njoj čovik na to mogal odgovorit?

Uglavnon njoj je na toj prisege se bilo lipo i na mestu, od početka do kraja. Naravno da njoj je bil precjednik najlipji, onput je jako pohvalila svoju omiljenu precjednicu Kolindicu – majko, kako je vavek šesna, nasmejana i tako mila. Komplimenti je podelila i Mesiću i to fanj njih. A ča j’ Gotovina šesan, majko mila! I tako, to bi bili oni šesni, a bilo je i fanj njih ki je otipala na vas glas. Najhuje je pasala brižna još jedina preživela partizanka z Sutjeski. Zač? Zato aš je moja draga mat đeloza. Govori:

– Ma ča ova stara načinjača tamo dela, ima 101 leto, ni ne zna kade je.

– Srića pa si ti va cvitu mladosti, potiho san rekla ma ta čuje se ča ne rabi, a ne ono ča bi trebela.

– Čaaa? Ja još niman ni devedeset, a ona 101. Za nju san curica, zija ona.

– Tebe j’ krivo ča tebe ni niki zval, pa se moraš na nekoga otrest, ne moren ni ja mučat.

– Samo ti zabadaj, ma od mane bi još ča šegavoga i čul, a ča će od nje čut. Koga j’ već briga ni za Sutjesku ni za Neretvu, ni za Tita, sikće ona.

– OK, OK, ma ni ti brižna ženska kriva ča nisi tamo, provan ja kalmat celu tu raspravu.

– Ni, ma ja ne bin ni trebala bit, ali kakova si ti to novinarka kad sediš tu i skupa z manun žbaljiš va televiziju namesto da izvještavaš z Pantovčaka? Da san na tvomu mestu, mane bi bilo sran bilo komu reć da delan to ča delan, otresla me je.

– Ča kakova? Ona z cesti, a ne ona salona. Koda j’ to neš novoga, provan njoj objasnit.

– Tr z ljudimi na ceste i ja povedan, mada nisan novinarka, ma z precjednikon ne. Drek od novinarki si bila, drek si ostala, zaključila je moja roditeljica.

I ča da njoj ja na to odgovorin osin:

– Mama, i ja tebe volin.