Blagdan je svetoga Mikule. Do pred osan let san mu se jako veselila, a onda mi j’ jedan sled teško kad dojde ta dan. Najme, od kada oca ni, Mikula ne dohaja na moju atresu. Ni šibu da bi mi pustil. I tako četrtak sedin ja, sedi mat, sedi paron i ja govorin – jutra je Mikula, mislin da ni nikakovoga smisla da gren sad luštrat čižmicu aš mi ni ovo leto neće niš donest. Mat muči, pravi se da ne čuje, a paron odgovara – e, to ćeš morat š njin rešit, to j’ zmed vas dva i mi se nećemo va ta spor pačat. Nisan znala bin se nasmela ale bin jih obadva zaprla na balkon da čekaju Mikulu. Premučala san i nastavila gljedat Masteršefa. Kako san i predpostavila Mikula ni došal, mada san mu ja pušćala ne jednu leh more čižam va hodniku. Baš san bila tužna kad san se stala i videla da niki niš, ma ni šibu.

A onput san pogljedala va mobitel i videla da iman poruku. Bog dal zdravlja i srići momu vilenjaku od Rukavca i rukavačkeh šum i proplanki – momu Ivule, on se j’ domislel na Mikulu i na me pa mi j’ poslal jednu lipu poruku. Zajedno san bila veseleja, a onput me j’ zvala i Vlasta Sušanj Kapićeva ka me j’ pitala – je ti Mikula klal šibu va čižmu? Odgovorila san – ni, zgubila san mu se z listi. A ona mane odgovara da j’ Mikula veli prijatel od penzioneri aš da j’ šla po penziju i da j’ tuliko vela da ne zna ni zračunat kuliko.

Rekla san njoj da z temi velimi soldimi more otpeljat Veljkota na Sejšeli, a ona govori – nimamo za skroz do Sejšeli, ma do nekuda ćemo imet. I do Spinčić je dobro ako j’ dobra kumpanija, odgovaran.

Intanto, penzioneron saki mesec ta penzija kreši. Za cent ale dva, ma saki vritnjak naprvo. Zato ki god ima penzionera doma mora mu bit na usluge i dragoga Božića molit da poživeje va zdravlju i veselju. Ča bi moja mat rekla – doklen je Bog po zemlje hodil su deca skrbila o roditeljon kad ostare, a sada deca od šeždeset let išću stari roditelji džeparac. Avah je nan sen skupa.

Ma udri brigu na veselje, tr je advent ale ni. To lampa na se strani, butigi su krcate ljudi, borše i kolica puna, na blagajnah red, znači – ima se, more se. Ča će bit kad blagdani pasaju, kad izbori pasaju, koga briga. O tomu ćemo se pojidat kad dojde vrime za to. Ča se teh adventskeh nemotarij tiče, znate moje mišljenje. Nisan šla ni oko hitit, a kamo se »adventirat« ni na jedan od njih, a da j’ izbor veli – je, aš ni mesta ni mestašca ko nima ta sakramenski advent. A advent ki nima klizalište, to koda ni ni advent.

I tu dohajamo do prve stvari ka me j’ razjadila, a ta je da su pulsku Arenu pretvorili va klizalište. Ekola, klizalište va spomenik nulte kategorije more, Tomson ne more, a baš me zanima kakove će se gadarije i zagađivači ušij sost doklen ljudi nutre budu klizali. Druga stvar ka me j’ razjadila je kad san dokončala z kun su brzinun nadoštukali stubi va sadašnjen Saboru, i domislela se va kuliko ustanov invalidi ne moru nutar aš nimaju prilaz. Više vredi jedna polomljena štikla leh si invalidi Lipe naše. A morda čak štikla ni ni ruvinana. Razjadil me j’ i način komunikacije va ovoj kampanje za presjednički izbori, ma to j’ bilo očekivano aš ča dalj to će bit se huje.

Razjadilo me je još puno stvari, ma ča j’ bolje namaljat kad pomoći ni. Bolje da van ja rečen ono ča me j’ nasmelo. Nasmel me je pogovor zmed diteta i materi ki san slučajno čula čekajuć red na jednoj od oneh već spominjaneh blagajni. Pita malica mater da ča j’ Djed Božićnjak Djedu Mrazu, a mat kod z topa odgovara – oni su poslovni partneri kao tvoj tata i barba Zlatko. A, ne, opće nisan prasnula va smeh, a gospođa mama me je jako grdo pogljedala. Promrmljala sam – oprostite i nastavila se smet.

I neću van niš više reć leh ću za kraj citirat Nikicu Sečena, ravnatelja Centra Izvor Selce ki j’ ki’vo dan na njihovoj božićnoj priredbe rekal – volio bih da se Božići ne broje kilometrima lampica, brojem noćenja i sličnim stvarima jer to ništa ne znači. Božić je kad nekome dajemo, pomažemo i nakon toga se svi zajedno bolje osjećamo. Budite jedni blizu drugih, uz druge i za druge.

Ekola, to bi bilo to. Adventirajte se kuliko ćete i kade ćete, ne abadajte na me njurgavicu.