Baš malo mislin kako opće ne doživljavan ovo zibiranje na ko ćemo ta drugi dan. Pa si mislin zač je tomu tako. Morda zato aš je se to skupa na brzinu. Morda zato aš su preglasni si skupa. Morda zato aš su za moj ukus preveć grezi, a morda i zato aš već va startu znan će kod i vavek – trest se brda, a rodit se niš. Zaspraven, je problem va mane aš san valjda već štufa sega i seh pa me jušto briga ki će dobit, ki zgubit. Ionako će pokle sedavnajstoga krenut trgovina veća leh va nogometu. To će, kako i vavek bit čuda transferi, a ljudi su različiti pa se neki proda za niš, a neki za jako veli soldi, odnosno poziciju. Ni ono ča bi me prvo zainteresiralo, a to su stranački slogani, ov put me nisu. Si su mi nekako bledi i bez veze, morda jedino on od Peovićke ka išće delavci za posnažit se ono ča va politike rabi posnažit, ma ni to mi ni sad neš. Ni ta karanja ka saki dan slušan na televizije, radiju ale čitan va novinah i po društveneh mrežah me ne hitaju potloh. Već su mi štufi.

Mada moran priznat da me j’ ova Jadova od Butkovića jedan sled nasmela. I to ne z političkih razlogi leh zato aš me j’ ta štorija od kravi vrnula va djetinjstvo i z sjećanja mi spukala neke smešne situacije. Recimo, moj pokojni sused Ive bi se zajedno z Olegon složil aš njemu je kravica bila sveteja leh je ljuden va Indije. Ničigove kravi nisu imele takov tretman kod ča su njegova Jagoda, Helga, Ruma i ča ja znan kako su se se zvale. Čistil njin je štalicu jutro i večer, a ki put i po danu. Po letu ih je tuširal ni sama ne znan kuliko put. Užal bi reć da već put dnevno njih opere leh sebe, aš blago mora bit ćisto i blagu mora bit čisto. Intanto va toj štale si mogal s poda jist. A kravice su mu vavek bile debele aš, pogajate – blago ne sme bit ni lačno. Intanto, va njegovomu svitu blago j’ bilo vavek na prvomu mestu. Rekal bi – čovik će se snać, a blago ne ume, ako ga imaš onput ga moraš nastojat kako Bog zapoveda.

Ono ča j’ Butkoviću kravica, to j’ momu prijatelu i kolege Gromičanu koza. Jedanput smo bili na MIK-u i va jednoj pjesme se slavila koza pa j’ naša pokojna prijatelica čudon se čudila da ča sad ta koza va pjesme, a on njoj je vas jadan odbrusil – Muč, Duco ča ti znaš ča j’ imet kozu va kuće. Varamente, to j’ se istina – ako imaš kravicu, kozu, kokošu ale bilo kakovo blago baren lačan nećeš bit. Sad to ča moja mat ne razume političku satiru pa me pita da ča zbilja on simpatični malčić z Novoga ima kravicu, pa njoj ja ovako bezobrazna odgovorin – ja, ma leh jednu, a ona sirota sa zabrinuta pita – a ki mu je nadstoji kad je brižan stalno negdere?

Odgovorila san – me par neki tuji čovik. Pita ona – ča oni kafeni nebožići ča dohajaju z duga. Odgovaran – a, ne znan su kafeni ali kakovi, ma me par da da. A ona sopeta, sad već jako zabrinuta – ma neka je skuda je leh da zna kravu pomust aš ako ne zna će se šundrat kravica, će njoj se vime upalit i more loše finit. Da ju umirin, rekla san da tuji čovičić se okol krav zna aš da se tamo od kuda on dohaja krava smatra kod kraljica. I tako smo bile obadve na miru, a Butković će, garantiran, ako moja mat bude šla zibirat imet njeji glas aš čovik ki ima kravicu i pojida se okol nje, mora bit dobar čovik. A, ja saki od nas ima svoji kriteriji. Njeji su takovi kakovi su, ma su njeji.

Sad će ona poć na zibiranje ale će njoj bit štufo, to niki ne zna. Ni ona aš sad bi šla, a za minutu govori da ča će njoj to. Mane pak već od toga će ona poć zanima kuliko će opće ljudi zić na birališta. Nekako mislin da to ovisi o puno stvari. Recimo, ako butige ne budu delale izlaznost će bit manja aš da delaju ljudi bi šli po špežu pa usput i na glasanje. Ako bude lipo vrime, morda ča i bude ljudi na tomu zibiranju, a ako bude dažilo, e, ne znan kuliki će se od njih odbavit na biračko mesto. Bilo kako bilo, nadan se da smo već, poučeni iskustvon, dokončali da smo sami kovači svoje srići, pa ako i nismo, baren lipo zvuči i daje, kakovu takovu legitimnost, da pokle izbori blatimo oni ki su na vlaste. Ale sebe aš smo juto njih zibrali.