Štrajki po Hrvackoj, po svitu protesti, va Svemiru mir i dobro baren ča se tiče oneh nebožići ki su devet meseci bili »na nebu« aš njin se j’ vranić na sriću posral.

Službeno – nisu mogli poć doma »zbog tehničkih poteškoća Boeingove svemirske letjelice Starliner«. Opće ne moren zamislet ta njihov rešt negdere gore. Da me pošalju na šetemanu dan na Plasu pa da mi reču da se ne moren vrnut devet meseci, srce bi mi zajedno puklo, a kamo da me lansiraju pa ne prizemlje.

I onput čitan da astronauti Barry Wilmore i Sunita Williams od NASA-e nisu dobili prekovremeno. Odnosno da su njin platili pet dolari za saki dan ki su bivali va Svemiru, a da njn se ta let računa kod službeni put pa da imaju plaćeno za jist, pit i smještaj i zač bi njin sada još trebeli plaćat i prekovremeno.

Srce Isusovo, ča bi pu nas načinili si ti sindikati da se njimi tako dogodi. pa to bi bil sake minute po jedan štrajk. A još i to da njin nisu plaćali blagdani, a ni regres za godišnji, e to bi pu nas bil smak svita. Intanto, čini mi se se to skupa jedna vela sramot i velo nepoštenje.

Vela sramot i nepoštenje je sagdere okol nas, ma se manje i manje ljudi okol toga bacila.

Ki’vo dan peljen se po jednomu mestu va našemu lipomu prigradu i sako malo vidin divi deponij. Niš mi ni bilo ćaro aš znan da skoro saka općina ale grad ima reciklažno dvorišće, pa ča j’ teško namesto va umejak smeti otpeljat na legalno odlagalište.

Sramot mi je i kad pasivan gradon, a od silnog vonja iman dojam da prohajan najblatnejen kondoton na svitu. Se smrdi po curu, a kad greš moraš dobro pazit da ne staneš va drek. Tuliko o kulture multikulturalnog grada. A za mesto gradonačelnika toga i takovoga grada vela gnjeta.

Iman dojam da j’, ako ne saka zgrada, a onda saka ulica kandidirala svojga i si misle da su jušto oni spasitelji i Rike i Rečani. Programi su njin više manje isti, obećanja isto tako, a ča se tiče blaćenja, fanj su si oštri na zajiku.

Intanto, na rečkoj političkoj scene fanj masovno i fanj predvidljivo. mane kod mane se se to skupa baš jako ne dotiknjeva aš ne bivan v Rike, ma ono ča j’ za me karneval, to su za moga prijatela i kolegu Gromičana izbori. Tuliko kuliko on gušta va semu tomu, to van ja ne moren opisat. A kad malo bolje promislin tr ni neke razliki. Mislin zem onoga ča mane veseli i onoga ča njega čini srićnin.

Odlukun LRH-a da njin va kamp nasele strani radniki ljudići z Medveje ni malo nisu kuntenti. Razumen jih, tr ni ja ne bi bila da san na njihovomu mestu. Ako ćemo pravo, mislin da z takovun odlukon ne bi trebeli bit zadovoljni ni strani radniki, ma njih po običaju niki niš ne pita.

Mislin si – OK po letu bit va takovomu smještaju, a ča kad dojde zima. I, ruku na srce za pravo je reć da saki svojin vlasništvon more raspolagat kako god će i kako misli da je najbolje, ma trebelo se j’ pitat i oni ki kraj toga vlasništva bivaju.

I ne samo bivaju leh od njega va jednomu delu i žive. Mislin na butigeri, oštari, sladoledari, koncesionari plaže i se ostale uslužne djelatnosti. Nadan se da će se dogovorit i da će se neki va tomu dogovoru domislet i na ti strani delavci aš nisu oni brižni za Bogom kamenje hitali, jedino ča su – došli su ča zaslužit da bi njin familje imele ča jist.

I za kraj jedna o proliću. Ki’vo dan smo se pokarali okol toga trebe li objavit da počinje proliće ale ne.

Kako j’ to trebelo poć na stranicu o koj ja skrbin, a to j’ Zadnja od Novoga lista, rekla san svoje povijesno – NE.

Zač? Zato aš nismo napisali ni kada j’ počela zima, još manje leto i jesen i zač bi to proliće bilo izuzetak.

Klast ću vijest kad se bude ura menjala i to j’ to ča se tiče mane i prolića. A drugi razlog je ta ča ne volin promeni i kad san dokončala da po novomu proliće počinje 20. tretega, a ne 21. kako su mane va škole vadili, odlučila san da ću ga ignorirat i njega i seh oneh kemin to menjanje ne pači.

I opće me ne pojida zač je došlo do toga pomicanja prolića. ja san svoje rekla.

I jedino ča ću za ov put još reć je – si vi ki brstite te šparugi po grižah, pazite se aš i kaški su čule da j’ proliće pa su šle vanka videt je ale ni.