Od kada je čula da se gradonačelnik Beograda grozi kako će Tita dat ća z Kuće cveća, moja roditeljica ima novoga neprijatela broj jedan. Bolje da ne znate ča mu j’ sega zdelila i ča mu sega deli, aš to ni za fine uši. Najblaže ča j’ rekla je da leh nesnaga ne bi dala starcu da na miru spi. Kada san rekla da bi morda Tito želel isto, odnosno da bi se morda, da more i on sam volel vrnut doma, šćeto neto j’ odgovorila – o tomu je mogal prvo mislet, sad mu je kasno.

Neka bude tamo kade je i neka muči. A kada san još spomenula da bi ta isti Šapić koga ona uporno naziva Šćapić selil i četiri narodna heroja z Kalemegdana ća, najprvo je pitala ka četiri, pa san njoj nabrojila – Ivu Lolu Ribara, Đura Đakovića, Mošu Pijada i Ivana Milutinovića, podemonila je skrozin na skroz. Ta tzv. Šćapić je bil huji od Hitlera, Musolinija, Mengelea i seh, kako bi ona rekla – zlotvori i nikako njoj ni bilo ćaro kako j’ neki toga Šćapića mogal zibrat za gradonačelnika. Rekla je i da bi prvo digla ruku na se leh bivala va gradu z ken komandira ta nesnaga.

Nisan imela srca reć njoj i za ideju od istoga gradonačelnika da podigne spomenik Dražu Mihajloviću aš me j’ bilo strah da ju ne kolpa. Ma, to j’ čula na nekomu od silneh dnevniki ke prati pa san i o tomu odslušala fanj dugu litaniju. Va tomu namaljanju je bilo krvi do kolena, sovanja kakovo nisan davno čula, uvredi kakove niki ne bi mogal zmislet i na kraju zaključak – oni će videt Evropu! Znaš kada, na svetoga nikada, a morda ni onda. Silno j’ bila ponosna na se ča va tomu Beogradu nikada ni bila, a ni va toj države i kako i vavek – isključiva do pakla i nazada, rekla je da se va našoj kuće neće gljedat ni naslihat niš ča od tamo dohaja.

Kad san njoj rekla da i tamo žive normalni i dobri ljudi i da ni red kladat seh va isti koš, začudo j’ odgovorila da iman pravo, ma je i dodala – bit će da su si ti i takovi o kemin povedaš z pol miša načinjeni aš da nisu ne bi ta Šćapić bil glavni od glavnoga grada. Intanto, nisan otela uhajat va daljnju raspravu leh san rekla da ovi va Kumrovcu nimaju niš protiv da Tita dopelju doma, a ona je rekla da j’ to va redu aš da ako moru tržit na njemu, neka ga i imaju. Rekla san njoj da i mi v Rike tržimo na morčiću, misleć njoj objasnit da saki grad gradi štoriju na nečemu, a ona mi je kod z topa odgovorila – pa, zato i imamo se već i već morčići.

Srce Isusovo, ostala san i stala na tomu aš da san njoj rekla da je isti rasist kod i Šćapić, neki od vas bi me moral zet na stan i hranu. Potirala bi me z kući aš saka istina boli. Tako da smo tu finili štoriju od Tita i njegove selidbi, a tek za dva tri dani san njoj rekla da san malo mislela da ako toga Tita ne bude niki otel, a ovi ga skopaju i isporuče, da bi bilo najbolje da ga mi zamemo aš grobnica je vela, a nas je malo. Leh mi je rekla da se z takovimi stvarimi ni va redu škercat i da Tito ima svoju familju, a da ja niman ni sleda poštovanja ni prama njoj, ni prama Titu. Zajedno san se ispričala i rekla da neću više, ma da nisan niš loše mislela.

Naravno da j’ rekla da ja nikada ne mislin aš niman ščen, da mi niš ni sveto i da ću goret va paklu radi svoje zajičine ka mlati leh da mlati. A to ča j’ ona vavek govorila da j’ Tito bil kurbež, načinjavac i nedelo, to va celoj ovoj štorije opće ni bitno aš – o mrtvimi se najbolje. Pas mater kurbu prasicu i pol sen licimjeron i licimjerju.

Sad z globalnoga gremo na lokalno. Va jednomu prigradskomu mestu oprta j’ kebabdžinica. Kako i sagdere, tako i tamo, dočin je neš novo ljudi lete kod muhi na drek. Jedna od teh muh san bila i ja aš kebab jako volin, a i moran nos rinut sakamo. Dojden, se lipo, novo, čisto, prelipe dve malice, ne znan su z Tajlanda ale neš slično delaju zad pulta. Spred mane nona od kakoveh šezdesetak let i vnučica od kakoveh sedan. Nona govori – dobar dan, ćete nan dat dva kebaba od pišćenic, i ne on opaki umak leh on blagi i stavite nan nutar malo pomidora, kus salati i malo kapuli. Hvala.

Ta lipa malica od ki zna kuda gljeda va nju i čeka da fini, a onput govori – ingliš, pliz. Već san otela priskočit va pomoć kada maletina se ono ča j’ nona rekla ponavlja na tečnemu ingleškomu. Srce ti, da ti, moju mat pojidaju Šćapić i Tito, a mane muči to ča za pet let niki va ovoj zemlje neće govorit hrvacki.