Ako mi sad neki spomene bilo ča vezano za politiku, za precjednički kandidati, njihove kampanji, sučeljavanja i bombardiranja po društveneh mrežah, počet ću vriskat. Ako mi neki spomene rečko kazalište, novu intendanticu i koncert va njeju čast, vriskat ću još i jače. Ako mi neki spomene inflaciju, vriskat ću najjače. Ekola, sad znate ča me od sega navedenoga najviše jadi. A ča drugo leh da j’ se saki dan se skuplje i skuplje i da j’ čovik mag ne bi mogal nać magiju kako pospojit početak i kraj meseca. Najprvo san mislela da ja ne umen, da san bedačina ka nikada ne zna pomirit prihodi i rashodi, ma onput san zaključila da mada ima istine va tomu, ipak nisan ja jedini krivac za to ča nikad niman soldi. Priznan ja da moja mat ima pravo kad reče da se ponašan kod pijani milijarder, a ono sirota kakove ni. Priznan i da Mile z Bakra ima pravo kad mi reče da san z velin mišon načinjena, ma uza se nabrojano mislin kako su te ceni debelo prenapumpane.

Greš va bekariju, zbatiš se kad dobiješ račun, a niš jako ne kupiš. Greš na peškariju, zbatiš se kad dobiješ račun, a sopeta niš jako ne kupiš. Greš va apoteku, kupiš leh ono ča moraš ako misliš ozdravet, pa kad dobiješ račun zijdeš još bolneji. Greš privatno pu dohtora aš doklen biš neprivatno došal na red, ki zna ako biš preživel, pa kad dobiješ račun pomisliš da si morda ipak mogal i počekat na onoj liste čekanja pa ki živ, ki mrtav. I da ne nabrajan dalje leh ću reć da se ni ne obrneš, a takujin ti je postal najveća prazdana jama va celomu svitu. A jedini porok ki iman su cigareti. O pedikure, manikure, frizure, većina ljudi more leh sanjat. Masaža, aha – bonđorno. Morda jedino ona mentalna ku si imamo, a da ju ne išćemo. I opće me ni malo ne tješi to ča ni tako leh mane – sen je. Nekomu već, nekomu malo manje.

I tako ja sedin i cmizdrin nad svojun financijskun situacijun, a na televizije nekakova reportaža o tomu kako se Talijani nose svojemi poskupljenjimi. Pa iman čut da kad njin je poskupelo najdraže piće – kafe, oni nisu kod i mi leh digli i spušćali ramena i zasovali na vas glas pa šli na kafe. Oni su lipo odlučili bojkotirat kafe va kafićeh. Pili su ga doma, pa kada su oštari videli da njin je promet jako pal, preko noći j’ pala i cena kafa. Drugi primjer pu susedi je kad njin je krešila cena pašti. Ča su onda načinili? Lipo su se dogovoreli i namesto da gredu va butigu, paštu su delali sami. Rezultat je opet bil va njihovu korist aš su tako zrušili i cenu pašti.

Mi smo sasma druga štorija. Nan saki dan neš poskupi, mi zakljanemo i to j’ to. Jedino nač su ljudi malo digli glas, ma ne baš jako, je bilo kada su nan počeli naplaćevat najloni za voće i verduru po marketih. Da ni žalosno, bilo bi smešno. Namesto da na to ne reagiramo aš za jedan cent po najlonu niki neće bankrotirat, a usput ćemo jedan sled zaštitit ovu brižnu prirodu, mi smo podemonili. Naslišan na nekomu radiju kako ljudi šize i kako smišljaju pakleni plani za doskočit tomu. Pa jedna gospa govori da će ona od domi nosit svoju vrećicu i va nju kladat se ča misli kupit na voću i povrću, pa leh na najlon lepit ceni. Ja si mislin da će njoj grozje, ako na njega klade dva kila kompiri, doklen dojde doma bit mošt i smejen se sama sobun. Jedna druga govori da će se va rukah nosit na blagajnu pa neka blagajnica na licu mesta važe.

Mislin si – ni od tebe ne rabi jaricu držat, ča ni i ta blagajnica nečigovo dite, ča ni živi stvor ki, kod i ti i ja, krvavo dela za tu mižeriju od plaći. Onput se j’ javil jedan gospodin ki je rekal da je dugo bival va inozemstvu i da va toj zemlje najloni ne postoje – se se klada va škartoci. Zajedno mi j’ palo napamet kuliko bi škartocih letelo po gradu i prigradu. No kako pu nas se fini takoreć prvo leh je počelo, tako će i ov mirakul okol najloni i jednoga centa. Za ki dan nećemo se ni domišljat da smo jih nekada imeli besplatno. Morebit leh oni ki bi jih poskubli na desetki, a ki put i celu onu rolu pospravili va boršu ale oni ki bi uspjeli se ča su kupili klast va pet – šest teh najloni leh da ne daju pol eura za onaj veli. Mi drugi ne. A ča se tiče zibiranja, hote na ti izbori pa da i to finimo i pozabimo. Ako ću iskreno, ki put se pitan – tko želi biti predsjednik Hrvatske. Ja bin raje bila milijunaš.