Ta vranić od toplinskoga vala još dura. Prži koda nikad više neće. Ona nebeska pogača je se veća i veća, se tepleja i tepleja da se ja pitan ki j’ Svevišnjemu delal kuhinju aš takov šparhet klast na tuliko malomu prostoru ro jednostavno – ni humano. I doklen jedni gljedaju va sunce i čekaju oblak, drugi bleje va mesec i čekaju kada će se zadebljat i zaokružit aš da ta puni mesec ki se nalazi na tomu i tomu stupnju nekoga horoskopskoga znaka, a za ki dan će preć na neki drugi stupanj i va neki drugi znak, to da j’ jedno čudo neviđeno. Ovo ča van ja sada povedan, ja niš ne razumen, ma razumeju astrolozi, aš njin je to delo, a ja naslišen laprdanja po redakcije ka j’, nećete verovat, puna astrologi laici. Ja bin prvo rekla – lajavci. I tako zmed sunca i meseca ja se potin, sujen, uređujen i zapisujen. Glavina mi j’ kod ona najveća bačva va Iločkomu podrumu, stalno bi neš ma, badava, kad nima ki. Ale kako bi se reklo – glava i telo su va disbalansu. A o zajiku da ni ne govorin, on se ponaša koda ne pripada vlasniku tj. mane.

Ča san sega blebnula va zadnje vrime, ne smen se ni domislet aš će me bit sran, ma badava kad je zajik brži leh je pamet, ča ako ćemo pravo i ni neki problem aš pameti niman, a zajičina mi je kod kravlji rep ki tira muhi. Tako san ki’vo dan jednomu političaru, istina Bog lokalnomu, rekla da bi mu bilo bolje da promeni zanimanje aš da bi puno više načinil da dela ono za ča se je školoval, a ne da mlati praznu slamu. A niki me ni niš pital, on najmanje. Onput san jednoj ženskice va butige, ku j’ bilo lagje preskočit leh zaobić, rekla – trbuh nutar, cici van da pasan i dobro da san zvukla živu glavu. Mislin da još namalja i kljane ni se po spisku.

Pa san jednoj kolegice rekla da njoj frizura zgljeda koda j’ glavu držala va centrifuge, a ne vlasi sušila fenon, pa mi j’ rekla da ča ja niman zrcalo, ja njoj da iman ma da se ne gljedan, ona mane da bi se ki put mogla i pogljedat, ja njoj da bi ki put mogla neš šegavo i napisat namesto ča j’ stalno pred zrcalon i na kraju me j’ poslala tamo skuda san došla, a ja njoj rekla da bin rado ja tamo, ma ne moren. A, onda san, ma bolje da stanen aš bin i van mogla zdelit neš ča opće ja ne mislin leh moja zajičina mlati bez da me pita.

Ono ča se ja još od čera pitan, a sada pitan i vas za mišljenje glasi – je moguće da se potrefi jedan dan, a morda i više njih, ja znan leh za ov jedan, a da se va rečkomu, pardon sušačkomu rodilištu ama baš niki ne rodi? Najme, uređujen ja čera rubriku – rojeni va lipnju i sa va čudu dokončan da se šešnajstoga šestoga v Rike ama baš niki ni rodil. Mane j’ to bilo jako čudno aš znan skuda se te rodilje dohajaju v Riku rodit, a to j’ pol Istre, otoki, pol Like, Gorski kotar, cela Liburnija, rečki prsten, Kirija… Pitan ja kolegi ča oni misle o tomu, a odgovor glasi – ča nimaš ti pametnejeg dela leh mislit ki se je, a ki se ni rodil.

Ofendila san se, rekla njin da su dosadni i glupi i da jih niš ne zanima i prošla va svoj kantunić z čvrstun namjerun da zazoven va rodilište i pitan je to moguće ale je neki ki prepiševa ti rojeni slučajno zgubil ta jedan dan. Još nisan dospela poslat upit, ma ne bila ja – ja ako ne odgonetnen tu, za me velu, a za si drugi bezveznu enigmu. Aš, ako je zaspraven ta šešnajsti šesti bil bezrodan dan, i ako on ni usamljena pojava, e, onput – jadna nan palenta.

A kad san već spomenula palentu, moran van povedat da san ki’vo večer bila va Bakru aš je Mile z Bakra (čitaj Miljenko Šegulja, ma nekako mislin da se i on začudi kad ga neki zazove tako) imel izložbu. Njegove su izložbe »jednokratne« – va dve uri ima i opiranje, i zapiranje pa ki j’ došal je videl, a ki ni – ni neće. Se j’ na tomu bakarskomu puntinu bilo super. Mile j’ i trg za tu večer preimenoval va Trg ČA, se j’ dihalo na ČA, sliki su bile ČA sliki i bile su super, se bakarske udrugi su bile tamo i bile su super, ma ono ča se j’ mane najveć pijažalo bila j’ palenta z inćunimi. Ne znan ki ta ketering (ka prelipa domaća beseda) potpišuje, ma saka mu čast – najila san se od gušta, kako već dugo nisan.

I za kraj, čujen da će daž, mat bole kolena. Da njoj bude lagje san joj za bon ki smo dobili za regres obnovila vozni park – kupila san njoj tri metli. Se na eko pogon!