Ste čuli za »postolimpijsku depresiju«? Ja ne da san čula nego na vlastite oči i videla. Od kada su finile te sakramenske Olimpijske igri, moja je mat va teškoj depre. Pod milen Bogon ju niš ne zanima, stalno namalja da sada nima na toj škatule niš za gljedat, teh Turci i njihovoga oceranja da njoj ne rabi, a i ti Dnevniki da si isto povedaju. Blaga da njoj je već dosti, a da ionako je se leh repriza na reprizu pa da već se napamet zna. I nikako njoj ni ćaro zač mi saki mesec plaćamo ti silni euri za niš. Govorin njoj da važga radio pa da neka nasliša aš da i to gre va istu pretplatu. Odgovara da gre va isti koš aš da ni tamo ni niš šegavoga za čut. Novine ju ne zanimaju aš, citiran, ako jih pišu ovakovi kod ča san ja, onput je bolje ne trošit vid na bedastoći. Rekla san njoj da ima tu već spomenutu »postolimpijsku depresiju« na ča mi je odgovorila da ima »postolimpijski drek« i da neka ne bombardiran nego neka njoj negdere najden crtani filmi aš da bi malo to gljedala. I sada smo na miru – ne znan ako su i susedi aš ona ton klade na najjače pa vjerojatno susedon na uši zihaja »Vilma open d dor« ale »To je nepravda, prava pravcata nepravda«.

A nepravdi je na celen svitu pa ne moremo ni mi bit iznimka. Na ča mislin? A mislin i dalje na te Olimpijske igri keh da ni bilo ja ne bin znala da imamo tuliko vrhunskeh sportaši. A kako i bin kad se pu nas va medijeh spominju leh nogometaši i rukometaši. Pa ča to ni nepravda? Koda ovi drugi ne treniraju i to puno od njih na vlastiti strošak, va nikakovemi uvjetimi, a sopeta imaju vrhunski rezultati. Ovi popularni imaju se ča požele, nikad njin soldi ni dosti, a masa sopeta divlja dočin se spomene njihovo ime. I zato su moji heroji si oni »Sinkovići« ki su na Olimpijade Lipu Našu svrstali tamo kade i trebe bit – med sportske sili, mada nas je komać tri i pol milijona. A morda ni tuliko. Govorin – morda ni tuliko – zato aš sako malo čujen da j’ sopeta neki koga poznan prošal trbuhon za kruhon. Ne zameran, saki čovik, mišljenja san, ima pravo na vlastiti odabir. Ča zibere, to i ima. Pa ako neki misli da će mu negdere drugde bit bolje, komotno neka gre kamo ga nogi nose, leh neka ne prodava to ča ima tu, aš nikada se ne zna. A i dom se nikada ne prodaje, baren su mane tako učili.

Učili su mane i da se gre na Velu Gospu na Trsat, mada, moran priznat, ne jušto na blagdan leh dan pokle, ča će reć na blagdan svetoga Roka, a ja nit san na Trsatu bila na Majku Božju, nit san šla hodeć na zornicu drugi dan, a ni vozeć. Se ča san videla, videla san va tekstih i na slikah od koleg aš san delala. Pu mane j’ jušto kako bi Bosanci rekli »kuća, poso, kuća poso«. Da baren moren dodat i ono »birtija«, ma niš od toga. Ferij nisan videla, mora nisan okusila, a najdalje ča san ovo leto bila, ako ne računan da san delon bila va Čabru, je Ilirska Bistrica. Ne bin bila ni tamo da pu nas nisu bile butige zaprte, a ja lačna. Se više i likon i djelon sličin na Japanci. Još malo pa ću na delu i spat. A i kamo ću, tr bolje da nikamo ne gren aš sagdere je neki drek – va Slavonije svinjska kuga, va švedskoj majmunske boginje, va Grčkoj požari, va Indije poplave, a va mane samoj vela praznina i niš volji. Da j’ volji, našlo bi se i vrimena i soldi, ma ako već va startu obrnen z noson dočin mi neki z nekakovun idejun zalula ono moje »kuća poso, kuća poso«, onput ne pačaj i čekaj da projde.

Čekan da projde i ovo leto i ovo kopanje po gradu. Od kada kopaju, a pogotovo od kad je zateplilo ni ne spušćan se v Riku. Pasan z auton ako baš moran i srce me boli kad vidin nač sliči moj grad. Komać čekan da pade daž pa da ga jedan sled opere, a ki će, kada će i opće ako će, otpeljat ona brda smet ča su nahitana po sred grada, to ne znan. Jedino ča znan je da san ki’vo večer pasala i da san od silnoga smrada skoro večeru van hitila. Zadnji čas san zaprla dovod zraka va autu. Jedino ča me tješi je da semu dojde kraj pa će tako valjda i ovomu kopanju i rovanju po gradu, pa će Rika bit još lipja i još stareja. Kod i ja.

I da ne bi bilo baš se depresija, ima i jedna lipa stvar. Nikada mi do sada niki ni čestital blagdan Vele Gospe, a ov put je. Čovik se zove Ivo Mavar, a si ga znamo kod Ivulu z Rukavca. Razveselil mi je dan kod ča da i vavek kada se javi. Stojte mi dobro, se dojde na svoje pa ću valjda i ja. Morda već jutra ako daž pade.