Lahko ča j’ premijer zgrožen korupcijun va ku je uključen ministar Beroš, on će doć na se, ma moja mat, e – to me j’ strah aš je njoj Beroš, kod i onoj dečine ki su risali superheroji, zaspraven bil superheroj.

Ča njoj se videlo da j’ to bila takova simpatija, nikad mi neće bit ćaro aš on je tiral ljudi na cepljenje, a ona j’ govorela da se cepi leh blago, a ne i ljudi, ma za njega nikad niš grdo ni rekla. Vavek je bil »on brižan Vilić, sagdere ga je, on će se šundrat ako ovako nastavi« i slično tomu.

Kad god bin ja ča grdoga rekla na njegov račun bilo bi – a, prava se javila, ti se razumeš va visoku pulitiku, lahko j’ srat i spat do polna. Sada kada j’ finilo tako kako j’ finilo, skrozin je zbunjena i stalno govori kako j’ saki prav doklen mu se ne dokaže da je kriv. Ja njoj odgovaran da j’ premijer jako dobro promislel prvo leh mu je dal šup kartu i da njoj to se govori, a ona mane – to j’ tako va pulitike, ča ti znaš, leh laješ da laješ.

Celo j’ jutro naslihala vijesti i sako malo mi dohajala z nekun novun obranun za Vilija. Najprvo mi j’ došla reć da ni imel bogzna kakovu plaću, da j’ kod i pol Hrvacke živel na kredit, a ti stani, kući, vinogradi, gliseri i ča ti ga ja znan ča j’ još nabrojila, su mu ostali od nekoga i deli ih z neken. Još mi govori kako vozi karampanu od auta i kako mu j’ se na lizing.

Nisan ju otela štufevat već leh je štufana, ma sedno nisan mogla držat zajik zad zubi pa san ju pitala – a, ča j’ z onun urun od skoro pet hiljad euri, precizneje 4.645, a ona kod z topa ispaljuje – pa imela si i ti čižmi od pet hiljad kun. Prasnula san va smeh, ne zato ča j’ pomešala euri i kune leh zato ča mi te čižmi od prvo dvajset let nikada neće oprostit kod ča ni ja neću pozabit kako j’ ta put rekla – Majčice Božja, pa ona j’ za čižmi dala dve očeve penzije! I ni bilo važno ča su to bili moji soldi, soldi ke san krvavo zaradila pišuć knjigu, ča san ja te čižmi nosila deset let, ma niš – do današnjega mi dana ni oprostila ča san tako bahata, ča dajen tuliki soldi za obični par čižam, a neki nima ni za jist.

Z ministrove imovinske kartice najedanput smo se prehitile na njegovi prsti. Zač prsti? Pa kad već ni znala kako mi zapret usta rekla je da si tati imaju dugi prsti, a da ministar nima, ča znači da ne bi ukral.

Opet san se počela smet i spomenula njoj jednoga bekara koga ni mogla smislet i za koga j’ vavek govorila da kad nima koga prevarit, sigurno vara samoga sebe, a ta isti je imel prsti kod čevapčići – mići i debeli. Tu j’ malo ostala, ma leh malo i zajedno prosiktala – ne pljuskaj, kako moreš va isti koš klast ministra i bekara. Rekla san da ako baš išće poveznicu, da je to beseda – nož. Poslala me je vrit i posegnula za provjerenun metodun ka vavek pali kad ju ja stiran pred zid. Metoda se zove – mašin i otpevan.

»Ča su sada najahali na toga brižnića, kuliko j’ lopovi va ovoj zemlje i nikomu niš, a on, ako j’ i zel to ča mu govore da je, to j’, naspram drugeh baš mižerija. Ki za malo bacila, ta malo i vredi. On je žrtveno janje, a ki j’ pravi tat, e, to ćemo znat na svetoga nikada. Ma, brižan čovik! Lipo su stari ljudi govoreli – ča se već spriginješ, već ti je rit videt… A i ta Evropa, ča ne love svoji tati leh nos zabadaju tamo kade mu ni mesto. Ma, neka već jedanput dojde ta Sudnji dan aš danas nikomu niš ni sveto…«

Mučala san, naslihala i sen silami se trsila ostat ozbiljna, ma kad ne gre – ne gre. Nisan mogla zdurat i počela san se smet na vas glas.

Rekla mi je – leh se zločest i loš čovik smeje tujoj nevolje. Ja te nisan gojila da budeš takova kakova si. To ti j’ tvoje krasno delo načinilo. Tebe j’ najvažneje da j’ nekakova afera. Z ten se hraniš, ma znaš ča – neka mi Bog oprosti, ma seren se na te i na tvoju profesiju.

Da mi j’ neki rekal doklen si bila mića da ćeš zrast va takovu nesnagu, va dom bi te dala, vranić me zel ako ne bin. Niš od toga ča j’ rekla ni me začudilo aš ne čujen to prvi put leh san joj odgovorila – mama, ja tebe obožavan.

Otela san njoj reć i da Djed Mraz ne postoji, ma dva razočarenja va istomu danu bi njoj skroz razbilo roza oćali, a ako jih nosi 89 let, z razlogon bi me trebela dat va dom da njoj ih sad razbijen.