Sako jutro ista štorija – dočin oči opren gren videt ča j’ novoga va svitu i okolice. Da mi slučajno ne bi ča pobiglo, govori mat ka j’ strašno jadna na takovu, kako bi ona rekla – velu nepristojnost. Ja, tr znate i sami da se ta nepristojnost odnosi na nju, aš sako pravo dite najprvo matere reče dobro jutro, onput ju pita kako je, kafe njoj skuha pa malo š njun poćakula…, a ne kod nesnaga zajedno nos va ta mobitel i ni bu, ni mu. Da se razumemo, pozdravin, tr nisan blago, belo kafe njoj načinin, dan kolačić i onda zabijen nos va mobitel. Ča ću ju pitat kako je kad ima vavek isti odgovor – a, čera j’ bilo bolje. A i to da ne povedan š njun ni istina, istina je da ona navreza, a ja naslišen z pol uha i sako malo rečen – ja, imaš pravo. Da naslišen z obadva, pogovor bi valje finil.

Intanto, tako je kako je i tako san kod i sako jutro, ona bi rekla – vranića jutro, već je pošten svit obedval – i jutros zabola nos va novitadi i zajedno mi je dan prisel. Kako neće kad je prva vijest ku san pročitala bila da j’ Hrvacki hidrometeorološki zavod izdal črljeno upozorenje za tri regije med kun je i naša. Temperaturi do 37, a morda i već od toga! I prvo toplinskoga vala mane j’ pot oblel. Ki će zdurat do one druge nedelji, kada će, po sadašnjemi prognozami, malo ofriškat. Govorin matere da će bit sopeta paklene tepline, a ona odgovara – kada će ako ne sada, tr leto je. Eto, pa se sad ti š njun pogovaraj bez da se pokaraš. Uostalon, ča nju briga – nikamo ne mora poć, ako ju j’ volja taka klimu, ako ni načini propuh, a najčešće va isto vrime obe stvari, pa j’ opet kar neminovan.

Drugo ča san pročitala bil je tekst o pantiganami ke su preuzele vlast v Rike. Pitan se – pa ča j’ tu sad novoga? Saki grad ima pantigani. Onput čitan dalje i dokončan kako to opće ni vijest za škercat se, pogotovo ne onemi ki bivaju va centru grada i saki dan moraju prohajat kraj teh nemani. Najme, ako se česa bojin, bojin se kačak i pantigan. Poljski mišići su mi čak i simpatični, ma ovi tusti su mi fuj, fuj, fuj. Nikada neću pozabit kad san, doklen san još studirala, kraj Kosoga tornja videla jednoga takovoga da san va prvi mah mislela da j’ mačka. Majke mi, ne preuveličavan! Rep mu je imel pol metra. To j’ bilo strašno za videt. Srića da se j’ i on prestrašil mane pa j’ šmugnul zad onoga kioska koga već ni. Znan da va ta kiosk nikada pokle nisan šla. Jedan kapitalni primjerak san videla i va Londonu, zišal je z Temzi pa su me pokle oni ki su bili s manun znemeli z ten da ne znan razliku zmed pantigane i dabra.

Vrnimo se mi va Pantigana ulicu aš tako se sad zove Adamićeva i dokončajmo si skupa kako problem rešit aš bivat med štakoron i popiknjevat se va njih i njihovi dreki ni ni malo ni ugodno, ni bezopasno. Bol za čas dojde, a pokle j’ kasno mislet. Ke su te nadležne službi ke izdaju befel da se smeti ke su hićene na za to nepredvijena mesta, otpelju ća? Ako j’ Čistoća gradsko poduzeće, onput se zna ki mora dat befel. A, ako se ne varan, imamo i komunalni redari, pa neka malo vide ki hita smeti tamo kamo ne sme i neka takovi odere po žepu. Složit ćemo se si da problem, na ki god način bilo, mora bit rešen i ne zato ča se turiston grdo vidi utaknut pantiganu, leh radi seh nas ki ov grad smatramo svojen. Turisti će doć i proć, ma mi ćemo ostat. Dakako, ako nas štakori ne pojidu i smrad ki j’ va centru grada se jači i jači, ne zaguši.

Mislin si malo ča će bit sad kad se dovalja ta sakramenski toplinski val. More bit štakori dobiju sunčanicu i onesvjeste se, pa će ih bit lahko eutanazirat. Ja, ma ka pak služba za to daje befel i su morda na godišnjen? Najprvo da ši, pa niš od ovoga scenarija. Neće bit druge nego – po starinsku! To znači kraj sakog kupa smet, dve – tri trapuli pa ki živ, ki mrtav. Kakovi smo si skupa, ta drugi dan bi Adamićeva bila puna ljudi ki trapuli vuču za sobun. Ne znan ča ni kako, ma da pantigani preuzmu centar grada, to ni va redu. Problem neka izvoli rešit on ki j’ za to plaćen. Ja nisan, ma ako mi kakova šegava ideja pade na pamet – javit ću nadležnoj službe, dočin otkrijen ka je. Za početak gren delat rečku slikovnicu va koj pantigana govori šišmišu – hi, hi, sad i ja iman ulicu!