Doklen ja ovo pišen, na Učke se pripravlja vela svečanost – opiranje druge cijevi tunela Učka. Ne znan ča bin dala da sad moren čut mišljenje Francija Blaškovića, osnivača Lige za boj protiv turizma, o celoj toj situacije. Ono ča si drugi okol mane komentiraju je da tu sakramensku cijev nisu trebeli opret na današnji dan aš da petak, k tomu još i trinajsti, ni sritna kombinacija. Ja, apsolutno niman niš protiv ni petka, ni broja trinajst, numerolog nisan, pa mi to ni opće palo napamet leh mi j’ se skupa smešno aš namesto da povedaju o dužine, širine, dobremi i lošemi stranami bušenja Učke, da komentiraju radovi, investiciju, povezivanje i ča ti ga ja znan ča se ne, ljude najveć zanima ta kombinacija dana i datuma.

Nekako mislin da će i ova cijev jako brzo dobit svoju legendu aš, mada san bila mića, spametin se kako su jedno vrime kada se j’ tunel oprl povedali o nekoj mladoj divojke ka stopira ispred tunela, a oni ki su ju zeli su celi život ostali va šoku aš kada su došli na drugu stran te ženske ni va autu bilo. Komu j’ ta štorija pala napamet, ne znan, ma ja je se i dandanaska domislin dočin dojden blizu tunela. Istina, sada se ne strašin, ma kod mića san vavek va strahu gljedala će nas ki stopirat ale ne.

Ima još jedna, ka me vavek nasmeje, a ta je vezana za jednu mašku, i to ne bilo čigovu leh mašku od Milke Čakarun Lenac. Najme, ona i paron njoj Boris su sako leto kampirali va Istre i to na duže vrime i vavek su tu mašku peljali sobun. Inače fina i pristojna maška, dočin bi došli va tunel bi počela pušćevat vetri, da ne rečen prdet i to, povedali su, tako grdo da j’ Boris vavek prekoračival brzinu aš da ne, bi se bili od silnoga smrada podavili. Kada bi tunel ostal zad njih, maška bi opet bila ona stara – fina i pristojna.

Znan i za štoriju od jedneh dveh ki su se silno voleli, ma su se voleli i volet na čudnemi mestemi pa njin je tako bil i tunel jako napet. Za razliku od onoga najpoznatejeg hrvackoga porno filma, ovoga su videli oni ki su za to plaćeni, a ja san za njega sasma slučajno čula va jednoj oštarije kade san, a ča drugo leh prisluškivala pogovor oneh ki su sedeli za susjednen stolon. Govorite da to ni pristojno? Znan da ni, ma manje je nepristojno leh se hitat jedan po drugomu va tunelu. Intanto, toj drugoj kod i prvoj cjeve želin sve najbolje i semi onemi ki kroz Učku budu putovali, a se drugo ni bitno. Uostalon, ča ni bolje da se ljudi va tunelu vole leh da se ubijaju.

Ono ča j’ mane čera jako, jako nasmelo, a komotno moren reć da mi j’ to neš najbolje ča san čula va ovomu letu, a spada va rubriku »glas mićega čovika«, je jedno javljanje va mane omiljenu emisiju Radio Rike imena Tužibaba. Da stvar bude bolja, nisan čula va realnomu vrimenu aš san kako saka prava nesnaga, citiran moju roditeljicu, va dobu kada j’ Tužibaba emitirana spala kod top, leh mi ju je va tzv. »odloženomu slušanju« pušćal mladi kolega Jakov. Dakle, va Tužibabu se javila jedna gospa ka j’ imela primjedbu na javljanje negoga šjora ki je bil za to da ženske služe vojni rok. Ona mu je šćeto neto odgovorila da kad muški budu rajali i dojili, da će onput i ženske hodit med soldati, a do onda da su ženske leh za onu mušku stvar i lonac. I da doklen je tomu bilo tako ni Hrvackoj falelo dece, nisu ženske rajale od 40 let leh od gušta i ljubavi i da ni bez veze Svevišnji dal ženskoj jedno rebro manje (mada ja mislin da ima jedno više, ma nećemo sad okol toga bacilat).

Onput je simpatična voditeljica, po glasu mislin da j’ mala Krmpotić, rekla da ča zbilja žena ima rebro manje i zamolila slušateljicu da se malo popipa i pobroji na ča njoj je gospa rekla da bome neće, neka se pipa ki se mora i dodala kako radi te ravnopravnosti današnje familje na stolu za obed imaju leh hamburgeri i Rio mare tuni, i to ne zato ča ženske ne bi kuhale leh zato aš od silneh obavez nimaju lazno. Se j’ finilo sopeta na onoj muškoj stvare, loncon i jednen adio i to j’ bilo to. Šćeto-neto, jasno i glasno, koncizno i se rečeno. E, kad bi gospa oprla nekakovu školu jasnoga i direktnoga govora ja bin si naši političari poslala pu nje.

Ono ča moran priznat je da kad su Filip i Jakov povedali o tomu, doklen san još samo čula za sadržaj, a nisan čula i glas, premrla od straha da j’ moja mat zvala Radio Riku, aš se ovo bi i ona rekla, ma još bi vjerojatno i zasovala.