Jedan sled je ofriškalo. Neš je tog dažja palo, ma mat govori da oni gore nisu preveć pili aš da te dve – tri kapi, to da j’ već naškodilo leh je pomoglo. Ta ki bi njoj ugodil, verujte, još se ni rodil. Iskreno, ne reču badava da ne pada jabuka dugo od drva aš san i ja zvicijana, njurgava, i ča san stareja se već sličina va nju, a samoj sebe san obećala da tomu tako neće bit. Na, najprvo san njurgala da san celo leto sama va redakcije, a sada kada su se počeli vrnjevat z ferij, tuliko mi si skupa gredu na živci da bin njih na vritnjak poslala tamo kade su do sada bili. Ča ja moran naslihat kade j’ more čisto, kade j’ kuglica sladoleda puno, a kade malo, kade j’ posteljina bila čista, a kade je smještaj bil kod praščarnik, a koštal kod svetoga Petra kajgana. I, kada smo već pu svetoga Petra, zač mu j’ ta kajgana bila tuliko skupa, od mićega išćen odgovor na to pitanje.

Pušćajmo svevišnje neka počivaju, vrnimo se mi na prizemne temi. I tako ti povratnici pohajaju, povedaju i črni su, tuliko da mislin da j’ i Novi list deficitiran po pitanju delavci, pa da j’ kod i mnoge druge hrvacke firmi posegnul za uvozon radne snagi. Moran pazit da komu od teh preplanuleh koleg, zabunon ne naručin čiz ale neš od sličnih smet ke hitan va se. Škerac na bandu, aš lahko se j’ mane zafrkavat, ma kuliko iman čut, videt i pročitat, bit strani delavac va Lipoj Našoj ni ni malo lahko. Saki dan nekoga takovoga brižnića neki maltretira i mlati. Tuliko j’ se to skupa zelo maha da se j’ oglasil i prvi čovik od policije. A ja smiron mislin ča j’ bilo komu kriv neki ki j’ semo došal trbuhon za kruhon, da bi prehranil sebe i familju? Je komu od nas zel delo? Kuću? Za ženu ale muža ne znan, ma to ne spada va ovu štoriju. Pa, baren bi mi morali znat i razumet si ti nebožići ki su delat va Hrvacku došli.

Gotovo saka familija je imela nekoga ki j’ va nekomu stoljeću šal trbuhon za kruhon. Ili ga ima sada. Tr puna nas je Irska, Njemačka, Italija, a o Merikami i Australije da ni ne govorin. Mislin da su retka mesta na ovomu svitu kade nas ni. Recimo, nas Krasičari i va Ognjenoj Zemlje, a kuliko klati ona moja Ljuba, ale za širu javnost – učiteljica Gordana, još će mi finit negdere na nekomu japanskomu otoku, a ja ću kantat – moja Ljuba, sad je va Japanu, listi dugo putuju do nje…

Ja i dalje ne klatin nikamo ale kako bi moja roditeljica rekla – metla ti se j’ šundrala. I dakako, obrnula z noson. A ča kad već neko vrime niman ni nagona, ni pogona. Ča će reć, niman volji ni za dihat, a kamo za ča drugo. Leh me ne hitajte z rutine i bit će se va redu. Tr i da ću, š čen bin putovala? Kuliko iman za čut plan socijalne kohezije, ma ča to značilo, gre mater ženit i od jeseni – jadna nan palenta. Govore da će krešit letrika, plin, a vezano za njih i se drugo, od prevoza do odvoza, od poroda do sprogoda. Bit će ča bude i zač bin ja sad glavu razbijala z nečen ča ne moren promenit. Jedino ča mi pači je kad reču – sve to je zbog usklađivanja z Evropun. Ma, lipo neka se slikaju oni i Evropa, najprije neka nan usklade plaći z EU, a onput i računi. Ono ča me veseli, mada me se baš jako i ne tiče aš se ne gren kupat, je vijest da imamo najčisteje more va Evrope. San bila jako kuntenta kad san to čula, a onput san pomislela – do kada?

Ma, i o tomu ni ča mislet, i to san klala va ladicu – bit će kako bude. Leh neka ne puše južina i neka nan ne nosi smeti z Albanije aš su oni na toj ljestvice o čistoće skrozin negdere na dnu. Još van moran priznat da san skoro bila jako bezobrazna i neš vas pitat pa ćemo za ov put finit. Najprvo bezobrazluk – ovako, pita mene jedna kolegica da kako se dojde va Takali. Najprvo mi j’ para na uši zišla, a onput si mislin kako ću njoj reć da se z magistrali na pol puta do Bakarca mora poprtit i onput da su njoj skali do vrha. Ma, nisan, pobjedila san samu sebe. Čestitajte mi.

A sad pitanje – čitan ki’vo dan da će se za Bartoju na Čavji neš priredit na Mićoj pjacete i sa zbunjena mislin, ma kako ja ne znan kade j’ to. Ne znan ni da postoji vela, a i ako j’ pjaceta onput je sama po sebe mića. Onput pitan svoga prijatela Herljevića. On govori – nikad čul. A ako on ne zna, kako ću pak ja. I sada vas lipo prosin, odgovorite nan pa da se ne sramotimo okolo svojen neznanjen. A sad, hodite va mir i dobro.