Došlo nan je i to 2025. leto. Da mi j’ neki, recimo 1975., rekal da ću ga slavit, leh bin se nasmela i rekla – aha, bonđorno. Intanto je tu, i ja san tu, a i slavilo se. Nisan baš neki slavljenički tip, ma dogodi mi se ki put. Gljedala san malo te društvene mreži, ti portali, televizije, naslihala radijo i iman dojam da j’ cela Hrvacka bila na nekakovomu trgu, na nekakovoj zabave ča mi pak govori kako mi leh njurgamo i kako nan opće ni loše.

To isto su mi govoreli i one silne gnjeti po butigah, trgovačkeh centri, pu bekari, frizeri, pedikeri, va oštarijah, pred oštarijah, na zidićeh, na seh teh adventi, keh nan, Bogu fala – ni falelo. Ni nan falelo ni dočeki Novoga leta na polne, oneh na pol noći, kod ni zdravic na polne prvoga prvoga. Od sega ovoga jedino ča moren zaključit je da nan ni soldi ni falelo, a sad će nan ale ne takujin bit na djete va jenaru, to ne znan. Tr ne zovu jenar zabadava najduljen mesecu va letu. Ima to vezi z takujinon, da ča leh ima.

A da imamo soldi govori mi i to ča su i pokle blagdani butigi pune ljudi, a va bekarije san čera čekala red dobreh pol ure. More bit i zato ča j’ pol bekari zelo ferije, kod i pol oštari pa se si rivaju pu oneh ki delaju. Ferije su zeli i si oni ki bi da njin rit vidi snega, i to onoga inozemnega pa su već šli ale će poć jušto danaska na skijanje.

Pol Lipe naše će se hitat po skijalištimi va Italije, Austrije, Bavarskoj, Francuskoj, neki i po Bosne, a imela san čut da j’ sad veli hit poć skijat i va Srbiju. Kako ne skijan, niman baš neke informacije o tomu nose se još sarmi sobun ale je morda ko drugo jido sad in. Ću malo pitat pa ću van povedat. Čula san i da j’ sada ona jeftineja, ča bi se reklo skijaška šetemana za familje pa da škole opravdavaju to ča njin neka deca nisu va razredu leh na skijalištu.

Va moje vrime toga ni bilo, a bome ni bilo ni tuliko prazniki, pa mi i to se skupa ni ćaro. A more bit smo mi bili bedasti, a današnja deca se rode kod Anjštajni pa se propušteno brzo nadoknade. Šegaviju mi pokazuju porukami ke su se drugo leh pismene, čast iznimkami. To kad danaska dobiješ poruku od kakovog mladoga bića, najprvo ti j’ zvat Kagebe, Ciju, Sou, ale kakovu drugu službu da ti ju dešifrira. Njimin je se va skraćenicami, pa ako tako nastave na kraju će va teh porukah pisat leh jedno slovo. A morda ni to jedno.

Ča se more – sako vrime nosi svoje brime, a me par da san ja postala jedno staro njurgalo i da moja mat ima pravo kad reče da san kod jedna ista z Krasice, ni važno ka, pokoj njoj duše, ka j’ dopolne mrzela celi svit, a zapolne i celi svit i samu sebe. Imela san čut i da j’ puno ljudi prehlajeno, da šmrca, kiše, kašlje, a bome i da su va điru i želučane tegobi. Ki’vo dan mi govori jedan kolega – ako misliš poć na Zlobin, ne hodi. Pitan ga da zač? On govori – nekakova viroza j’. Pol Zlobina sedi na kondotu. Nadan se da su i ljudi i kondoti zdurali, kod ča se nadan da ćemo i si mi skupa zdurat ovi dani doklen konačno ne ziberemo toga precjednika.

Ako opće ki ni zijde na birališta aš neki su po skijanjimi, neki su štufi, a neki apsolutno nezainteresirani za politiku. Moja roditeljica je rekla svoje povijesno ne biranju i biralištimi zavavek. Razlozi – kolena ju bole i nima već ki poć na biralište, a i ča će kad je se to ista pašta. Zaspraven se j’ razjadila zač hitamo soldi zabadava aš da j’ to se trebelo finit va prvomu krugu. Nikako da njoj objasnin da niš ni gotovo doklen ne bude gotovo, odnosno da j’ se moguće i kada se čini nemoguće. Leh me je pogljedala i rekla da njoj je jušto sedno se to skupa, i ki j’ dobil, i ki j’ zgubil leh da ne vidi smisla va semu tomu aš da bit optimist je jedno, a bit bedast je drugo. Ni mi se dalo pitat ča joj sad to znači aš i inače namalja, a kada j’ depresivna i filozofski nastrojena ne fermiva celi dan.

Vidin da j’ va điru i koncert dobrodošlice za novu intendanticu rečkoga kazališta. Čujen i da će nastupat mnogi, a čujen i da se na koncert more samo z pozivnicami. Ja, drugi puta neka ljuden pozivnicu pošalju i kad budu punili proračun.