Od kad je Pust pasal, smiron mislin koga bin mogla okrivit za se ča mi ni ni po volje, ni po guštu. Recimo, ki’vo dan san z vratimi zaprla kamaru va koj pušimo na delu i svoj kažiprst skoro nutre pušćala. Bolelo je kod sto vragi, a ja nisan mogla reć ni da su vrata kriva, ni da san ja kriva, a prst još manje. Onput san pozabila lumbrelu va autu aš je sunce svetilo kad san došla na delo pa ki bi se na lumbrelu domislel, ma san je se itekako sjetila kad je delo finilo, a ja mokra kod miš došla do auta.

I sopeta ni kriva lumbrela, ni auto, ni sunce, ni daž, anke ja. To ča stojin pol uri spred ulazneh vrat aš ne moren nać ključ ni krivica ni ključa, ni bravi, ni vrat, ni mane.

Ča san vječito lačna i z noson va friđideru ni ni moja greška, a ni od frizera aš kad je čovik lačan mora jist. Moj pokojni otac bi užal reć da prazna vreća ne stoji, a nona da j’ medved muhu pojil pa mu j’ bilo lagje. Ni ovi sakramenski izbori ki smućevaju sake četire leta nisu krivi aš nisu se sami rivali, neki ih je zmislel. Za to ča ni mesta za parking ni va gradu, ni va prigradu nisu krivi ni ljudi, ni auti, ni gradske, ni općinske vlasti. Ki j’ sredinun pasanoga stoljeća mogal znat da će saka familja va prosjeku imet dva auta, da će auti bit pet put veći leh je fićo i da će bit najvažneji član familje. Kad južina zapuše i si ponemeju sled već leh inače, ne moreš reć da je vetar kriv aš njegovo je da puše, a naše da njurgamo.

I komu onda krivicu na hrbat klast kad Pusta ni? Mislela san i mislela pa se domislela kako jedna moja kolegica smiron spominje nekakov retrogradni Merkur. Kad god neki reče da mu j’ ovo ale ono šlo po zlu ona odgovara – a, ča se čudiš Merkur je retrogradan. Ako me pitate ča njoj to znači, iskreno i najiskreneje – niman pojma. Znan da j’ Merkur planet, ma kad je retrogradni je on onda ponazad, je zločest, gre va rikverc ale se to skupa, e to van zbilja ne umen povedat. Intanto, i bez da razumen ja san našla krivca za se. Tako da ča god mi se strefi ja lipo leh mahnen z rukun i rečen – opet onaj retrogradni Merkur dela pizdarije.

Govore mi da ta isti gospodin Retrogradni dela smutnju va komunikacije, tehnike, na putovanjimi, da j’ smutljivac va vezami, da j’ provokator i sega vranića još. A kada su mi još oteli povedat i o tomu da se ovisi se on toga časa kad mu pukne film nahaja va ovomu ale onomu horoskopskomu znaku, e to mi j’ bilo preveć pa san zaprla uši.

Roditeljica govori da to delan od kad zna za me, ča će reć od rojenja. Mislin to da poklapan uši dočin ne želin neš čut. E, pa nisan ja kriva, kriv je – zna se ki. Intanto će ta Retrogradni,, govori ona moja kolegica spomenuta ki red prvo, tri put ovoga leta jahat. Zapisala san si kad, da se skupa z manun i vi pripravite. Prvo jahanje je jušto va ‘vu dobu – počel je 14. tretega, a finit će 7. četrtoga. Rekla je da je va oven štajonu na fitu pu ovni i rib. Onput će nas seh skupa pušćat na miru pa opet nemiot od 9. sedmoga do 3. osmoga, a onput će bit pu Lava i raka. I zadnji skosi va 2025. letu će mu bit od 29. jedanajstoga do 24. dvanajstoga kada će bivat pu strelca i škorpiona. ča god da to značilo, a ja, ponavljan van, niman pojma ča znači, glavno j’ da san ja vamin to rekla pa ča god da bude, čisto da znate ki je kriv.

Ta isti će bit kriv i za si izborni rezultati kada do njih dojde, i za sa lažna obećanja, i za si oni suludi plakati ki se lepe po gradu i na keh su neki ljudi keh komać prepoznaš aš su tuliko fotošopirani, filtrirani i ča ja znan ča, da se pitaš je to reklama za nekakov film za odrasle ale predizborni plakat. E, da ni Merkur retrogradan, onput bi bilo se drugačje, a ovako je tako kako je. Mat govori – tr bolje da gljedaš va lipi leh va grdi ljudi. Ja njoj odgovaran – ni me briga kakovi su leh ča govore. I onda ona zakucava – pa ča onput sereš? Lipog li pogovora. Ta bi znemela i gospodina Retrogradnoga, vranić me zel ako ne bi. Najbolje da ju pušćan na Trampa pa da i Grenland i Kanada i Meksički zaljev budu na miru. A i ostatak svita.