Intanto j’ ta daž pal. Ne preveć, ma jedan sled je ofriškalo. Prvo leh je pljusnulo, užanca je – si su bili napol nemi i za skroz nervozni. A onput je zagrmelo i to fanjski, si su zamučali, letrike j’ nestalo, kompjuteri su se zagasili, alarm se j’ važgal, a fiksni telefoni na ke već let i let retko ki poziva su najedanput kod po naredbe, va isti čas si počeli zvonit. Baš nekakova horor situacija.

Ja san leh molela Boga da san bila tuliko automatska da san bez mislet stiskala »zapamti« na kompjuteru aš ako nisan ta grmljavina bi mi bila pojila se ča san načinila. I bila san automatska, kompjuter ni niš pojil, a ja san odahnula. Na, ča ti j’ bit robot – delaš, a da ni ne znaš da delaš.

Ja, ma bilo j’ oneh ki nisu takovi, pa da nisan pristojna kakova san, sad biste vi čuli kakove se besedi moru reć oni ki se nazivaju intelektualcon.

Neki su me tuliko nasmeli da njin hvala ča su najprvo ljudi, a onput se drugo.

Leh ću van reć da j’ jedna kolegica zakljela tako da j’ spojila nespojivo – i Miki Mausa, pasa i njegovu mater, Vakulu, Nou i njegovu arku. Bolje da ne znate.

Ono ča j’ bolje da znate je da će struja i plin krešit za deset posto, ma kad se domislite da j’ to deset moglo bit i trejset, zajedno čoviku bude lagje.

Intanto je moja roditeljica rekla da j’ to u redu aš da j’ malo preveć te objesti i takanja klimi saki dan, da ako su prvo ljudi mogli živet prež nje, da moru i danas. Ja, saki vodu na svoj malin navodi.

Njoj je klima najveći neprijatelj ki postoji aš, citiran – va stanu je kod va mrtvačnice. Se zaprto, nigder zraka i škuro. Da j’ Svevišnji mislel da tako svit trebe zgljedat ne bi načinil ni sunce, ni dan. Filozofska rasprava se j’ nastavila tako ča san ja rekla da od kuda ona zna ki j’ koga storil, a ona odgovorila – muč, telice!

Onput san ja spomenula da će i meso poskupet, a ona j’ leh odmahnula z obadve ruki i rekla kako ju to opće ne pojida aš da saki šegavi čovik ne bacila za meso. Pitala san ju da od kada je ona vege, a ona me, gljedajuć va čudu pitala – ča si rekla da san ja? Ona ka ne ji meso, odgovaran. Govori – ne da ja meso ne jin, ma ga ne volin i to ti ni zdravo, leh tuliko da znaš. To j’ se galofak i antibiotiki. Ti koda ne gljedaš televiziju.

Niš nisan odgovorila, a najraje bin joj bila rekla da sa srića pa se verdura opće ne šprica i srića da galofak kokoša ne nese galofak jaja leh čisto prirodna.

Ona j’ još pol uri namaljala okol mane i moga jida. I da ni ne znan ča j’ zlica, koda da san z srednjega vijeka i leh da mi j’ meso žerat.

Kad već nisan mogla naslihat, obrnula san se i rekla da znan zač ona meso ne ji, odnosno ako i ji, onput leh meljeno. To j’ zato aš falši zubi ne funkcioniraju kod pravi pa j’ ovako lagje. Tuliko se j’ ofendila da san celu večer bila na svetomu miru. Ma milina – slika je, a tona ni.

Ki zna do kada bi bila ofenđena da njoj ni rabilo nać prijatela, ča će reć šćap, koga j’, po običaju nekamo zakramala pa neka ja išćen.

Ki put mi se čini da ga namjerno skrije leh da vidi kuliko će mi rabit da ga najden. Ča zaspraven ima i svoje prednosti aš kad me ni doma, onput po šćapu znan kade j’ se klatila.

Ima ona još jednu igru z kun me znemi. Sako jutro čeka da se ja odbavin i taman kad zamen rusjak da gren ća, zmaj se oglasi z trosjeda i čujen – a, ki će mane iglu navrest? Nema veze ča j’ mane preša, ni bitno ča kasnin, još je manje ča ona ta dan neće sigurno niš ni krpat, ni šit. Igla, i to ne jedna leh najmanje dve moraju bit navrežene ako se predomisli ili kako bi rekla – ako mi dojde volja.

Ča j’ još huje, zapiči jih va ča god i onput vavek moran pazit kad sedan na trosjed da ne bin sebe samu zašila. Kad zazijan da mi j’ već puna pipa nje i peteha i njegoveh gać ke saki dan kroji, prekraja, šije i slično, leh onako z visoka reče – tr j’ i mene bila puna pipa tebe i tvojih igraljak pa san se sedno s tobun igrala. Ča misliš da si na prav Boga tulika narasla.

Ni baš da san jako narasla, ma na to joj niman ča reć.

Još kada san danas čula kolegu ki mora večeras sinon poć na koncert aš dečko još nima šešnajst let pa pokle jedanajst ne sme bit sam vane, odlučila san mučat i molit Boga da ča dulje iman komu navrezat te igli, a još mu se i zahvalit ča va moje vrime ni bilo toga zakona aš sebe i mat skupa va Palahu, e to i z najvećun maštun ne moren zamislet.