Čera j’ počel MIK, ma doklen ja ovo pišen o tomu kako j’ i ča bilo va Pazinu, mogla bin van povedat leh da iman kristalnu kuglu aš MIK je počel na devet večer, ja pišen na tri zapolne, a vi čitate danas. Tako j’ to z vrimenon i pisanen novinarstvon ko ni na internetski pogon. Ono ča znan, a tiče se jedinoga hrvatskoga glazbenoga, na metle pometenoga festivala je to da slavi šeždeseti rojendan, da će pjevat, tancat i sost va Pazinu, Bakru, Kastvu, Puntu, Savičente i v Rike, da j’ vrimenska prognoza takova da će, me par, to bit jedno dvoransko mikovsko prvenstvo i da će, po pjesman ke san dospela čut bit za saki ukus neš za zibrat. Čula san i da će va revijalnomu delu festivala, ki će se miksat z onen natjecateljsken, bit se, mikovskoj publike jako draga imena, ča će reć – veterani MIK-a i kako bi se to na standardu reklo – etablirana mikovska imena, ma i imena ka su se isto tako dumboko zagnjela va sam vrh hrvatske zabavne glazbe. MIK će i ovo leto vodit mladi ljudi – Lena Stojiljković i Borna Šmer. Mikovska su to deca i to onako baš za skroz. Lena je nastupala na Mikiću, nekadašnjen festivalu MIK-a namenjenomu dečice, a Bornu je mat kad je imel četrnajst let dopeljala va karavanu i molila i prosila da ga zamemo sobun aš da ona već ne more zić na kraj š njen i njegovun željun da gre na MIK.

I kako smo ga onda zeli, zimamo ga već let i let sakamo. Jušto kako ona od Bobušice – zami me sobun sakamo. Kad smo već pu Bobušice, ona j’ pokla intervjua va Novomu listu jako iskana persona. Altroke Tejlor Sfift. Se je isto osin bankovnoga računa, a ki na malo gljeda malo i vredi. Te iste Bobušice neće bit ni na pozornice, ni va publike aš govori da njoj partner ni od volji za pohajat. Da ne bi bilo sada okolo ćakul o Mirjaninoj ljubavnoj situacije i partneru, zajedno ću van reć da j’ to jedan štanj gospodin, Mirjane vavek na usluge, z plemenite familje, a zove se šćap. Ma š njun čovik nikada ni na čistu pa se morda i ukaže, čisto da bi opet z Polićen načinila kakovu monadu.

E, sada Polić. Ne znan kako j’ Baše uspjelo toga malčića potakat Zlobina nazdolu i vrnut ga sopeta na pozornicu. Makar i za kratko. Poveda se da su va pitanju veli soldi, ma poznavajuć i jednoga i drugoga, nekako mi ta tvrdnja ne stoji. Intanto, Polić gre na MIK, a okol kokoš će se pojidat, a ki drugi ako ne Ifi i Jurić, tako da jaj neće falet, ako j’ ki morda bil zabrinut. Ja, lahko j’ tako bit poduzetnik. Med dragemi imenimi MIK-a ke ćemo ov put moć videt na pozornice su i gospa Radojka, gospa Vesna od milja zvana Križić-Kružić ma i Istarska ruža, bit će tu i šjor Đani Maršan, a doć će i finalnu večer najavit i gospa Ksenija Urličić ka j’ davnašnjeh let bila ono ča j’ za novi MIK Robert Ferlin. Ja, bit će i on, a i mali Kedžo i još puno teh »maleh« ki su mali na MIK došli, a sad su već gotovi ljudi.

Nažalost, puno j’ oneh ke bi si rad videli ma nažalost gljedaju ih neki na nebeskoj pozornice. Rado se na njih domislin i vavek su to lipa sjećanja. Intanto, MIK je i rabi poć kampanat okolo. Ne moren reć da j’ moja mat jako zadovoljna radi toga aš je ona mišljenja da nekomu od šeždeset let ne priliči saku noć pohajat okolo, noći gubit i po cel dan delat, ma onda joj ja rečen – a, kada ću ako ne sad i onput ona za skroz ponemi i šćap fini – znate već kade, uz ono uobičajeno – leta su, a pameti ni. Ne moren reć da ni va pravu aš leta zbilja su, i mane i MIK-u, a pamet ioanako nikada baš ni bila na cene, danaska morda i još manje leh inače, pa niman za čen baš jako žalet. Nisan baš od oneh ki se žale aš san dokončala da od toga niman baš jako koristi, pa se tako ne žalin ni na ovi silni dažji ča padaju. Pokojni otac bi rekal – tr pada na svoje, pa se nekako toga i ja držin. Mat ni zadovoljna, mada njoj je jušto sedno kakovo j’ vrime aš nogi nose leh po kuće, nisu baš žvelte za poć vanka. Ono ča nju već od dažja muči je grmljavina. Ta zmaj se ničesa ne boji osin kad grmi. Ki’vo večer puca i ropota na se strani, nas dve sedimo va kuhinje, ona govori – čuješ ti to, odi zagasi se aš će nas grom. Ne abadan, a ona se sa jadna staje, zima stolčić i šćap i prohaja ća. Kamo? Va špajzu aš tamo da ni utičnice, a i ne čuje se tako jako grmljavina. Ona j’ hrustala nekakovi keksi va špajze i namaljala kako od mane nikada nikakove koristi, a ja san imela sled mira i spokoja. Sad van je jasno zač komać čekan poć na MIK.