Leto je – prži, poti, nervozira i gre na živci.

O tomu kuliko ga ja volin, znate i sami. Tuliko da bin, kad bin mogla klala embargo na to godišnje doba. Ne podnosin ja njega, ne podnosi ono mane i točka. Najraje bin ga prespala kod ča medvedi prespu zimu. Kad vidin celu Hrvacku va crvenon, kolpa me. I ki s ten prizoron more bit kuntenat osin esdepeovci ki sanjaju takovu kartu – pobjedili va sakoj regije. Škerac na stran, ma kad se domislin na si oni brižni ljudi ki kopaju cesti, delaju na građevine, čiste, kose i snaže po parkimi, na poštari, kuhari i si čigova rit ne sedi spod klimi, dojde mi da se zićepan, aš ča iman ja njurgat kad mi j’ naspram njih bogbogova. Mat mi j’ rekla da leh munjeno blago kod ča san ja ne voli da j’ dug dan, da mu j’ teplo, da se gre kupat, da ne mora oganj nalagat i slično. Onput je ovo munjeno blago njoj odgovorilo da leh nem čovik voli kad mu komari okol uha zuje i badaju ga, a on se češe, da ga napadaju čeli, osi i stršljeni, da mu kački gmižu okol kući, da mu grad smrdi huje leh i najhuju kondot va Indije, da leži na plaže kod sardelica va konzerve, da radi gnjeti po cestah sedi va autu već leh idere drugde, da se od tepline cedi kod cediljka i slično. I onput smo se složile da se okol leta nećemo nikada složit i kar preselile na to će klima bit na 25 ale na 30 stupnji aš ona nasliše radijo i gljeda televiziju i jako dobro zna da razlika va temperature spod klimi i vane ne sme bit veća od sedan stupnji. Srića od Boga ča imamo dve pa se ja odbavin va kamaru i sanjan da san va selu od Djeda Mraza, a ona zagasi klimu va kuhinje, zabode nogi va lagaman i sanja da j’ na kupanju. Obadve zadovoljne, se doklen se sopeta ne utaknemo.

A utaknemo se spred televizije kad su utakmice. Naravno da i dalje prati prvenstvo mada j’ rekla, kad su naši ispali, da nju to već ne zanima. Volela bi da su Njemci dobili ma su njoj i oni ispali, pa da su Francuzi, pa su šli i oni mater ženit, a sada navija za Španjolci aš joj tamo igra on deškić ki ima leh šešnajst let i komu su roditelji morali potpisat da opće more igrat, a onput i da sme igrat pokle deset ur večer. Pitan ju ja da san slučajno ja taj malčić, bi mi ona potpisala, a ona bez ni sekundi mislet odgovara – ne bin. Zač ne biš, pitan, mada san znala da će odgovor bit takov, a ona govori – zato aš ti ni z šeždeset let pameti nimaš, a kamo kad si imela šešnajst i zato aš si tako prgava da biš pšolomila ne samo protivnički igrači leh i svoji ako ti ne dodaju balu. Gljedan ju va šoku i va nevjerice, a ona će – ča sad blejiš va me kod telica va šarena vrata? Celo školovanje si me sramotila tuliko da me j’ i dandanaska sran kad se domislin koga si se va škole stukla. Ni bilo šetemani kad nisan morala poć va školu aš si se ti sopeta potukla, ako si ti pozabila – ja nisan. Pogljedaj si malo svjedodžbi, va već njih piše neprimjereno vladanje leh ča ne piše.

Srce Isusovo, mislin si, ona j’ ponemela. Si razredi san s pet pasala, ča ju je ćapalo. Ma ne gasi se Zmaj, spominje mi sakoga poimence koga san stukla. I ne laže, istinu govori, ma ona nikako ni mogla shvatit, ni onda, ni danas, da san se ja morala tuć aš san bila najmlaja i najmanja i da nisan ja njih bi oni mane. Ovako opleteš na početku škole i do kraja leta si na miru, si misle da nisi normalna i pušćaju te na miru. Ja, to su te male tajne za preživljavanje. Zezan se, nikada se nisan prva počela tuć, ma da bin vrnula – bin, a nisan ja kriva ča j’ moja praćka bila najbolja i ča san ja za suseda i »trenera« imela tišljara ki mi j’ načinil najbolju i najprecizneju praćku na svitu i ki me j’ naučil borilačkimi vještinami. Ive moj, Bog ti dal se najbolje i na onomu svitu. Intanto, ja praćku još vavek iman kod i špekuli. Neke stvari se nikada ne hitaju.

Ono ča ljudi, neću reć hitaju leh pušćevaju, pogotovo po leti su kućni ljubimci. E, takove bin ja na Goli otok i ne bin njin dala ni za jist, ni za pit, pa neka vide kuliko će i kako će preživet. Ni mi ćaro, zač zimaju blago kad okol njega ne bacilaju. Od česa je njihovo srce? Ekola, konačno jedna stvar okol ke se mat i ja slažemo!