Maturanti su i ovo leto nemeli po gradu. Ne pojida me to aš va grad gren leh ako moran, a ako ne moran, a da mi se to j’ kako i odvavek – od desete večer. Ne prvo. Kolegi mi povedaju da j’ i ovo leto bilo kako i sako do sad – brašno, voda, petardi, pjesma i tu i tamo kakov izgred. Mladost – ludost, tr kada će ako sada neće. Sigurno ne kad dojdu va moja leta. Jedino ča me jadi je ča se ta dan od maturanti zove norijada. Tako se more zvat tamo kade se tako govori, ma pu nas bi to bila nemijada. Ali, neću opet o tomu aš već i samoj sebe sličin na staro njurgalo. A ča sličin, tr san. Čujen da su ta dečina pukala i prometni znaki pa san se valje domislela one akcije »poštujte naše znakove«. Povedaju i da j’ spred Novoga lista propičil nekakov kabriolet pun dečine ka su visela z toga auta – zajedno su me srhi pasali, ča j’ još jedan znak da san ostarela. Intanto, va moje vrime ni bilo ni norijadi, ni nemijadi, a ni nas va kabrioletih. Ali sako vrime nosi svoje brime, pa neka se dečina zabavljaju, leh neka nikomu niš ne bude.

Kad smo već pu maturanti, ki’vo dan je va Osnovnoj škole Centar bilo jako veselo. Tamo j’ generacija 1964. slavila šezdeset let od male maturi. Bilo j’ prelipo videt današnji školani – maturanti, kako z pljeskon dočekuju oni ki su to bili prvo šeždeset let. Lipo j’ bilo videt i tu nekadašnju ekipu ka gljeda stare sliki i smeje se domišljajuć se na mladost. Ja, vrime leti – još se ni ne obrneš, a već ti je bliža Oktobarska revolucija leh 2024. leto. Porazno, ma neminovno. Šeždeset let slavi ovo leto i jedini hrvatski glazbeni putujući festival – Melodije Istre i Kvarnera.

Za njega vavek znan kuliko let ima aš smo se rodili istoga leta, ja va prvomu, a on va petomu mesecu. Volin reć – MIK i ja, ista smo generacija. Imamo mi i drugeh poveznic. Sad si mislite da san otela reć da smo obadva kod na metle pometeni, ča stoji i ni laž, ma nisan to tela reć leh da san z ten MIK-on odkada znan za se. Kod dite san znala saku pjesmu napamet, onput san kod tinejdžer imela neki drugi glazbeni prioriteti, ma san sedno znala ki j’ na MIK-u pobijedil, a va profesionalnomu životu san pak š njen ravneh 33 leta.

Od 1991. kad je bil, kako bi ja rekla »probni MIK« na Trgu Grivice do današnjeh dan. Ni to malo vrimena. Fanj je sakakoveh ljudi pasalo kroz naš zajednički život. Puno njih već ni, šli su, kako bi rekal moj pokojni kolega Mišo Cvijanović Cvijo – u lijepa spominjanja. Ostale su njihove pjesmi i ono ča odvavek MIK čini drugačijin festivalon od seh festivali, a to su šale i pošalice. Ni lahko bit novinar na tomu festivalu aš to j’ čuda dela, pohajanja, tramakanja, ma to j’ i čuda dogodovštin i vagun smeha. Ki’vo dan san povedala z Mirjanun Bobuš i domišljajuć se sega česa smo se mogle domislet od seh teh pasaneh MIK-i, nismo se prestale smet. Ona j’ sopeta zijala – muči, aš ću se pocurat va gaći od smeha, a ja san odgovarala – tr ti ne bi bilo prvi put i tako smiron va krug.

Kako smo moja pokojna prijatelica Dubravka Munjas Duda, prijatelj Dražen Herljević Mili i ja bili prva pres-služba obnovljenoga MIK-a, onput smo imeli se informacije iz prve ruke, a mislin – ne zato ča smo to mi, leh realno – da su ti naši festivalski bilteni neš najnemeje ča j’ ikada ijedan festival imel. Isto tako mislin da bi se z oven mojen zaključkon složili si oni ki su bar jedan primjerak ikada va rukah držali. Žal mi je ča ih nismo sačuvali, a Karin Kuljanić ih je dugo, dugo let imela, ma ih već nima. Naša j’ karijera veleh zafrkanti finila pokla četiri leta staža radi cenzure. Znan ki nan je došal pera, ma more bit i da j’ tako najbolje aš povuć se trebe na vrhuncu slave, se pokle je bez veze. Sedno, ovin puten pozivan se one ki more bit imaju spravan još ki naš uradak da nan ga ustupe, čisto da imamo bar mići trag na veli dani. A ča se ovoletnjeg MIK-a tiče, onoga slavljeničkoga, ja ne znan kako vi, ma ja komać čekan da krene aš po onomu ča san imela čut, bit će to fešta dostojna šezdesetoga rojendana. Uostalon, tr znate da san odvavek govorila da j’ MIK već čovik leh festival. I doklen je tako – dobro je. Moja mat bi rekla – leta su, a pameti ni. I za me i za MIK.