Prošal je Papa. Danaska će bit zakopan. A ja jedino ča iman reć da mi j’ jako žal ča ni podural aš mislin da j’ imel va planu još čuda tega za načinit. Mislin da mu j’ lista bila fanj duga i mislin da j’ kod i ja, dočin bi neš odbavil, z gušton kraj toga klal kučicu. Morda tomu i ni bilo tako, ali saki od nas ima pravo mislet ča god ga je volja. Sigurna san da j’ mišljenje o pokojnomu pape Franu kod mnogih isto kod ča je moje. Uostalon, on je bila retka tema okol ke smo se moja roditeljica i ja vavek slagale. Jako ju je pogodila njegova smrt. Ni mi ćaro je leh zato ča ga je zbilja jako volela, a ni baš od oneh ki ližu oltari i ki nikada za plovana, a kamo za papu ne bi rekli neš grdoga, ale je zato ča su tu negdere z letimi pa se j’ prestrašila i za se.

Bit će da j’ to kombinacija aš ju već odavna nisan videla tuliko zalepljenu za televiziju kuliko pasaneh dan. Se j’ morala čut i videt pa me par da bi komotno mogla i izvještavat z Trga sv. Petra. Bolje od mane je upućena va izbor novoga pape. Si kandidati zna, jedino ča jih ne more po imenu zapamtit pa čujen – on drugi od tri Talijani, on Talijan ki sliči na pokojnoga suseda ale ne ni on prvi, ni on drugi leh on stari. Pa se ti snajdi va semu tomu. Za ove z Afrike reče on črni beli i on črni debeli, ča mi ni problem razlikovat. Za onoga z Tajlanda reče – on od oveh brižneh ki su došli delat pu nas, onda još postoji potencijalni Krampov favorit, pa on Švaba i da sad ne nabrajan si kandidati aš ćemo do jutra. Intanto, i nju kod i mnoge zanima ki će bit nasljednik papića od ljudi, kako bi rekla za pokojnoga papu Frana. Najveć njoj se pijaža on od straneh delavci aš, govori ona – brižni ljudi neka baren imaju nekoga svoga blizu sebe.

No, dobro, neće bit dugo i znat ćemo. Malo z kolegami tambaškan o semu tomu i nekako imamo podeljena mišljenja. Neki misle da će nasljednik papa Frana bit neki od oneh ke je on sam zibral i da će crikav poć va smjeru koga je on zasinjal. Drugi pak misle skroz obrnuto, da će kurs bit skroz drugačiji, a ja mislin da ne mislin niš i da će bit kako bude. Ono ča bedačinu kod ča san ja najveć zanima, i ne znan ča bi dala da moren bit mušica va Sikstinskoj kapele, je kako zgljeda ta konklava. Film ki se tako zove nisan gljedala aš su mi si mnogi o njemu napovedali tako da niman potrebu gljedat ono ča san sto puti čula. Va Sikstinskoj kapele san bila i smiron mislin da kad se ti silni kardinali poštivaju nutar, da već ni ona spominjana mušica ne more stat. A kad san još čula da jih zaključaju nutar, i da san ta mušica bi me ćapala klaustrofobija. Pa si mislin da onako stišnjeni moru komotno prepiševat jedan od drugoga, videt ča j’ drugi napisal i slično. Onput si opet mislin kako zbilja nisan normalna aš normalna osoba ka ima let kuliko iman ja sigurno ne razmišlja o tomu o čemu i ja. Ma ne moren si pomoć aš mi misli valje lete na one patroni z dimon i onoga ki j’ majstor od dima. Ne daj Bog se čovik pomuti pa namesto črnoga pusti beli dim, a oni još nisu papu zibrali. Avah je mane, to radno mesto nikada ne bi mogla delat aš ja bin se sigurno pomutila i ta papa ne bi bil nikad zibran.

Nisan blizu Rektorata, ma mi se vidi da će papa bit zibran prvo leh rektor rečkoga sveučilišta. Zadimit će beli dim prvo va Vatikanu leh na rečkomu Sveučilištu, govori moj kolega i prijatelj Gromičan. Dražen je još nakon prvoga bezuspješnoga zibiranja rekal da će Sveučilište imet najprvo »vedejca«, a onput rektora ale rektoricu. I ni falel. Ja zbilja ne znan zač on opće gubi vrime kod izvršni urednik kad bi mogal lipi soldi namlatit kod vidoviti Dražen. Ne mislin sad leh na izbor za rektora, Dražen pogodi se – od izbori do nogometa. A sad gredu lokalni izbori, vrime kod rojeno za njega i njegove analitike i predviđanja. Povedat ću van z koliko je uspjeha se to odbavil. Kladin se da će va svojeh prognozah bit na 95 posto, ako ne i više točnosti.

Avah je mane – tuliko izbori i zibiranja, a ja kod hrčak, celi život leh po jednomu krugu vozin. I to još va gajbe. Vrime je za promeni.