Dura maškarani šušur. I ono ča do sada ni bilo nemo, sada je. I neka je aš ljuden rabi malo veselja ale kako bi pokojna teta Dana z Raskrižja rekla – udri brigu na veselje, bolje j’ p…. leh je zelje. Kada san bila mića nikada mi ni bila jasna ta uzrečica, ma mi se j’ jako pijažala. Nikakovo čudo aš deca vole prostačit, pa zač bin ja bila iznimka. Intanto, valje da rečen, da ne pozabin – moja preporuka je da si oni ki misle poć na maškarani tanci večeras gredu tancat na Krasicu aš čujen da će to bit pravi maškarani pakal. Kako i ne bi bil kad je pasalo celo desetljeće od kada se va Domu zadnji put tancalo. Čini mi se da va krasičarski Dom neće moć ni igla stat, zato j’ najbolje reagirat na vrime i rezervirat si mesto. Da ja moren poć, ja bin se nabandala na balkon aš z višega se više vidi. Za oni ki bi raje na Gromišćinu, preporuka je boćarski dom va Dražicah. Ako ne greste večeras, nećete već ovo leto aš to su jedini ovopusni tanci va Dražicah. Sada kad san odmašila za maškaranu večer, red je da odmašin i za ono ča će bit po danu. A bit će čuda toga, od Dječje karnevalske povorki v Rike, kako govore – najmasovneje dosad, preko izložbe mačak na Kantridi, Presnac Opena (ma ča to značilo) na Viškoven, do Balinjeradi va Jelenju i prosvjedi va Urinju. I neka mi niki ne govori da mu j’ ove sobote bilo dosadno. Osin mane, naravno, aš sakomu prama zaslugami, pa ću ja se ovo nabrojeno videt leh na slikah. Niš novoga, ni prvi put.

Sad karneval na stran, homo na bojkot. Nastavlja se, a da me za milijun eurih pitate ča trenutno bojkotiramo, ne bin umela odgovorit. Domislela bin se leh peknjic, a ki od trgovačkeh lanci, zbilja niman pojma. Si govore da j’ ta bojkot dal rezultati, ma me par da j’ to leh govor radi govora aš kad god dojden va butigu, tamo j’ vagun ljudi z punemi košaricami i kolicimi. Mat govori da ja niš ne tendin aš da dan da bin znala da su ceni od puno proizvodih kalale, i da si trgovački lanci sada imaju akcije i popusti. Ala, neka da. Bilo j’ i vrime. I tek tuliko da se zna, ti bojkoti z Hrvacke su se proširili i na okolne zemlji, pa eto, neka korist je.

A ča se tiče zdraveh marendi za školane, to j’ još neš ča ne razumen. Najme, decu niman pa niman pojma ča se danaska va škole dobije za jist. Kolegice čigova dečina gredu va osnovnu školu povedaju da njin deca doma lačna dohajaju. Kako i neće kad njin za jist daju humus. Ma more bit to sto put zdravo, ako se tako zove, ni baš primamljivo za va usta klast. Kako j’ to lipo objasnil moj kolega Gromičan – kakov sakramenski humus, pa ki bi to jil? Na Krku ti Komunalno društvo Ponikve da vriću od pedeset kil humusa za va vrt hitit, a ne za va pijat stavit. Slažen se. Si smo mi va školu hodili i va škole jili i niki ni ni znal za humus, a sopeta smo si živi. Dobil si pekmez i putar, paštetu, Zdenka sir, sengvić od salama i sira, onu odvratnu šimunelu, ki put i jabuku i to j’ bila sa filozofija. Danaska su to silni izračuni i proračuni, i kuliko ugljikohidrati, i kuliko vlakan i kuliko – ne znan ni sama ča se ne, a dečina gredu va peknjicu i natofaju se sega i sačesa. Doma već retki kuhaju pa njin je glavna kuhinja Mek ale ča slično, i onput mi govorimo o zdravoj marende va školah. Bonđorno!

Za kraj san pušćala neš ča me je razveselilo. Najme, pročitala san da smo drugo leto za redon proglašeni najsigurnijun zemljun za noćne šetnji. Lipo mi se to videlo, ma smiron mislin – a, ča j’ z onemi šetnjami po danu. Po danu su onoj gospe očupali zlatni lančić z vrata, pretukli nekoga dečka i zeli mu mobitel… Ma, nećemo sitničarit, ča j’ to naspram oneh strahot ča se po svitu dogajaju. Još vavek smo mi, ma kuliko nan to morda ne zgljeda tako – pitoma zemlja i pitomi ljudi. Da Bog dal da tako i ostane. Razveselilo me je i to ča san sopeta pozabila da j’ Valentinovo i čudon se čudila ča ti muški z ružami pohajaju po ceste. To znači da još vavek nisan šla mater ženit i da još vavek držin do svojeh načeli, a jedno od njih je i da ne priznan nijedan »uvezeni blagdan«. Ni Valentina, ni Patrika ni nidnoga sličnoga. Kako bi rekal šef od Galeba – tuje nećemo, svoje nedamo. Pa komu pravo, komu krivo. Pust je – veselimo se!