Ne znan ako se to vami kad dogodi, ma mane se češće i češće. Ča? Pa to da se sakin danon va sakomu pogledu ćutin se bedasteja i bedasteja. Eko, sad mi j’ lagje kad san to glasno rekla, odnosno napisala. Recimo, danaska san bila sa znemljena aš kako to da ja ne znan da postoji »veliki dlakavi pasanac«, a još manje znan kako se to blago reče na engleskomu zajiku, pa niman nikakovu mogućnost nać sliku ka mi rabi za zažbljakat uza tekst.

Štorija gre ovako – delan zadnju stranicu i gljedan ča se na Hine zanimljivoga nudi. Kako i vavek, niš baš jako ča bi mane veselilo – leh sport, politika i ki kade sope i kanta. Kad, zmed te šume vijesti vidin da su se va zagrebačkomu zoološkomu vrtu, po prvi put va svojoj povijeste okotili dva prelipa dlakava pasanca. Srce Isusovo, čula san za pasanci, to j’ ono blago z oklopon, a ni kornjača, bome ni tenk. Ma, ča postoje i dlakavi i kade njin te dlaki rastu, ča na oklopu? Milijun pitanji san imela, a da ni ne govorin kako san znemela seh okol sebe.

Kad rečen seh, to van znači leh Kostrenku aš su si drugi na ferijah, leh nas dve po cel Božji dan nabadamo po tastature. Intanto, mada spada med oni ki bi komotno mogli poć na bilo ki kviz aš je takova riznica potrebneh i nepotrebneh podatki, da j’ to čudo, ni ona ni imela pojma da postoje kosmati pasanci. Kad smo se dobro nasmele okol pasanci, ja san imela novu dilemu ka glasi – su se ti pasanci rodili, opasanili, okotili ili ča.

Kad je Kostrenka rekla – ne kompliciraj, napiši »došli su na svit«, shvatila san kuliko j’ ur i prestala namaljat o pasancon, ma nisan fermala mislet kako san za zbilja bedasta.

Sol na ranu su mi i te Olimpijske igri ke se va mojoj kuće gljedaju po cel Božji dan, aš matere glavno da je sport, a paron šundranu nogu leči tako da zamišlja da j’ olimpijac. Zač one? Pa zato aš tek sad kužin za kuliko zemalj na ovomu svitu ne znan da postoje. I ni mi nikakova utjeha ča j’ vela većina njih promenila ime aš do pred leto dan bin znala ka i zač, a sad niman pojma ki se opće tamo natječe. O novemi sporti da ni ne govorin. Dobro j’ moja mat rekla da kako su počeli će olimpijski sport bit i kopanje va nosu. Zajedno san imela sliku – ki skopa najveći mokulić tomu zlato! Mat stalno namalja da brižnen sportašon trebe puno jist, a da njin ti sakramenski Francuzi pežu saki zalogaj. Onput ju još vavek pojida to ča sportaši spe na kartonskemi posteljami aš da se na takovemi sigurno neće odmorit, a da se oni debeli moru i šundrat ako te kućeti popuste.

Njeja kraljica Olimpijskeh igar je Kolinda Grabar Kitarović ale kako ona to skrati pa reče naša Gromišćica presjednica. Jako ju pijaža ča se j’ razletela po celomu Parizu i ča j’ vavek uz naši sportaši. Kako bi mat rekla – vidi se da j’ to gromiško dite, ne pači toj i sunce, ni daž, a da ima srca – ima. Jako j’ kuntenta i z Kolindinin opravicami aš da j’ najlipje obučena od seh – pristojno kako i doliči i vavek z merun, a sopeta tako lipo.

Govori – neka Pariz vidi da i mi znamo ča j’ moda. Jedino ča ju pojida vezano za Kolindu je da j’ jako oslabela i da bi morala malo pojačat obroki aš da nidna prazna vreća ne stoji. Na to ju ja pitan da kako onda prazna glava stoji, a ona istoga časa odgovara – pitaj svoju.

A tr ju, videli ste i sami, sako malo priupitan ma odgovora ni. To mi j’ jedna vela nepoznanica kod ča mi je i ona vezana za ov naš prelip grad. Ni mi jasno kako on opće funkcionira kad je brižan raskopan od početka do kraja, po sakomu koridoru i nekoridoru. Ne znan kako zgljeda vozit 40 minuti za pasat petsto metri, aš ne moran, ma znan da me se sili ovoga svita ne bi natirale da gren va grad ako ni sila. Je, neki će reć – lahko j’ tebe kad i z Kastva i z Krasice moreš do Novoga lista doć po obahajalnice. Istina, moren, ma neka se i mane jedanput posreći, mada j’ i na obahajalnice gnjeta. Malo turisti, malo oni ki izbjegavaju grad, malo oni ki voze manje od propisane brzine i začas si na 50 na uru, ma doklen se giban – ja zadovoljna. Leh da ne stojin i pogotovo ne na mostu ale, ne daj Bog, va tunelu.

Leh još jedan veli naklon sen vatrogascon i moren klast točku i nastavit mislet o kosmatomu pasancu aš je lagje o tomu leh o nečemu ozbiljnomu.