I tako, malo po malo i došli smo do zadnjeh pusneh dani. Pred nami je rečki karnevalski pakal. Gljedan malo va ov program i mislin – avah je onomu ki misli da more bit na semu ča se ov vikend spod maski skriva.

Lahko ča je va gradu na Rečine šušur, ma tanca se i va prigradu. Zato pamet va glavu i dobro zibrat. To da će si bit nedelju na Korzu, to mi j’ ćaro, a sobotu – po izboru.

Oni ki misle da njin je najbolje poć na humanitarni bal va Exportdrvo, neka se ne zabune i ne obuču va trliž – tamo se tanca na jednomu višemu nivou. Oni ki ne haju za visini, ma haju za humanitarno, neka gredu na Piđama party va Iskru. Ni obavezna piđama, ma obavezna je dobra volja.

Već desetljeći pratin ta karneval, na nekada zvanomu VIP balu nikada nisan bila aš nekako mislin da bal niš z mojen prisustvon ne bi dobil, ma va Iskru san volela poć i da mane neki pita, a ne pita me, ma ja sedno govorin – va Iskre je najbolje.

Ma, sto ljudi, sto ukusi, a o ukusimi se ne raspravlja. Sako od teh dogajanji ki imaju humanitarni karakter su super dogajanja aš ako greš nekamo z nakanun da nekomu dobro načiniš, onput je i tebe dobro.

Da ne pozabin pozvat i na humanitarnu maškaranu jotu i na humanitarnu maškaranu maneštru ke će se danaska kuhat va gradu. Lipo se najiš, konačno malo žlicun pojiš, a još nekomu i korist načiniš.

Ma, kade to osin v Rike još ima. I za kraj ovoga maškaranoga kantunića leh par savjeti za nedelju, a i za inače. Ovako – večer prvo ne se jako napit, aš će drugi dan glavina bolet. Ako se to dogodi, onput postarinski – poć do kaci z kapuzon, ocedit malo rasola i popit.

Ako ni to ne pomore, onput ni druge leh se držat one stare ka govori da se klin z klinon zbija pa lipo nastavit kade si noć prvo stal. Oni pak ki su se friški stali, ma takovi, znaju i sami da neće do kraja dana ostat, dobro se najist, ma prvo toga zlicicu maslinovoga ulja popit aš to drži alkohol pod kontrolun.

Prvo leh kreneš va povorku, obavezno poć curat i ča god telo pita da ne bi pokle bilo – biž’ te pete, posrat ću vas. Ravnomerno rasporedit hopsanje da ne bi na Korzu sedeli do druge povorki i ne bit zločest ni sebe, ni drugomu.

Za saki slučaj imet zapisanu atresu da vas moru doma vrnut ako se ne morete sami. I nikako – ne šćipat gradonačelnika ni njegovu svitu za rit aš oni to vole pa zač njin dat gušta.

Oni ki ne vole tradicionalni karneval, moru poć va Opatiju. Zač? Zato aš kada j’ moja roditeljica gljedala Plavi tepih od Dori, rekla je da je Rečki karneval dobil gadnu konkurenciju. Z ten me je nasmela do suz. Lahko ča me j’ pitala ki su ti ljudi ki su došli kantat va Opatiju aš da ona nikoga ne pozna leh me je i za sakoga drugoga pitala je muško ale žensko.

A najbolja je bila kad je rekla – avah je njihoven roditeljon, ja san mislela da jedino ja odgajan strašilo, kad vidi kuliko nas je. A tek kada j’ došla prva večer Dori, e, da van je to bilo čut. Božiću dragi – vidi, ovi su faleli, namesto va cirkusu finili su na festivalu.

Joj mane, su to njih dva goli? Ča j’ ovo festival ale pakal? Čuj, čuj, ča ova ista kanta na francuski? Stel va žiri puknul, pa ča Francuzi žive va ovoj zemlje? da j’ na indijskomu ale filipinskomu još bin razumela. A vidi se da j’ ov dečko naš, konačno jedan va veštidu. Ma, je moguće ovo ča ja gljedan? Makni tu šporkariju, hitit ću papuču va televiziju!

Onput smo maknuli, a ja san prenos dofinila na HTVi kad je ona prošla spat. Ča se tiče nje, ako se ne predomisli aš nekako mislin da je preveć kurioža da ne bi baren pošpijala, finili smo z Dorun.

To je nju jadilo, a ono ča j’ mane je zvuk. Imela san dojam da su si ti ki pjevaju va jednoj veloj bačve va koj čujen leh basi, i zagušen vokal. A more bit i bolje da ne čujen.

Ča se tiče Barbari, i seh oneh bedastoć po društvenemi mrežami vezaneh za njeji zubi, e, to me zbilja ne pojida. Njeji zubi, njeja briga. Ma da j’ bila šesna – bila je. Ja, pozabila san reć da j’ mat pitala da ča ona i Ćurlić imaju urdin i popazit su tu mulariju ka tamo nastupa.

I za kraj Dabro. Ča reć osin bolje se j’ rodit bez miša leh bez srići.