Avah je mane, ova južina će me potaracat. Ma, ne toliko ona kuliko ta švikanja ka ujdu va ljudi dočin malo zajuži.

Počelo je od ranoga jutra kad je gospa Zmaj doletela va kamaru i počela zijat – telice, ča ti ne vidiš da j’ vane sudnji dan.

Skočila san, mislela san da će mi srce z tela skočit vanka pa da ću ga po kamare morat lovit aš jušto ta tren kad me j’ zbudila san sanjala da j’ počel rat i da gren va partizani. I to ne svojun voljun leh zato ča nikako nekakovimi ljudimi nisan mogla dopovedat da san za mirno rešenje problemi, da iman već od 55 let i da ne umen ni kuhat, ni prat, a još manje plest šotokalci i rukavice.

– Stani se nesnago i hodi zapret škuri aš ja ne moren, maši roditeljica i bada me šćapon va rebra.

Kakove sad škuri, ča je ponemela pa misli da ako zapre škuri neće videt da j’ počel rat, a ono ča ne vidiš, to ni ne postoji. Stojin tako na sred kamari, ni ne čujen ju ča namalja leh osjetin ta vražji šćap med rebrimi.

Onda je vane zapucalo koda su va isti čas vetar pušćali si konji od Ilije Gromovnika, a kola šla mater ženit.

Ona j’ zamučala i pobigla najbrže ča j’ mogla va svoje sklonište ča će reć va špajzu, a ja san, još onako va polusnu, dokončala da mi se j’ najbolje vrnut va postelj aš će me proglasit dezerteron, a onput san nadrajsala.

Još ni oči nisan zaprla, opet je grunulo i ni bilo druge leh se zaspraven stat i poć zapret poneštri i odvit osigurač aš san već navadila da mi j’ lagje tako leh saku napravu posebno otkopčavat od struji. Sveti je mir bil jedno pol uri aš se od straha ni javljala. Z špajzi se leh čulo, majčice Božja, budi mi na pomoće aš od ove moje ni nikakove koristi. Mislin si, ma ča me i pred Majkun Božjun mora špotat.

Skuhala san kafe, njoj belo, mane črno, klala san njoj kolačić na pijatić i leh san njoj to rinula va špajzu.

Mislin si – zabavit će se jiduć pa će manje mislet na strah, a i manje će me otipat spred nebeskog svita.

Bonđorno! Bilo j’ još i huje aš kafe ni bilo dosti slatko, a kolačić je bil presladak. Bilo j’ još tu čuda bedastoć ma san pokle nekoga vrimena va mozgu ukopčala »područje bez signala« i nastavila na miru pit kafe, smiron misleć na ta san o ratu. Zaspraven, nikakovo čudo da san baš to sanjala, a ne recimo da san na Islandu, da guštan zmed oneh divljeh konjići i gejziri.

Ale negdere na nekomu svjetioniku kade mi niki ne zvonca okol glavine, recimo more i na Srakanami, sedno Vele ale Male, aš ako ti stalno neki puni glavu z raton, logično je da to i sanjaš.

A ja o ratu naslišan na delu, doma, o njemu povedaju va sakemi vijestimi, pišu va sakeh novinah i na portaleh, pa kako čovik da ne pošempija? Jušto kad san dokončala da nikakovoga rata neće bit, da san leh grdo sanjala, evo Zmaja z špajze vanka i prvo ča govori je – si ti čula kako j’ to pucalo, huje leh da j’ rat počel.

I da ću njoj reć i da je pa da sopeta zdimi va špajzu, a ja još malo kupin vrimena za bit na miru, zvoni mobitel.

Javin se, kad ono nekakovo osiguranje ko pita ako bi osigurala imovinu jer da su »nestabilna vremena u kojima može doći i do ratnih razaranja…«.

Nisan rekla ni a ni be leh san prekinula vezu. Iskreno san se zabrinula i za se i za ljudi aš ako neš stalno spominješ to i prizoveš. Baren su tako govoreli stari ljudi. Stala san se i zazvala mat da zijde aš da je opasnost pasala, zavrnula san nazada i on drugi osigurač koga san zabunun odvrnula i bi svitlo va našemu teplomu domu, klala san njoj televiziju na crtani filmi, stavila obed na stol, a večeru na mići stol, pripravila tableti, dala vitamini, bušnula ju va čelo i rekla – ja sad gren va partizani, doć ću okol pol noći, a ti neprijatelu ne daj ni pedalj naše zemlji, a ni ne zimaj tuju aš znaš kako j’ Tito govorel.

Ako zapuca, neovisno z neba ale zemlji, znaš kamo ti j’ poć.

– Majčice draga, kakovu telicu san ja rodila, rekla je smejuć se kod nema. Tresnula me j’ šćapon po rite i rekla – pamet va glavu i ne hodi na bunkeri.

I tako j’ ona ostala smejuć se, a ja prošla smejuć se. I smela san se se doklen nisan na delo došla i doklen nisu si oni zmućeni z južinun počeli pozivat.

A ča ćemo… Jutra j’ novi dan.