Sedin va redakcije, kljucan po tastature i sakeh pet minuti govorin – ala bog, lipo se provedi na ferijami i počini. Si gredu na dopust, a ja kod Pale sam na svitu razmišljan kako j’ on Kalimero va crtanomu imel pravo kad je zijal – to je nepravda, prava pravcata nepravda.

Ma, neka, dočekat ću i ja svojeh pet minuti i svoj dopust. Kad krenu dažji jesenji ću šljapkat okolo i opet bit Pale sam na svitu aš će si drugi delat. No, sakomu prema zaslugami pa tako i mane. Uostalon, i ča bin na teh ferijah – na more ne gren aš ne volin gnjetu, va planine ne gren aš gospa mama ne želi ostat sama, za put na Mesec niman soldi, a i strah me je da bi mi se zapijažalo pa bin tamo ostala, pa j’ najbolje da san tu kade san, ča će reć na delu. Kad malo bolje promislin, ča mi fali? Iman najveću kancelariju va Novomu listu, celi kat redakcije! Nigdere nikoga leh ja. Klima dela, niki mi ne pači, radio moren navit na najjače, a kada mi prifale ljudi leh se poprtin kat više, tamo ih je vagun pa moren poćakulat dokle mi ne dosadi ale ja njin pa me spraše nazada va podzemlje. Dakle, opće mi ni loše!

Jedino ča mi ne odgovara je ča stalno delan pozapolne pa ne arivan na nikakovo dogajanje. Recimo, silno san otela poć na koncert od Karin na Trsat, ma nisan dospela, a čula san da j’ bil fantastičan. Žal mi je ča Mirjana ni mogla doć, razlogi je sama napisala na svojoj fejzbuk stranice, a drago mi je ča j’ Mario uskočil i ki god je bil, a bili su mnogi, rekal je da su Karin i Mario to super odbavili. Ča ti j’ imet pravi prijateli! Onput san večeras (aš ja pišen po petku, a vi čitate po sobote) otela poć va Hroljevo na Jadranski, odnosno Bakarski susreti, a pokle malo poslušat i šjora Bulića, ma niš od toga. Naslišat ću ja ljudi z tehničke ki će namaljat da mi j’ ov nadnaslov predug, ov podnaslov kratak, da mi naslov krivo pada, da mi j’ teksta na stranice preveć ale premalo, ovisi ki ju slaže aš je vavek njoj preveć, njemu premalo, a po soj logike bi trebelo bit obrnuto. A ča, tr to j’ va sakomu delu tako, a moje kolege grafičari su zaspraven OK ljudi aš z munjenemi urednicimi ni lahko zić na kraj. K tomu je još i sopeta zateplilo pa su živci malo tanji leh su inače i kad se se klade na kup to nas je ki put čut zijat se do Mlaki.

Oni ke san jutros čula zijat va butige bili su penzioneri ki su komentirali ovu povišicu plać političkoj elite. Neću ponovit ča su se rekli, leh zaključak – Tito j’ dal sebe ma je dal i sen drugen. Malo si mislin, nisan baš čula da j’ Jovanku, ma ni bilo ku ljubavnicu delil z radničkun klasun, ma nisan se oglasila aš bi me ti penzići, kuliko su bili jadni – pojili. Ako mane pitate ča ja mislin o temi povišicami odgovorit ću da niš ne mislin aš saki ki je bil na izborimi imel je mogućnost odabira, a on ki ni bil ta sada nima pravo glasa. Ono ča mane pojida je ta vela razlika zmed rojeneh i umrleh. Ljudi moji, pa to j’ strašno. Ako ovako nastavi još malo pa nas neće ni bit. Ča bi moja gospa mat rekla – nekad bili, sad ih spominjali. Pa još doda da j’ to zato ča danas ljudi raje imaju pasi leh decu. Onput joj ja odgovorin da to čudo kuliko ih je ona rodila, komać mane. Na to dobijen vavek isto – on ki ima nesnagu kod ča si ti trebel bi dobit benificirano roditeljstvo i duplu penziju ako ju doživi. To j’ koda san ih imela deset. A ča se tiče jedno ili nijedno, kuliko ih ti imaš. Odgovaran – jedno od 88 let i onput moran brzo pobić aš prodela šćap. Ofendi se, pa smo bar pol uri nam miru aš ne poveda. Srića od Boga ča počinju Olimpijske igri pa će se namesto s manun karat z televizijun, spikeron, sudcon i ča ti ga ja znan z ken još. Gljedala je na nekomu Dnevniku da va Pariz gre i Kolinda i leh je komentirala – neka zaključaju svlačioni. Ja, ume Zmaj bit i duhovit. Retki petki, ma ume.

Kad san njoj rekla da su si morski pasi oko Floride drogirani leh je mahnula z rukun i odgovorila – va toj Merike ni pasi nisu normalni. A kad san njoj rekla da na Floride ima najveć penzioneri odgovorila je – od objesti ne znaju ča bi pa se drogiraju, pu nas penzioner nima ni za kruh, a kamo za te pizdariji. Nisan njoj rekla da su ti brižni morski pasi pojili švercanu drogu, pušćala san ju da namalja o Merikanon.

I tako, dani prohajaju, a ja ću leh još svomu Josipu, svomu Meksiću, čestitat rojendan i zaželet mu se ono ča bin i samoj sebe!