Njih dva su zaspraven prošla z Radio Riki, govori mi ki’vo dan jedna persona z kun san, ča bimo rekli – ni vrit, ni mimo. Odgovaran – su. A ona kod škura bura na me – ča to j’ se ča ćeš reć?, ča ti to nisu prijateli, zbilja si bezosjećajna, ne laže tvoja mat kad to reče. Ni mi bilo ćaro ča san trebela reć.

Zaspraven, njeje san pitanje shvatila kod konstataciju i nisan mislela da čeka moj komentar. Uostalon, ča ja š njun opće iman komentirat činjenicu da j’ Radio Rika ostala bez svoja dva zaštitna glasa.

Ako j’ to bila njihova odluka, a kuliko znan – je, ka san ja da o njoj razglaban. To da mi je žal i da mi još va glavu ne gre da ih već neću naslihat na svojoj omiljenoj radiostanice, to j’ drugi par rukavi, ma tako je – kako je.

Na ovu ku san spomenula neću već gubit vrime, ma imaju njih dva tonu praveh obožavateljic od keh su neke, kad su čule da su prošli z Radio Rike, odlučile da već nikada neće naštelat radio na tu frekvenciju. Ja, se vele ljubavi su tužne.

Ni mane ni lahko aš to su leta i leta susreti, isteh problemi, smeha, tuge i sega vranića. Josa san upoznala prvo leh Ferlina, ma Ferlina san češće vijevala. Uostalon kuliki MIK-i smo odelali skupa, kuliko noći i živci zgubili okol njih i kuliko puti se do suz nasmeli.

Doklen ovo pišen koda čujen pokojnoga Galeta kako govori… Bolje da ne znate ča j’ rekal. Falit će mi na tomu radiju, a va životu ćemo se valjda nastavit kumpanjat aš ni sad da jedan gre na Mars, a drugi na Veneru.

I apsolutno razumen ta silni slušateljski korpus ki j’ sad va nesveste aš ni isto kad znaš da ćeš z te škatule čut glas koga slušaš već let i let, z ken si odrasal, ale ostarel, ljudi okol keh si se puno puti nasmel. Ljudi kemi si veroval. Z druge bandi gljedano, ni ni njimin bilo lahko poć ća. Va tu su zgradu došli kod mladići, a gredu ća kod barbići.

I ni to nikakova uvreda već je činjenično stanje, a to ča oni neće nikada ostarit, to j’ sad već vezano ne za leta leh za mentalni sklop. Uostalon, niman se ja ča komu špotat kad smo si tri tu negde po staroste.

A i po pamete, rekli bi oni ki nas malo bolje poznaju. Intanto, da će falet – falet će nan, kod ča ćemo i si mi baren prvo vrime falet njimi. Ča još reć – fala njin na sakomu onomu danu va komu su i najtužnejega čovika na svitu znali nasmet i neka još dugo dugo let to delaju na nekomu drugomu mestu, onomu koga si sami ziberu.

Se najbolje va mirovine ili va nemirovine želin i ostalemi kolegami ki su prošli z Radio Rike – Neve, Olivere, Hržiću… A onemi ki su ostali, ki će doć želin puno slušatelji i puno smeha va redakcije aš badava ti delo ako se na njemu nimaš z ken nasmet. I zaplakat ako rabi.

A ja san od smeha zaplakala za pasani prvi april i to više puti. Veseli me ča su ljudi još ljudi i ča se umeju smet i na svoj, i na tuji račun. To ča Thompson, baren kako sada stvari stoje neće kantat na Hroljevu, a mnogi su poverovali da će, ni baš za smet se, ma ja nekako verujen da će ta šala prerast va istinu.

Morda ne ovoga leta, ma jednoga sigurno će. Uostalon, ki j’ veroval da će moj kraj imet bazen. Niki, da san to napisala prvo par let bi si rekli da san nema, a gljedajte sada – za dve leta na Kukuljanoven i bazen, i dvorana, i trg, i poslovni prostori – ma sega vraga.

Neće bit dugo, imet ćemo mi i vaterpolo ekipu i plivački klub, a morda i ronjenje na dah. Se san to odmašila kolegan ki su malo posprdno komentirali bazen, aš da ča će to nan. Malo san ustala kako su bedasti, a onput san dokončala da se tu ne dela o bedastoće leh da su zavidni.

A ja, ni lahko pokle tuliko let kuliko smo mi z prigrada bili zadenjeni, zapućeni, ale kako bi nan rekli – seljačine, najedanput shvatit da se j’ se obrnulo i da se ono ča su oni nami govoreli, sada mi da ćemo, a nećemo, moremo reć toj silnoj gradskoj gospode.

Ma, pušćajmo mi se to sa strane, ono ča je va celoj štorije važno je da će nan dečica imet kade učit plavat, a i da će bit oprto čuda radneh mest. Ja već sada pikiran na jedno, a vi si mislite na ko.