Na dan kad bojkotiramo si trgovački lanci i se butigi, mojoj matere je pofalilo sega va kuće. Ča bi se reklo – od igli do lokomotivi, mada već ne krpa aš njoj nima ki navrest, a ni cug ne pelje. Ovako van je to bilo – sako jutro, ale j’ bolje reć polne, kad se odbavljan na delo pitan »ča rabi z butigi donest«. Odgovor je vavek isti – niš. I onput ja po svomu i vavek je njurganje i namaljanje, i vavek neš nisan donesla, a to j’ bila nasušna potreba i nikada zadovoljni. Danas se odbavljan i niš ne pitan, a ona z onoga svoga kraljevskoga trosjeda govori – ča danas niš nećemo jist. Va čudu ju gljedan i odgovaran – kako to misliš niš nećemo jist. Ona govori – a, me par da ne aš ne pitaš ča rabi z butigi. Došlo mi je da zazijan, ma nisan leh san na mirno rekla – mama, pa već tri dani namaljaš kako j’ super to ča smo se si najedanput zbudili i dokončali kako j’ vrime da se bobu reče bob, a popu – pop. I da trebe butigi bojkotirat saki drugi dan, a ne leh ta jedan. I dakle, danaska kad je dan od bojkota ti pozabiš. Zajedno se j’ zdigla na zadnje nogi i počela rigat vatru na me – telice, nisan ja niš pozabila, ma si ti pozabila čera kupit se ono ča će nan danaska rabit. Pitan – a, molin te prez česa mi to ne moremo danaska pasat. I onput je počela nabrajat – nimamo kruha aš onoga od čera ti ja neću jist aš si ga pozabila klast va najlon pa j’ tvrd da biš š njen magarca mogla ubit. Nimamo š čen pošadu oprat aš si čera pozabila kupit. Nimamo harti za kondot, a ni one za kuhinju. Nimamo vrećice za meso zaledit pa će nan propast aš ga na vrime nisi spravila. Nimamo niš slatko ako nan ki dojde… Ma niš nimamo.

Iskreno ću van reć – morala san brojit od deset na nazad da ne eksplodiran, pa tako još jedanput i tek onput san odgovorila – mama, ako nećeš kruh od čera ima kompira. Za suđe prat imaš dve bocice spod špini. Harta i za kondot i za kuhinju ti je va špajze. Meso san zaledila on isti dan kad san ga kupila, a ča se tiče slatkoga – špajza nan zgljeda kod najbolje opremljena slastičarna. Dakle, sega imamo i ja ti danaska va butigu ne gren. E, onput je krenulo namaljanje kako morda i imamo se to, ma ča j’ bolje kad ja se rashitan i ona niš ne more nać pa toga koda ni ni. Intanto, ja san sopeta bila kriva za se, ma ča j’ bolje bilo ča reć pa san leh rekla Bog i ćapala kvaku. A ona je zamanun leh zazijala – i ne pozabi mi kupit vitaminu aš apoteki nisu va bojkotu. Nisan zdurala pa san njoj rekla – neću isto kot ča ti nisi čera pozabila čestitat mi rojendan. Lupila san z vratimi i prošla. Sad me baš zanima ku škužu će nać za ta moj pozabljeni rojendan. Štorija od butig se j’ nastavila i kada san na delo došla. Si su kokodakali okol toga. I ki je bil, i ki ni bil, i ke butigi će bit pod bojkoton narednu šetemanu, a ke onu drugu. I kuliko j’ ovo ceneje va Slovenije, kuliko ono drugo va Italije, a kuliko j’ se skupo pu nas. Ma, nikada kraja.

Leh da se ima o čemu povedat, a to kuliko će ti bojkoti i će uopće donest koristi, to ni niki mislel. Najbolji mi j’ bil moj Gromičan Mili, poznat kod veli protivnik sega masovnoga, od adventi, preko Valentinova do bojkoti, ki j’ rekal da će od dešpeta poć va butigu i da će mu bit baš lipo pohajat i kupovat aš da neće bit gnjeta ni za parkirat ni za kupovat, a ni na blagajnah. Šegav je on, moran priznat. Ten više ča j’ jedna druga kolegica rekla da ne pamti kad na rotoru na Škurinjah ni stala va kolone, a čera bome ni. Govori Inge – leh san proletela, super je bilo. Jedna druga j’ pak pozabila da j’ bojkot pa j’ šla kupit bomboni za cucat aš da kašljuca i govori da se j’ čudon čudila kade su ljudi, ma govori i kako su ju prodavačice grdo gljedale. Kad se j’ domislela na ki dan je šla va kupovinu bomboni, badava njoj je bilo ispričavat se i blagajnice, i nan. Ubili smo ju od zafrkancije tako da su njoj ti bomboni va grlu stali. Za kraj od ovoga dana od povijesnoga ne sen butigan i butigerimi leh ću van još reć da moje skromno mišljenje glasi – tresla se brda, rodit će se – niš. Jutra ćemo si nadoknadit ono ča smo propustili danaska. Nažalost, nidan analitičar neće poć računat kuliko j’ ta potrošnja od »dana pokle« bila veća od prosjeka. A ta »dan pokle« je ključan za zmerit uspješnost bojkota. Avah je nan, dugo smo mi od našeh sused ki za se ča njin se ne pijaža zijdu na cestu.