Lipi moji, nadan se da ste va zadovoljstvu proveli i Badnjak, i Božić, i Stipanju i Ivanju, i da ćete va istomu pravcu nastavit i dalje. Ča se mane tiče, da me j’ malo manje želudac bolel, bi bila ocjena pet, ovako j’ negedere na četiri, ča j’ jako dobro. Ma, vranić zel i bol, ja san se najila patki i mlincih pa neka boli. Kako bi moja mat rekla – kade boli, neka i stoji. Nikada mi ni bilo ćaro ča njoj to znači. Pu nje odvavek mane puno toga ni ćaro, ma ča san stareja to manje razmišljan o tomu. Tuliko san teh božićneh filmi odgledala da san se predozirala i da mi va glavine stalno zvone božićna zvonca. Ni van mane briga je repriza, je premijera aš dočin neš ima srićan kraj, ja to moren gljedat kuliko god puti iman priliku. Vidite malo, kako san ja zahvalan gledatelj, pardon – gledateljica, saka televizija bi me poželela.

To ča su drugi va kuće nemi od mane i teh, kako bi roditeljica rekla – božićneh preseravanj, to j’ sad drugi par rukavi, ma iman i ja svojeh pet minuti va toj kuće. Tr ionako njurgaju da me nikada ni, pa neka potrpe ti retki petki kada san. Trpin i ja se njihove vijesti, dnevniki i informativne emisiji. Već mi na uši zihajaju si ti političari, se te floskuli i sa ta predizborna munjesanja. Lete ti naši presjednički kandidati, te naše buduće moguće presjednice po celoj Hrvackoj i dijaspore. Koda su na metle pometeni.

Afera do aferi, a se skupa niš. Leh tambaškanja bez smisla i poretka. Avah je mane, kako j’ lipo živet va uvjerenju da si najbolji, najposebneji i najzaslužneji za sve na svitu. Ma i va svemiru aš nisan sigurna ni da bi sunce zišlo da moja roditeljica ne da befel – sunce vanka, mesec spat. Kad malo bolje promislin šteta ča ni ko leto mlaja pa da se i ona kandidira za presjednicu. Bilo bi to jako zanimljivo za videt i čut, a sigurno bi dobila već glasi leh pojedini ki su se za tu funkciju do sada natjecali. Intanto, pu mane doma, ča se predsjedničkeh izbori tiče, stanje je podeljeno. Saki ima svoga favorita, pa ćemo videt ča će bit na kraju. Mislin čigov će kandidat dobit aš da će po ostalemi pitanjimi bit bolje ale huje, nekako ne verujen. Tr presjednik kućnoga savjeta, ale kako se već danas ta funkcija zove, ima veće ovlasti leh ča ih ima presjednik državi. Da j’ pitat moju mat ona bi zajedno republiku promenila va kraljevinu, a sebe proglasila kraljicun. Aš ki drugi ako ne ona. E, ta ki bi bil bolji, pošteneji, vredneji i šegaveji od nje, ta se još ni rodil, a me par da ni neće.

Pušćajmo mi politiku i homo na kuhanju. Kako se pu mane mora gljedat program ki zibere, znate već ki, onput ja saku večer žbaljin va ta Masteršef. Od prvoga dana najdraži mi j’ bil mali Tin. Ne zato aš je Lovranac, ča će reć naš. Ne zato aš je najmlaji leh zato aš mi j’ na prvu bil jako simpatičan. Jedno velo dite ko va sebe nima ni malo zla ni pakosti. Koda ga j’ neki složil leh od dobreh lego kockic – vavek svoj, vavek iskren i vavek pun duha. I kada se to dite rasplakalo, ja ka teško, baš teško suzu pustin, rasplakala san se skupa š njen. Bože, ča mi ga j’ bilo žal. Pa ipak on ima leh devetnajst let, a ono ča oni va toj kuhinje i va toj kuhanje moraju proć ne bi zdural ni puno iskusneji i stareji mozak.

A onput je mali Tin pokazal duh kraja z koga dohaja i ono naše – kad si misle da si potloh, ti se staneš i dofiniš ono ča si naumil. Tako san bila žalosna ča ni prošal va to sakramensko finale, i tako san bila ponosna na toga deškića da van to ne moren objasnit. Mislin da j’ va tomu konačnomu ocjenjivanju cela Hrvacka najvijala za Tina. Finilo j’ tako kako j’ finilo ma za me je Tin pobjednik ovoletnjeg Masteršefa. I ne samo za me, mislin da za većinu oneh ki su ga gljedali. Su sriću ovoga svita mu želin, a familje kapa do poda ča su ga takovoga zgojili. A to ča sada po društveneh mrežah ljudi pišu gadarije na račun onoga ki j’ prošal va finale, to ni lipo aš to ča se preziva tako kako i šef od žirija ne znači niš. Tr i ja i Luka smo Modrić pa ča mi j’ bolje.