Doklen ovo pišen smiron mislin kako bi nekada današnji dan bil najhuji dan za si prasci ondašnje državi, aš, fala Bogu, ki god je živel va to vrime, zna da se j’ za Dan Republiki klalo va sakoj drugoj kuće. Majčice mila, kako ovo ča san napisala grdo zgljeda. Intanto, danas je prasci se manje, a praščin se više i ki se već domišlja na ono kako j’ nekada bilo. Ljudi se manje drže prasci, aš da njin se to ne splati – jido da j’ skupo, boli da su sakakove, a i ova sakramenska klima ni malo ne pogoduje svinjogojstvu. Buričina ne puše kako nekad pa se pršuti ne moru osušit, teplo je va sred zimi pa se to meso već cedi leh se suši, a ča se tiče dima i dimljenja nutricionisti se love za glavu dočin njin takovo ča spomeneš aš da j’ se dimljeno smrt za zdravlje čovika. I zato smo došli do toga da j’ praščevinu i se njeje prerađevine lagje kupit va bilo komu trgovačkomu lancu leh uzgojit svoju. Se tuje je vavek slaje, ča ne?

Naravno da moj »razred«, ča će reć moje mlade kolegi nisu baš jako puno znale o Danu Republiki ondašnje državi. Uostalon zač i bi, si su se rodili pokle njeje smrti. Tako su misleli da se na ta dan nosila štafeta, a ne da su se prasci klali ča me j’ dobro nasmelo. Ono ča me ni nasmelo već i razjadilo i rastužilo je ča se na ta dan domislin one mlade novinarki Ženi Lebl ka j’ radi vica o Titu finila na Golomu otoku. A ča j’ brižna rekla, apsolutno niš – va redakcije je povedala kako njoj je jedan kolega povedal kako j’ Jugoslavija dobila prvu nagradu va svitu aš da j’ jedina uspjela uzgojit fijolicu belu od sto kil. Si su prasnuli va smeh aš je sen ćaro bilo ki je fijolica bela, ma se sedno našla nekakova nesnaga ka ju je prijavila, pa su po nju došla dva udbaša i otpeljali ju na ispitivanje. Kako j’ se finilo – zna se.

Se se j’ to zbivalo 1949. leta, a 1982. leta ja san čekala red za poć polagat ispit z marksizma i nagnjena na vrata od profesorovoga kabineta kratila san vrime sebe i kolegan povedajuć vici. Zmed ostalimi san povedala i onaj ki j’ više pitalica leh je vic, a glasi – ča zijaju črvi va Kući cveća? A ča drugo ako ne – mi smo Titovi, Tito je naš. I kada san konačno došla na red profesor mi je rekal da me neće ispitat doklen ne poboljšan ponašanje. Zišla san zbunjena vanka, ni mi bilo ćaro zač, a onda san dokončala, došla za šetemanu dan i dobila tri na ispitu na komu san se znala.

Srića od Boga ča teh osandeseteh nisu za takove stvari slali na Goli otok. Intanto, ta profesor je već odavna pokojni, ma ja mu do dana današnjeg nisan pozabila to ča j’ načinil. Najme, ne zameran ja njemu zatucanost leh to ča ni imel smisla za humor. A ča se tiče Kući cveća, sa srića da kad san bila va njoj ta vic nisan znala aš ki zna ča san, ovakova kakova san, mogla blebnut pa finit ki zna kade.

A sada dosti domišljanja na ono česa više ni i oneh keh više ni. Homo mi lipo na našu svitlu budućnost ku će nan donest neki od do sada prijavljeneh četrnajst kandidati ki se bore za poziciju prve ale prvoga va države.

Oni sada moraju, pod jedan – skupit teh deset tisuć potpisi kuliko njin rabi za kandidaturu, pod dva – smislet ono ča još niki do sada ni obećal kad se za to mesto kandidiral, pod tri – vježbat bahatost i bezobrazluk aš to je glavno oružje protiv suparniki i pod četiri – oni ke kandidira stranka moraju bit dobri z stranačken vodstvom aš ki će koga ako ne svoj svoga.

Nisu to baš lahki zadatki, ma ki misli bit predsjednik, pardon predsjednica mora se pomučit da bi naredneh pet let mogli počivat. Ja ću trenirat i kad buden vela ću se i ja kandidirat. Ča bin ja bila huja od mnogeh ki su do sada pretendirali na to mesto, a zaspraven nisu mogli bit predsjednici kućnoga savjeta, a kamo državi.

Nego, ča će nan se to kad je črni petak na ki ja i da ne delan ne bin šla aš ne priznan i ne prihvaćan se te tuje nemotarije kod ča j’ to i slično. Čujen da j’ va trgovačkemi centrimi pravi stampedo, a čujen i kako razne službi upozoravaju kupci na vele mogućnosti prevar na ovakovi dani kod ča j’ črni petak, tako da bi mnogemi i zaspraven mogal bit črni. No, ki voli nek’ izvoli. Isto tako ki voli nek’ izvoli i na se te fešti od lampic, a ne znan da postoji mesto na komu se neće važgat. Neću ni na Čolića. Pa kamo ću onda? E, pa sad bin van rekla da nisan pristojna. Ovako odgovor glasi – gren trenirat za predsjednicu.