Volin hodit. Raje va kunpanije, ma gren ki put i sama. Mislin da san obašla se cestice i puti okole Lovrana i uživala va rožicah, urejeneh okućnicah i mislela da ću doživet stotu, aš hodin… Ki zna po ki put san ovi dani pasala po Omladinskoj ulice, Pute Oprič do Cvjetnega puta i nazada pa po Školarovin pute zdolun… Tu je jedna okućnica pred kun se vavek poferman.

Visoki borići delaju hlad, a pod njimi, bi rekli danas, umjetničke instalacije. Stara bicikleta, kakoveh ni današnji dan, kvadar od sliki va sred kega visi važ z cvatućun rožicun, na špag navrezeno morsko kamene kemu je priroda storila škuju pa ga se more obesit na najlon ale špažić… Tamo daje su lanterni za lepo videt po danu a po noće za rasvetu, jeno velo odrabjeno sidro, mornara ki brodska erika, feral, figura sedi … Tu je i tabela na koj piše »Atelje«. Kurijoža san! Aaaa, pa tu biva Ervin Mandić kega poznan još od sedandesetega leta kada je sopal va bende »Gold«. Eee…, to su bila vremena od muziki, tanci, mladosti, veselja i lepeh mladić. Šla san nutre. Skužala san se i rekla jušto kako je: »Kurijoža san… Imate lepu okućnicu i interesantne ideji i tamo piše Atelje…«

Se nevere i bonace / Snimio Vedran KARUZA

Sad vidin okol kući još više starinskeh stvari, predmeti ki su vezani uz more i se neč ča je baš lepo za videt. I to me je poneslo. A kad me neš takovega prezame onda oćutin da se raja štorija. Seli smo pred kuću Ervin Mandić i ja pa se pogovaramo. Se neš san doznala ča prvo nisan ni znala ni suminjala da takovega neš imamo va Lovrane.

Ervin Mandić, zovu ga još i Capo, je po rojenju i živjenje Lovranac. Rojen je 1955. leta kako prvi otrok va fameje Mandić. Kada je mat Jelka prnesla z nida doma najdraži fagotić, otac Emil se je štimal, prvi otrok i to još sin. Tri leta kašneje rodil se je brat Edo, da se Ervin ima s kin igrat… Pokle osnovne školi finil je brodograđevnu školu v Reke i postal brodski motorist. Jedno vreme je navigal i odlučil napredovat pa se doškoloval za brodskega strojara i tako su mu more i brod bili sujeni – navigal je se do penziji.

Sa mora sveta

Tako mi danas pokle seh let ča j tukal sa mora sveta more odgovorit na ono vječno pitanje:

Ča bite vi rekal, koliko kor ima kruh mornara?

– Bilo je sakako, ma čovek se navadi na se. Kada san navigal bin bil rad prestat, a kad san šal va penziju, su mi brod i more jako falili. Oplovil san skoro celi svet, se osin Australije. Bilo je to vreme kada su brodi bili va luke već dan. Videl san čuda gradi, upoznal njihovu lepotu i neč od njihove kulturi i užanci. Z četrdeset let staža san šal va penziju kako upravitelj stroja i od tuda me preko imena i dan danas zovu Capo.

Slikarska bogatija / Snimio Vedran KARUZA

Navigal ste i z bendun sopal, kako to?

– Ja san odvavek volel muziku, mlad san sopal klarinet i saksofon va našoj lovranskoj limenoj glazbe. Ki naviga ni vavek na more, kada san bil doma bavil san se z muzikun i ne samo z muzikun. Jako san volel ronit i lovit ribu pod vodun, z Toronjerun san zaspravje užival va nemotarijah maškar i pusnega vremena. Jako volin starinske stvari i predmeti ki su vezani za pomorstvo. Vavek san ih skupjal, nosil doma i veselil se skupa z ocun i materun. Reklo bi se današnji dan da je skupjanje predmeti z prošlosti tradicija moje fameji. Posebno volin stare kartulini od Lovrana ke san isto čuda let skupjal. Pred penziju san priskrbel sprav za pušćat muziku vrhunske kvaliteti i bil san nekoliko let mladi penzioner i mladi disk – džokej Capo.

Poveda mi Ervin pomalo, a mane oče beže na njigov rascvateni črjeni božur, kega zovu i prlj. Ni ih čuda po Lovranšćine, a najviše je oneh roza posajeneh va vrteh okol kuć i palaci. Gledan ja tu rožicu, gleda ona mane i para mi se kako da cvate samo za me. Nikad nisan takovega kolora videla i jako mi se piježa. Pa opet pitan:

Videla san onu tabelu, kakov atelje imate?

– Najboje da van pokažen.

Pred mićun drvenun kućicun i na gredah va njoj visi more starini. Inkantala san se i rekla: »Auu, koliko tega imate!« »Ni to niš prema onemu koliko san imel, na žalost 2001. leta mi je zgorela kuća. Se ča san let i let skupjal i se ča san imel je va hip šlo va dim i popel. Imel san jako čuda stareh kartulini Lovrana sada iman samo 50 originali i 1. 200 digitalneh.«

Gledan ja tu rožicu, gleda ona mane… / Snimio Vedran KARUZA

Nevere i bonace

Vidin da se je jako rastužil pa san na brzinu promenila temu.

Ča ste morda još i umjetnik s pinelićun?

– San, vidite za so ovo delo je zaslužna korona.

Kućica je puna slik ke prikažuju neveru i bonacu na more, Lovran, barki, jedrilice, rožice, pejzaži, mrtvu prirodu… Gjedan sliki… Ne znan ka je lepša, saka ima ono neč. Zaspravje treba bit čovek nadaren da ovo more storit. Na slikarskoj palete je fanj kolori, prekinula san ga va dele… To komać sada vidin. Ma, ja i daje gjedan sliki i naslišan Ervina…

– Čovek mora neč delat, do koroni san bil disk-džokej i va tin san se ćutil baš dobro. Znate saka muzika takne dušu, a znal san zibrat baš one prave pjesmi. Užival san gledat zadovojnu i zahvalnu publiku i sada trefin judi ki mi reču: »Ervin, kako nan je bilo lepo.« Kada su počele zabrani druženja radi koroni nisan znal kamo sobun. Domislel san se kako su me va škole hvalili da san jako nadaren za slikanje i kako su moje sliki bile zibrane za najboje. Znači iman osnovi slikanja. I počel san slikat. Moj prijatelj po muzike Vladimir Vengust z Opatije ki je pušćal muziku z ploč pod imenun disk- džokej Bowi je i poznati slikar pa mi je dal par savjeti, kako i zač baš tako. Sada smo prijatelji i po slikarstve.

Slikan uje na platnu z klasičnun tehnikun i špatulato, uživan mešat kolori ne bite verovala koliko nijansi se more storit od sakega kolora. Volin delat primorski motivi, a posebe mi je drago nacrtat neki prepoznatjiv motiv Lovrana z pasanega vremena. More je senjalo celo moje živjenje, more je neiscrpan izvor idej aš se smirun menja. Znate, šal san za tin da na sliki kroz more prenosin svoje raspoloženja. I čovek ima svoje bonace, nevere, maestral… Najveć slik regalan judin ki su mi na neki način naruku ale dragin judin samo zato ča mi ulepšaju dan zato ča su del mojga živjenja.

Tako je to bilo nekad / Snimio Vedran KARUZA