Božinović govori da će kafići opet delat ne samo vane leh i nutre. Lipo j’ to čut aš gre zima, dažji, bura i si vranići pa to vanjsko sedilo ni baš šegavo, a ni zdravo rešenje. I ne moru tu pomoć nikakove pećice aš one ne teple, ča bi se reklo – sveobuhvatno. Teple ale spreda, ale zada, more i z boka, se ovisi kako njoj se obrneš. Kod ognjišće nekada – vas bi se važgal naprvo, a na hrbatu mrzlina da te Bog očuvaj. Ni da ja znan kako tepli ognjišće, ma san kod mića naslihala štorije od tete Vilki pa san se domislela. Usput san se domislela i seh oneh štorij ča su nekadanji ljudi povedali okolo toga ognjišća, a mane ih neki drugi nekadanji ljudi povedali za zimskeh večeri kraj šparheta. A štorije su bile od kosidbi, od blaga, od šumi i sega onoga okol česa njin se življenje vrtelo. I vavek je bil nekakov mirakul od koga bi se mane oči raširile, uha narasla, a da j’ neki rekal »bu« bin se bila zbatila. Jedna od najhujih je ona o vraniću ki teče po grižah prama kuće od pokojnoga barba Zdravka, krama i klepeće, a zad njega iskri oganj delaju. Avah je mane kako san se bojala. I dugo let bin dočin bi zaškurelo z puno straha gljedala na te griži. Kad jednu zimu – sopeta družina spred šparheta i sopeta štorija od vranića, i mane sopeta ni svedno, kad najedanput pokojni barba Branko govori – morda j’ vrime da njoj štoriju dofinimo do kraja.

Bledo san jih gledala aš nisan znala da j’ pokle onoga »i tako j’ vranić otkljepetal na Praputnjak« još neš. Za pravo van reć, veli strah me j’ ulovil od onoga ča san konačno trebela čut. Va sekunde san pomislela – morda j’ vranić nekoga ubil, nekoga sobun zel, morda ni ni prošal na Praputnjak, morda još va Dražine biva… Ma, niš od toga. Štorija finjeva ovako – ljudi su zbilja misleli da vranić po putu kampana i oganj hita, ma to ni bil vranić leh, od spomenutoga barba Zdravka magarac, ki se j’ odvezal, tekal doma, a lanac s ken je bil vezan je klepetal i odletal po kamenju pa j’ iskril. Pitala san jih zač su me let i let tako grdo strašili, a oni su rekli – da te vranić ne bi nosil po teh grižah aš si kod na metle pometena i sakamo nos rivaš, a ovako smo bili siguri da nećeš poć tamo kamo ti ni mesto, da nećeš fljusnut i šundrat ruku ale nogu. Odgojna metoda, na koj njin i dan danas zavidin aš verujte, moja noga na te griži i pokle ča san znala da vranića ni, ni stupila. Aš znate za onu – vranić nikada ne spi.

No, kamo me j’ Božinović otpeljal. Dugo va prošlost, ma neka je aš mi j’ domišljanje na ti dragi ljudi vavek veselje. A ja ću sada vas otpeljat na terasu od jednoga kafića na koj san vrime kratila tako da san brojila kuliko ima odrasleh, kuliko mićeh, a koliko pasi. Zač san to šla brojit? Ma zato aš mi j’ jedna prijatelica onako usput rekla da se njoj čini kako će ov popis stanovništva pukazat da va Lipoj našoj ima već pasi, mačak, hrčki, pitoni i ča ja znan kakovoga se blaga leh ča ima dece. Ona da kad gre šećuć parkon više vidi pasi ki se igraju leh ča vidi dečine. Rekla san joj da bi morda bilo obrnuto da se pasi umeju na kompjuter igrat, ma ona j’ ostala pri svomu. I tako brojin ja i razbrajan, i ča? Intanto je imela pravo. Pasi su dobili utaknicu. To sad konobar kad nosi pijaču ljuden, zajedno nosi padelicu z vodun i pasu, ča j’ va redu aš ako ćeš imet blago onput o njemu moraš i skrbit. Ja volin blago i celi san život imela pasi, maške, jedno vrime i golubi, grdelini, lokarini, ježa, lastavicu i sega vranića, tako da niman niš protiv pasi, ma iman puno toga protiv nekeh vlasniki ki ne snaže zad njih. Brižno blago se poblati kade se poblati i ne ume posnažit, ma zato j’ tu vlasnik. Sakomu koga vidin da to ni načinil rečen ča ga gre i prvo ću ja od nekoga od njih oklepuh dobit leh će on kaznu od komunalnoga redara. Me par da j’ i njihovi pasi sran radi njih, ma ne moru niš promenit.

I povedan ja matere o toj terase, ljuden i pason, a ona mane odgovara – a, prava se javila. Ljudi, kakovi god bili baren imaju pasa, a ti telica od ta drugi dan šezdeset let, sobun plišanu žabu ponašaš. Pa ča ne bi bilo bolje i mane da san fermala na kućnemu ljubincu, on me nikada ne bi sramotili kako me daš ti.
Da bin besedu rekla. I tako već par dan.