Je van teplo? Mane j’ za kožu suć. Ma, kako bi jedna moja kolegica rekla – ča skucate, pa leto je. Bome je i to žestoko. Ti sakramenski toplinski vali koda ne umeju poć nikamo drugamo leh pu nas doć. Isti su kod i oni silni turisti ki nas sa seh stran napadaju. Ma na turisti ne njurgamo, baren ne tuliko kuliko na teplinu ča j’ logično, aš da nan teplina plaća i ona bi bila dobrodošla, a ovako njoj i pas mater i se ono ča uzato gre. Sad će neki reć kako su teplina i turisti zagropani aš da ni tako lipo sunčano na plavomu nan Jadranu, drek bi celi svit k nan dohajal. I zato ću mučat, potit se i trpet. Strpljen-spašen, rekli bi stari ljudi. Sa srića pa još nisan zimske gumi zamenila z letnjemi pa kad se vozin zamislin da vane pada sneg i zajedno mi bude lagje.

Škerac na bandu, ma te tepline zbilja nisu normalne, a kako i vavek za se smo si krivi sami aš da malo već mislimo na prirodu, a manje na komoditet društva, bilo bi se puno bolje. Ovako, kuliko smo mi neumjereni, tuliko nan neumjereno i priroda vrnja. Pa doklen se mi pržimo, na drugomu kraju svita su polavi, na tretemu požari i nikada kraja. Intanto, kad već ne moren zdurat ti silni Celziji ki se naslože leh se domislin na si oni radniki va Tretemu maju, oneh ki buše i kopaju cesti, na oni ki delaju va kuhinje i na si oni ki su na njivah, pa samoj sebe rečen – ne hitaj za Bogon kamenje! Ma kako j’ va ljudskoj prirode, a pogotovo va mojoj, normalno njurganje, tako i ja sako malo zanjurgan, pa san i sad.

Ne znan kuliko njurgaju si oni ki su zbrisani z članstva SDP-a, ma me par da fanj. Ne bin se otela pačat va opravdanosti ale neopravdanosti njihovoga hitanja vanka z stranki, aš to su njihovi, ča bismo rekli familijarni ale stranački problemi, ma kad ja neš ne platin dobijen i opomenu i ovrhu, a puno bi mi bilo lagje da me hite vanka, recimo z članstva va Gradskoj k njižnice. Intanto ako se ovi ovako nastave hitat i prehićevat, me par da će novi člani iskat preko natječaja.

Ča će i kako ovi na Dobrinjštine ki će turističku sezonu 2021. leta gospodnjega zapametit kod najsmrdljiveju va povijesti njihovoga turizma, ne znan, ma kuliko iman čut tamo – smrdi, smrdi, jako smrdi! Da stvar bude bolja, ta se vonj pojavil kad je »va promet« pušćana nova kanalizacija, ča će reć da doklen su, oprostite na izrazu – blatili po starinski, ča će reć va septičku jamu, se j’ bilo, ča bi se reklo »koda ni ne seru«. Oni ki se razumeju va te kanalizacije govore da su za se krive te nekekove pumpi ke valjda ne pumpaju dobro, najme – nisu adekvatne. Onput se ja pitan, a kako to da nisu adekvatne i dobijen odgovor da su se ljudi sami prikopčavali na kanalizaciju i da j’ saki po osobnomu nahođenju klal pumpu, ma i to da nisu oni krivi aš da njin je takova depeša stigla. I ča sad? Va smradu bivat ale pumpi menjat? Domišljan se da kada su Dragu prikopčali na kanalizaciju i na kolektor ki j’ bil na sv. Ane, nismo mogli pu none va dvorišću sedet kuliko j’ to smrdelo, a nona ni celo leto mogla poneštri opret. I bome j’ smrdelo fanj dugo, onput su neš prčkali po tomu kolektoru i valjda načinili kako su trebali va startu pa j’ ta vonj nesatal koda ga nikada ni ni bilo. A to ča san ja užala reć da ti Dražani malo preveć jidu i gredu va zahod, to mane na dušu, aš brižni niš nisu bili krivi.

A ki j’ kriv zato ča nan je grad vas pocuran? Kako i neće bit kad je more ljudi, a za pobrojit javni kondoti su ti dosti i prsti jedne ručice. Evo, ki’vo večer san videla golu rit na mesečine i to va centru grada. A ča j’ brižna ženska mogla leh čepnut i curat kraj Mrtvoga kanala kad sila Boga ne moli, a kondota nigdere. Ja, mogla se j’ još i va gaći pocurat. To ča j’ uspjela doteć do oneh naštivaneh barki ča čekaju ale imaju remont, ni joj baš jako pomoglo aš z jedne bandi je zaklonjena, ma z ove druge j’ bilo se trasparentno. Još me je i nasmela aš san se zajedno domislila na noja. Ona j’ jušto kod i on glavu zarivala va barki, aš ako ona niš ne vidi, ni nju ne vide drugi, a to ča j’ rit sakomu pogledu »na izvol’te«, to se nje ne tiče. Jedino ča bin ja da san morala bit na njejen mestu bila drugačje načinila je da bin se kad bin odbavila stala i takov okljepuh dala onomu čoviku ki j’ bil š njun da bi mu glava zavrtela. Zač? Zato aš namesto da stane zad njeje riti, on se maknul va stran koda se to njega ne tiče. Ako j’ tako i inače va životu, jadna j’ i ona i njeja rit.