Za ki dan će si oni ki vole čut pravu domaću pjesmu doć na svoje, aš kako smo imeli čut, kancona »Zakatajmo čakavci« za ku je i muziku, i versi napisal Robert Pilepić, a se to i kamo, i kako rabi pospravil Aleksandar Valenčić, trebela bi zaplavat radijsken eteron.

Priprema duga osan let

Ova štorija od kancone »Zakantajmo čakavci« počinje još prvo kakoveh osan let, poveda Neno i nastavlja: 

A koga j’ to Neno ćapal i va studio od Valeta poslal? 

   – Svojevrsnu himnu čakavice i čakavcon kantaju judi i z ove, i z one bande Učke – Ivica Lukanović, gradnačelnik Kastva, Denis Žužić, direhktor Turističke zajednice Tar-Vabriga, Dean Pustijanac, direhtor Turističke zajednice Svetvinčenat, aranžer Aleksandar Valenčić, ti (ča će reć ja ale ona ka stoji va potpisu ovoga teksta, op.a.), ja (ča će reć Neno Pavinčić), Voljen Grbac, sen poznata i od sih priznata čakavska eminencija te moralna vertikala – Stara bjonda Pepina, a podršku pjesme svojmi snažnemi vokali dale su i vrhunske umjetnice Antonela Malis i Vivien Galletta. I semi njimi od srca hvala ča su pristali bit del ovega projekta i pjesme za ku želin da postane svojevrsna himna i poveznica seh nas čakavskeh judi diljem Lepe naše, a pogotovo oneh domaćeh ki su morali poć dugo va svet al in srce vavek jače tuče kad se spomene naša domaća beseda i kraj. 

  Promocija znad Brseča

– Ši, posebno i velo hvala precjednice Kolinde Grabar-Kitarović ka je također dala potporu pjesme »Zakantajmo čakavci« i rekla da je vavek na svojmi putovanji i životu van Hrvatske va sebe nosila zvuki zajika uz kega je odrasla, kega voli i ki va njoj budi drage uspomene te dodala »čuvajmo skupa lipo naše ČA«, dodaje Pavinčić i napominje – zato neka ova pjesma bude simbol očuvanja čakavskega narječja i jedinstva čakavci. Kad kantamo da nas si čuju! 

   Kancona j’ snimljena, i ča sad dalje, kakov je plan, pitamo Pavinčića. 

   – Logičan sled stvari bi bil da se snimi i spot, ma prioritet nan je sad predstavljanje pjesme javnosti. Prezentiranje pjesme medijimi ćemo vrlo skoro storit, a kade drugde nego va jednoj pravoj, autohtonoj primorskoj konobe, svojevrsnemu zaštitnemu znaku našega kraja i judi ka se nalazi otprilike na granice Istarske i Primorsko-goranske županije, va mestu Zagore blizu Brseča. Velikodušni domaćin, šjor Vlado Vretenar će nan opret vrata svoje konobe ka ima i muzejsku vrednost. Nutre se nalazi nekoliko tisuć izloženeh starinskeh stvari zmed keh će još boje zazvučat ovo naše tako lipo ča i kancona »Zakantajmo čakavci«.